2 Corintios 11 - Nuevo Testamento Toba Sur

So Pablo qataq som saq 'en mayi 'eetega lamaxashicpi so Cristo

¹ Da iyaxa da qami' cada'ac da qanañaxachiiguet da 'ico' ñi'oopaxac. Nai'ctaxa ca 'eetec, qalaxayi nachi 'en'am aÿim qan'añaxachiiguet.

² Cha'ayi aÿim huo'o da 'ico' ica'alaxanaxac da qoñiita, qalaxayi de'eda ica'alaxanaxac, damayi chigoqtot ñi Dios. Cha'ayi aÿim sauotaique da qami' sadonaxanaxangueta so Cristo, qataq sauotaique da qami' sachaxaneu'alo somayi, da 'eeta'am ñaq'en aca qa'añole mayi saxanaxa da huadon, da huadonguet ca 'oonolec ÿale.

³ Cha'ayi de'eda 'eetec so n'adaxanaq mayi sa nqalaataxaic co'ollaq ÿatenachit aso Eva. Nachida da i'ot da icolanaxa da sa iuena'a da nataq'en ishit da qami' qaÿatenachi't, nachi da qadhuennataxaqui ishit da dashiueguesop dam huesochiguiñi qad'amqajnataxanaxaqui so Cristo.

⁴ Cha'ayi qami' ÿapacteec da qan'añaxachiiguet nam qami' nvittapegueu'alo mayi i'axattac ca lÿa Jesús mayi saq 'en'am som sa'axataqtac, qataq da qami' qauacoñiiguet ca lÿa espíritu mayi saq 'en'am som mashi qauacoñiiguet, qataq da qauacoñiiguet ca lÿa n'aqtaxanaxac mayi saq 'en'am da mashi sogote qau'aqaichigui.

⁵ Cha'ayi aÿim sela'a da sa ishit da aÿim napacalec nam qoquiitague'pi mayi 'eetega da nataÿaña nam Jesús lamaxashicpi.

⁶ Qaq nai'ctaxa da aÿim sa ishit da sa ñaqalaate' da itaxaÿaxac, qalaxayi sa ishit da nachi 'eetec da ÿauattonaxanaxac. Qaq 'enauac nam so'otaqpi da qoñiita, nachina na ichoxot de'eda qadauattonaxanaxac.

⁷ Loqo' chaq ¿sa ÿaÿamaxañi peta'a co'ollaxa da sa ishit da seshiiten da sa'axat da n'aqtac mayi chigaqaigui da nca'alaxa, da saÿa da ÿataqta ñi'iguelaxañi, yaqto' qami' ishit da qami' qanauaxaÿaxaayishigue'm?

⁸ Qaq aÿim 'eeta'am da seuotaxanec aso alom na laÿipi 'amqajnataxanaxaicpi co'ollaq aÿim saconguet aso lshiitenaxanaqte, da yaqto' aÿim ishit da qami' souapegueto.

⁹ Qataq co'ollaq qami' sootaiguilo, qalaq huo'o da iuenaxanaxa, qalaq sa ishit da huo'otaq huo'o ca aÿim nsallaxaueetapegue' da qoñiita. Cha'ayi soua qadqaÿa't mayi chigoqda'ague da Macedonia, soomayi aÿim ÿanema asom soueetaique. Qaq ÿataqta lta'adaic da itelaxa da huo'otaq huo'o ca nsallaxaueetapegue' aÿim da qoñiita, qaq damayi nachi 'eetai' da shicto'ot qome.

¹⁰ Qaq ÿataqta aÿim 'eesa da sauattoota da 'eesa lataxac mayi chigoqo'ot so Cristo, qataq saÿateeta nataq'en da sa ishit da huo'o ca nqat da i'ot da ñitonaxac nam netaña yi 'alhua Acaya.

¹¹ Qaq ¿tá'ainco' yi 'eetec dam da' i'aqtac? ¿Sa ishit peta'a da qami' sauoteque? Qalaxayi ñim Dios mayi ÿaÿaten da ÿataqta qami' sauoteque.

¹² Qalaxayi aÿim shictot da so'ot dam so'ottac, yaqto' sa ishit da sauo'o ca ldaqa' nam chochi ÿauotaique dam ÿachigoxotchigui, da yaqto' huo'o ca ntonaxac, da 'eeta'ama qomi'.

¹³ Cha'ayi namayipi chochi n'enaqchin da 'eetega da lamaxashicpi so Jesús, qalaxayi tenataxanaxaicpi, qataq chochi n'enaqchingui da 'eetega lamaxashicpi so Cristo.

¹⁴ Qaq damayi sa ishit da huo'otaq lliualaqa'a, cha'ayi saÿajnaq da so Satanás ishit da chochi n'enaqchingui cam 'oonolec na lamaxashicpi ñi Dios mayi huo'o na l'edaxa.

¹⁵ Qaq ÿoqo'oyi sa ishit da qalhuala'a da huo'otaq nam l'onataxanaxanecpi somayi da ishit da chochi n'enaqchingui da 'eetega da no'on cam i'ottac. Qalaxayi ca nhuaxanaguec namayipi ipacchigui qome 'enauac nam i'ottacpi.

Na nque'ejnaxacpi so Pablo souaxat da lamaxashic so Jesús

¹⁶ Qaltaq shi'iguelaxalec da i'aqtac: da sa ishit qome da huo'o ca ipettega da aÿim huo'o ca ñi'onataxac. Qaq da huo'o ca lhuennataxa de'eda, qaq no'on qome da aÿim ÿauaqta'a da setaqa da shiita'am cam huo'o da n'onataxac, yaqto' nataq'en aÿim cada'ac da huo'o da ñi'amqajnaxac.

¹⁷ Qaq de'eda shinapec sa ishit da aÿim ÿamaxalec so qadataxala'. Cha'ayi da ñi'amaqten, nachi da setaqa, qalaq 'eeta'am da huo'o ca ñi'onataxac.

¹⁸ Cha'ayi qalota na chochi n'amaqchingui nam huetalec ana 'alhua, qaq ÿoqo'oyi nataq'en aÿim ÿataqta huo'o da ñi'amqajnaxac.

¹⁹ Cha'ayi qami' ÿataqta qaupi'itaxañiitega da qami' ÿajnaxanaxaiqa, qalaq ¿tá'ainco' yi qanviñiiguet nam huo'o da n'onataxac?

²⁰ Cha'ayi qanviñiiguet nam shiÿaxauapi mayi qami' icoñida'aque da chochi qami' l-lataqa, qami' deque'etapiguilo, qataq 'ico' qami' lalamqa'te, qataq sa ishit da qami' ÿauoteque. Nda'a't da iuaxaatapoiguilo naua qadashigolli'.

²¹ Qaq nai'ctaxa da aÿim huo'o da i'aloxo da shinapec de'eda, cha'ayi ¡qomi' ÿapacteec da qaica ca qad'añaxac da so'otaq damayi! Qalaxayi namayipi da ÿataqta saq llivigui yi lauel da n'amaqten, qaq nataq'en aÿim ÿataqta saq llivigui yi iuel, qaq nai'ctaxa da 'ico' huo'o da ñi'onataxac da shinapec nagui de'eda.

²² ¿Namayipi peta'a hebreo l'ecpi? Qaq nataq'en aÿim. ¿Namayipi llalaqpi so Israel? Qaq nataq'en aÿim llalec somayi. ¿Namayipi maichi laualpi so Abraham? Qaq nataq'en aÿim.

²³ ¿Namayipi peta'a l-latacpi so Cristo? Qaq nataq'en aÿim ÿacteec da ñapactelec namayipi, qaq nai'ctaxa da 'ico' huo'o da ñi'onataxac da shinapec de'eda. Qalaxayi aÿim ÿacteec da i'onataxanaxac, saq 'en'am namayipi. Ÿacteec da ñiuaxanaguec, qataq ÿacteec da ñicoñitaguec. Qalota da sootaigui da lchic da ñalaataguec.

²⁴ Qaq ivi' na cinco da ÿi'iguelaxalec da ÿauo'o da ñiuaxanaguec na judío l'ecpi nam treinta y nueve ñalashinaguecpi mayi aÿim qai'otec.

²⁵ Tres da qaÿi'iguelaxalec da aÿim qaidotega na qo'ipaq, qataq 'oonolec da aÿim qaidotega na coma'. Qataq tres da ñauane' da iyiiñi ana ñoqottau'a barco, qataq ñauane' da 'oonolec na'a'q qataq 'oonolec pe da sootangui aso auaxai late'edai.

²⁶ Qataq ÿataqta qalota da sequeuotac, qataq ñauane' da lchic na talapi, qataq na cachaxaicpi, qataq na maichi iuo' l'ecpi, qataq nam chigaqa'ague cam lÿa 'alhua. Qataq ñauane' nataq'en da lchic nam la ciudatpi, qataq naua n'onaxayi, qataq ana auaxai. Qataq ñauane' da lchic nam 'eetega qadqaÿañicpi, qalaxayi tenataxanaxaicpi.

²⁷ Qataq ñique'etaxangui da i'onataxanaxac qataq da ñaqalaatapigui'. Qalota da sa ishit da so'ochi, qataq ñique'etaxangui na ÿoqouaxa qataq na ÿaquip, qataq qalota da ñoqouaqchijla't. Qataq ñauane' da ñique'etaxangui na latomaxa, qataq da qaica ca ñapogoña.

²⁸ Qaq sa ishit da chaqnata namayi qataq 'enauac nam laÿipi, cha'ayi 'enauaque naua na'axa'te ÿataqta ñanomtapeeguet da iyaxa da souapegue' 'enauac nam 'amqajnataxanaxaicpi.

²⁹ Qataq da huo'o ca qaica ca l'añaxac, nachi aÿim nataq'en 'eeta'am da qaica ca i'añaxac. Da huo'otaq huo'o ca huañi qanqoÿin, qalaq aÿim huo'o da ñique'etaxangui da icoxo qataq da ÿalemataic.

³⁰ Qaq ÿoqo'oyi da huo'otaq tachigui da ñi'amaqten, qalaq ñi'amaqchingui cam ichoxot da 'ico' qaica ca i'añaxac naq'en.

³¹ Qaq ñim Dios mayi lta'a so qadataxala' Jesucristo, ñim chochaq tateec da ñi'oxonnataguec, ñimayi ÿaÿateeta da ÿataqta 'eesa de'eda i'aqtac.

³² Co'ollaq soota'a yi Damasco, nachi so nta'a mayi ilotague' yimayi, mayi do'onataxaatacot so lÿa nta'a l'enaxat Aretas, somayi ÿauo'o so nallippi da qanauan naq'en so lasom yi la ciudad, da yaqto' aÿim qaÿaconeu'a da aÿim qaicoñi'.

³³ Qalaxayi satoigui qanqoÿin aÿim so nalloxoqui som lcopaxat yi la ciudad, aÿim qaÿachitaigui aso canasto. Qaq 'eda da 'eetec co'ollaq aÿim ÿit somayi.