2 Corintios 1 - Nuevo Testamento Toba Sur

So Pablo ÿamaxa aso lede so 'amqajnataxanaxaicpi mayi netaña yi Corinto

¹ Aÿim Pablo, de'eda ñamaxasaguec chigoqtot ñi Dios da ÿauo'o aÿim lamaxashic naq'en so Jesucristo. Aÿim hueta'aguet ñi qadqaÿa Timoteo. Qaq nagui qami' samaxalo ana ÿide, qami' ÿaqaÿañicpi mayi qau'amqchiñiitac ñi Dios, mayi qoñiitaña na la ciudad Corinto, qataq nataq'en 'enauac na lalamaxatpi ñi Dios mayi netalec yi 'alhua Acaya.

² Ñishitaique da qauacoñiiguet da nqouagaxanaqtaic qataq da nlagaxayic mayi chigoqo'ot ñi qadta'a Dios qataq so qadataxala' Jesucristo.

Da nque'ejnaxac so Pablo

³ Shi'oxodenaq ñi Dios mayi lta'a so qadataxala' Jesucristo, cha'ayi nachiñi ñi qadta'a mayi qomi' lchoxonnataqa, qataq nachiñi ñi Dios mayi sa i'atai' da qomi' i'añaqchi't.

⁴ Ñimayi qomi' i'añaqchi't da ivita da huo'o ca qanque'ejnaxac, yaqto' qomi' seshitaq da sa'añaqchitaq nataq'en ca huo'o ca nque'ejnaxac. Qaq de'eda qad'añaqtaxanaxac, nachida da l'añaqtaxanaxac ñi Dios.

⁵ Cha'ayi i'enaxatteguet da qomi' ñiuanaqhua'a na saq llalcolec nque'ejnaxaguesat so Cristo, qaq nachi 'en'am chigoqchigui somayi da qan'añaqchitaguec ÿataqta saq llalcolec.

⁶ Qaq ÿoqo'oyi da qomi' huo'o da qanque'ejnaxac, qalaq naigui da qami' qai'añaqchi't qataq qami' qanca'alaxatreec. Qaq da ñi Dios qomi' i'añaqchi't, nachi nataq'en da qoñiita qami' qai'añaqchi't, qataq qami' qanca'alaxatreec, yaqto' ishit da qanaloita'aguet da qan'añaxachiiguet de'eda que'ejnaxac mayi qomi' ñique'etaxanaqtapigui.

⁷ Qaq ÿoqo'oyi ÿataqta huo'o da qadpe'e lta'adaic da qami' sepi'aqtalguete, cha'ayi saÿajnaqta da qami' qanhuañiÿau'a de'eda que'ejnaxac, qaq nataq'en qanhuañiÿau'a qome da l'añaqtaxanaxac ñi Dios.

⁸ Qami' ÿaqaÿa't, sauoqtaique da qauaÿajñiita da ÿataqta saq llalcolec da qanque'ejnaxac co'ollaq souaqta'a yi 'alhua Asia. Damayi ÿataqta lta'adaic, ÿoqo'oyi huac da sa ishit da yaloxoguet. Mashi sovidaqa'a da qaica ca qanaquitaxac da yica'alaqtauec.

⁹ Mashi sanomaqta da shinaqta'am ca ÿagueec na lasouaxashit da taÿa'a qanqoÿin da nalaataguec. Qalaxayi damayi i'ot da qanapaxaguenataguec, da yaqto' sepi'aqa'a ñi Dios mayi nca'aleec naq'en na leuaxaicpi, qaq sa ishit da nachiqomi'.

¹⁰ Ñimayi nachiñi ñi qomi' nca'alaxateeguesopa co'olloxochiyi da lta'adaic nleuaxa, qaq ñaq 'eetalec nagui da qomi' nca'alaxattrapeguec. Qataq ñaquitaqta'a ñimayi da nachi 'eetai' da qomi' nca'alaxattrapeguec,

¹¹ lamaaxa da qomi' qautauañi', qomi' qanqouagaxauñiitalguete. Qaq da saqalota na shiÿaxauapi qomi' nqouagaxaueetalguete, qaq nachi 'en'am saqalota na ÿaatacot da n'achiquiaxac ñi Dios souaxat da lqouagaxanaqtaic mayi qomi' ÿanema.

Da 'eetec so Pablo da huo'o mshi saqaÿaloqta da nqo'ona yi Corinto

¹² Cha'ayi da i'ot da qantonaxac 'eeta': da qantounaxac qomi' da'aqtaxanema da qadataxac ÿataqta qui'itta qataq qomi' 'eesoda nagui da ñaq souaqta'aguet na shiÿaxauapi ana'ana 'alhua, qataq lamaaxa da qoñiita. Qaq de'eda no'on qadataxac, damayi chigoqchigui da lqouagaxanaqtaic ñi Dios, qaq sa ishit da nachida da maichi qadaÿajnec.

¹³ Cha'ayi ne'enaua qodede mayi qami' samaxasaxalo, sa ishit da sedaxañi ca lÿa mayi sa ishit da qauaÿachiñi da qautaxaÿaxañi. Chaqcata ca qami' ishit da qauaÿajñi. Qaq huo'o da ñaquitaxac da ña qaviyiÿa'a da qauaÿajñiita

¹⁴ da qom ñi'iguelaq so qadataxala' Jesús, huaña, qaq qami' ishit da qomi' qantoñiitapegueque, qaq nachi 'en'am ñitonaqtapegueque qami'. Qaq damayi mashi cada'acolec da qauaÿajñiita.

¹⁵ Qaq 'eda da sepe'etalec co'ollaxa. Qaq ÿoqo'oyi huo'o da iuennataxa da sa'auaxaañi da qami' ñoqo'onalo, da yaqto' qauamaichiguiñi da dos da shi'iguelaxalec da qami' ñamaqtegalo.

¹⁶ Tatapigui iuel da qami' satelguete co'ollaq ñanaÿa'ague na Macedonia. Qaq da shi'iguelaq, nachi ltaq saÿalguete da qami' ñamaqtegalo, yaqto' qami' ishit da aÿim qautauañi, qom ivita da saigue da Judea.

¹⁷ Qaq ¿sasaguettac peta'a co'ollaq tatapigui iuel de'eda? ¿Qami' qaupi'itaxañiitega peta'a da aÿim da huo'o ca so'ot, qaq shin'am da lhuennataxac ca chochi shiÿaxaua da saq ÿataxalec da huo'o ca l'aqtac?

¹⁸ Qalaxayi ñi Dios qomi' ÿaÿateete' da sa ishit da saq ÿataxalec ca qad'aqtac da qami' sa'aqtaxanaxama.

¹⁹ Cha'ayi so llalec ñi Dios, l'enaxat Cristo Jesús, som sa'axattac qataq soua iÿa't Silvano qataq Timoteo co'ollaq qami' souaqta'agueta, somayi sa ishit da saq ÿataxalec ca l'aqtac. De'eda n'aqtaxanaxac mayi chigoqo'ot so Cristo ÿataqta 'eesa,

²⁰ cha'ayi somayi nachiso so ipacchigui naq'en 'enauac na ÿachaxanapecpi ñi Dios. Qaq ÿoqo'oyi da shi'oxodenaq ñi Dios, qaq chigoqchigui so Cristo Jesús da shinaqta' da qadasataxac, “Aja', nachida lataxac.”

²¹ Qataq nachiñi ñim Dios ñim qomi' ÿanema qataq da qoñiita da saq saxanaxauec so Cristo, qataq nachiñi ñi qomi' ÿanaguilo da l'onataxanaxanqa.

²² Qataq nachiñi ñi qomi' l'angui'shi qataq ÿanaiguilo naua qadquiyaqte so n'Espíritu Santo, qaq nachiso som ÿoqta 'itchiguiñi naq'en cam qomi' qoÿanma.

²³ Qaq aÿim huo'o da iuennataxa da qami' ñamaqtegalo. Qalaxayi saxanaxa da ishit da qami' shi'iguelaxalo, souaxat da yaqto' sa ishit da sauo'o ca qanhuaxanaguiiqui. Qaq damayi ÿaÿateeta ñi Dios. Qaq da sa ishit da nachi 'eetec de'eda, qaq nai'ctaxa da qanqat da ñachaalataxac.

²⁴ Cha'ayi qomi' sa ishit da sauoqtaique da qami' sapaxaguenaxaque ca qad'amqajnataxanaxaqui, cha'ayi da qadpi'iÿaxaqui mashi ÿaÿamaqchiguiñi. Chaqdata da sauoqtaique da qami' setauana'q, da yaqto' nquic da qantonaxaqui.