1 Ts 5 - Nuevo Testamento Toba Sur

¹ Qalaxayi qami' qadqaÿa't sa iuen da sedaxañi ca na'a'q mayi laloxoqui de'eda.

² Cha'ayi qami' mashi qauaÿajñiita que'eca na'a'q mayi lvidaxaqui so qadataxala'. Camayi huetoigui ca na'a'q da sa qaÿauapque, 'eeta'am ca cachaxaic da quetagui yi pe.

³ Cha'ayi na shiÿaxauapi, qom 'eetega da 'enauac lactapiguiñi qataq saqca ca da, nachi nvita namayipi ca nhuaxanaguec lta'adaic, chochi nque'elaxatta, 'eeta'am da nqui'ic aca 'alo hualaxai da ivita yi laloqo' da deco'o. Namayipi sa ishit da ÿit da nhuaxanaguec.

⁴ Qalaxayi qami' qadqaÿa't, sa ishit da qoviitaigui ca 'ico' napalaxa, yaqto' que'eca na'a'q, lvidaxaqui so qadataxala', sa ishit da qami' ique'elaxa't, 'eeta'am cam cachaxaic.

⁵ Cha'ayi 'enauac da qoñiita mashi qoviitaigui na na'a'q mayi yi'oqchiguiñi. Qaq qomi' sa ishit da souaqtaigui ca pe mayi napanñi.

⁶ Ÿoqo'oyi sa ishit da 'ico' so'ochaqtañi, se'enaxataqtapeguem na sa da'amqajnataxan. Chaqdato' da ñiloqteec, qataq seloqtegue da qoyiquiaxac.

⁷ Ca shiÿaxaua da do'ochi, ÿataqta do'ochi yi pe. Qataq ca taxaic, ipacchigui da taxaic yi pe.

⁸ Qalaxayi qomi' mayi souaqtaigui na yi'oqchiguiñi na'a'q, ÿataqta seloqtegue da qoyiquiaxac. Sanaxañi da qadpi'iÿaxac qataq da qadsoxoyic, se'enaxataqchigui ca ale da ÿaañi aca ishit da npaxatalec ana ltogue. Qataq sanaxañi da qanaquitaxac da qomi' qanca'alaxatreec, 'eeta'am aca ado'o alaataxaqui mayi ÿaañi ca ale.

⁹ Cha'ayi ñi Dios sa ishit da qomi' lca'agui'shi da ÿauo'o ca qanhuaxanaguec ca pa'ateec na'a'q. Chaqdato' da saconaxaguet da nca'alaxa mayi chigoqo'ot so qadataxala' Jesucristo.

¹⁰ Somayi qomi' ileualguete, cha'ayi nshitaique da qanachaalataxaua, nai'ctaxa da na ñica'alaqtauec, huo'otaq mashi qadeleu.

¹¹ Ÿoqo'oyi qantauñiÿa't, qataq ñi 'oonolec i'añaqchit ca lÿa. Qaq de'eda mashi qau'ochiitac, nachida qoquiitot.

So Pablo huaqattega na lqaÿañicpi

¹² Qami' qadqaÿa't, qami' ñachoxodenaqtoto da ÿataqta qauloÿiguet na l'onataxanaxanecpi so qadataxala' Jesús nam qami' ilotagueto qataq qami' huaqattegalo.

¹³ Ÿataqta qauauochiic, qataq ÿataqta qauchoxoyiñi, souaxat da l'onataxanaxac. Qoviitaiguio' da qami' lactrapiguiñi, saqca ca da ñi 'oonolec da qoñiita.

¹⁴ Nataq'en qami' qadqaÿa't, qami' saqataxalo da ÿataqta qoñiÿapega na sa ishit da do'onataxan, qataq qau'añaqchichi na sa da'angui yi lauel, qataq qautauañi na sa da'añi da lpi'iÿaxac, qataq qanhualaxauñi' 'enauac na shiÿaxauapi.

¹⁵ Ÿataqta qanchilliÿa'a't, saqca ca ishiitena'aguet ca sa ÿaÿamaxañi da i'otec ca lÿa. Chaqdato' da qami' qanpogoxoiñiÿapegue' da qau'ochiic ca ÿaÿamaqchiguiñi ñi 'oonolec da qoñiita qataq 'enauac na laÿipi shiÿaxauapi.

¹⁶ Qoviitaiguio' da ÿataqta qami' machiyiñi.

¹⁷ Qoquiitot da qanqouagaxauñiitac.

¹⁸ Nai'ctaxa da huo'o na qami' huelguete, qalaxayi nachi 'en'am qai'añiitacot da qan'achiquiaxaqui ñi Dios. Cha'ayi nachida da 'eetapeguec ñi Dios da qoñiita, cha'ayi mashi qau'amaqchiñi so Cristo Jesús.

¹⁹ Sa ishit da qaualamachi da l'onataxanaxac so Espíritu Santo.

²⁰ Sa ishit da qau'otañi da l'aqtaxanaxac ca i'aqtaxanaxac ñi Dios.

²¹ Qalaxayi qavi'iguiñi 'enauac, qaq cam ÿaÿamaqchiguiñi, nachica ca qauaÿamaxachi.

²² Qadvichiÿa'aguet 'enauac na ÿotta'a't sa ÿaÿamaxañi.

²³ Qaq ñi Dios mayi qomi' ÿanema da qadlagaxayic, nachiñi ñi qami' iqui'itaxatte' qome, qataq ÿaÿamaxat 'enauac da qad'oquiaxaqui, qataq ñi qoquiÿapegue' qadqui'ii, qataq 'enauac da qadvilÿaxaqui, da ÿataqta saqca ca qadasouaxashichi naq'en, chochi ivitta'a ca lvidaxac so qadataxala' Jesucristo.

²⁴ Ñim qami' iÿaxanalo ÿataqta sa ÿatenachit quiaxa da l'aqtac, ipactelec 'enauac de'eda.

Da pa'ateec lquinaxanaxac so Pablo

²⁵ Qami' qadqaÿa't, qanqouagaxauñiilguete qomi'.

²⁶ 'Enauac qome na qadqaÿañicpi da qanquiñi', qalaq qanapigoqoi qataq qanchoxonñi'.

²⁷ Cha'ayi aÿim lamaxashic so qadataxala', qaq nagui qami' saqatalo da qautaxaÿaxañi ana ÿide da n'axaÿaxana 'enauac na qadqaÿañicpi.

²⁸ Qaq so qadataxala' Jesucristo qami' ÿanema qome ca no'on qoyiquiaxaqui. Aja', nachi 'eetec de'eda.