1 Ts 4 - Nuevo Testamento Toba Sur

Da lataxac da achaalataxac mayi ÿaÿamaxadeeta ñi Dios

¹ Qaq nagui, qami' qadqaÿa't, qami' sedoxolguete da l'enaxat so qadataxala' Jesús da ñachoxodenaqtoto da qami' saqataxalo da qoquiitelec da lataxac dam qami' sapaxaguenaxaque achaalataxac mayi ÿaÿamaxadeeta ñi Dios. Nachida qome qoquiitot da qanqochiñiita'aguet.

² Cha'ayi qami' mashi qauaÿajñi na qadqataxacpi mayi qami' sanaxama. Damayi sachigoxotoqo'ot so qadataxala' Jesús.

³ Cha'ayi da 'eetapeguec ñi Dios, nshitaique da nachaqñita ñimayi qanañañiÿot. Sa ishit da huo'o ca lauatapiguiñi' aca sa lhua da qoñiita.

⁴ Ca 'oonolec shiÿaxaua iuen da ÿaÿateeta da ÿauo'o aca ÿataqta lhua, qataq ntel-la't, nataq'en ÿauotec aca lhua.

⁵ Sa ishit da chochi quetapegueu'a da i'en aca 'alo, i'enaxattapeguem nam shiÿaxauapi mayi saxanaxa da ÿauatton ñi Dios.

⁶ Sa ishit da huo'o ca napacapeguelec qataq ÿatenachit ca lqaÿa, cha'ayi so qadataxala' Jesús ÿataqta sa naloqnañi da nhuaxanaguec 'enauac na i'ottac de'eda. Qaq damayi sogote da qami' sovitaxanaqtegalo.

⁷ Cha'ayi ñi Dios qomi' iÿaxanalo da qui'itta naq'en da qanachaalataxac. Ÿoqo'oyi sa ishit da soqolaxague ca ishipaxanaqchit da qanachaalataxac.

⁸ Qaq ÿoqo'oyi ca n'otane' de'eda napaxaguenataxanaxac, camayi sa ishit da i'otan ca chochi shiÿaxaua deto. Cha'ayi nachiñi ñi Dios i'otan, ñim qomi' ÿanema so Espíritu Santo.

⁹ Qaq da lataxac da qanauote' ca n'amqajnataxanaxaua, sa iuen da shiyiñi, cha'ayi ñi Dios mashi qami' ÿapaxaguenque da 'eetec da qaÿauotec ca nÿa.

¹⁰ Qataq nachi 'eetai' da qami' nachi qoñiita'ac 'enauac na qad'amqajnataxanaxauapi mayi netaña yi 'alhua Macedonia. Qalaxayi qami' qadqaÿa't, qami' ñachoxodenaqtoto da qoquiitot damayi da qanqochiñiita'aguet.

¹¹ Qanpogoxoiñiÿapegue' da saqca ca da da qoñiita. Ñi 'oonolec maichi huapegue' ca maichi lalamaxat, qataq ÿacootapegue' ca maichi l'onatac. 'Eda da saqataqtapeguelec co'olloxochiyi,

¹² da yaqto' na saxanaxa da da'amqajnataxan 'onaxaic naq'en da qan'aqtaguiiqui, qataq yaqto' sa ishit da saqca ca lhuenec ñi 'oonolec da qoñiita.

Da lli'iguelaxasoxoc so qadataxala' Jesús

¹³ Qami' qadqaÿa't, sa saÿamaxadenaq da sa qauaÿajñi ca lliquiaxac na mashi qanmataxanaxaneec, yaqto' sa ishit da huo'o ca daquicota, i'enaxattapeguem ca saxanaxa da da'amqajnataxan mayi saqca ca naquitaxac.

¹⁴ Cha'ayi da qomi' sa'amaqtenaq so Jesús da mashi ileu qataq nca'aleec, qaq nachi 'eeta'ama qomi' mayi sa'amaqtenaq da ñi Dios ishit da nca'alaxateec da hueta'aguet naq'en so Jesús na 'amqajnataxanaxaicpi, nam mashi qanmataxanaxaneec.

¹⁵ Qaq ÿoqo'oyi de'eda sa'axataqtapeguema qami', damayi l'aqtac so qadataxala' Jesús, da qomi' mayi ña ñica'alaqtauec qom ñi'iguelaq somayi, sa ishit da qomi' datalguete nam mashi qanmataxanaxaneec.

¹⁶ Cha'ayi 'eeta': som qadataxala' Jesús qom huonoteeguesop na piguem, da nactaigui da 'ico' lamaxasoxonaxac ca nta'a, qataq nactaigui da lÿaxanaxac ca lataxala' na chigaqshiguem Dios lamaxashicpi, qataq da l-lamaxa ana nashiide qom qaÿashiidaxaalecna naq'en ñi Dios. Qanachi na ileutañi' da i'amaqten so Cristo, nca'aleec qanqoÿin.

¹⁷ Ime, nachi qaltaq jec qomi' mayi ña ñica'alaqtauec, qomi' qaÿacoosopa da salegaqtoigui namayipi, soqolaxaigui na l'oc piguem l'ec da ñauanaxai' so qadataxala' Jesús na pa'ashiguem. Huaña, nachi chochi tateec da souaqta'aguet somayi.

¹⁸ Ÿoqo'oyi ñi 'oonolec da qoñiita itaunec ca lÿa de'eda n'aqtac.