1 Ts 3 - Nuevo Testamento Toba Sur

¹ Qaq ÿoqo'oyi co'ollaq sa yaloxoguet da shinaqta, nachi tachigui qadhuel da ñidaqhuec da sonqaña yi la ciudad Atenas.

² Nachi qami' samaxasaxalo sa qadqaÿa Timoteo. Cha'ayi somayi lamaxashic ñi Dios qataq qad'onataxanaxaua da sa'axataq da no'on qad'axaÿaxac mayi n'aqtaguec so Cristo. Somayi taÿalo qami' da qami' nauaxaÿaxaayishigue'm qataq i'añaqchit da qadpi'iÿaxaqui,

³ yaqto' qaica ca 'oonolec da qoñiita da nañaxanapiguiñi da lpi'iÿaxac souaxat da que'ejnaxac. Cha'ayi qami' mashi qauaÿajñiita da nachi qoyiquiaxac da ñique'etaxanaxagui ne'ena que'ejnaxaguesat.

⁴ Cha'ayi co'ollaq ñaq qami' souaqta'agueta, qalaq qami' sa'axataqtapeguema da saxaigui 'enauac na que'ejnaxaguesat. Qaq ipacchigui da sovidaxaguet. Qaq de'eda mashi qauaÿajñiita.

⁵ Ÿoqo'oyi aÿim co'ollaq sa yalo'oguet da iuennataxa da qoñiita, nachi samaq so Timoteo da ichimaxata da qadpi'iÿaxaqui. Cha'ayi mashi huo'o da itelaxa da huo'otaq qami' ÿatenachi't so 'iguenataxanaxaic shiÿaxaua lma'na, nachi saqca ca naigui da qad'onataxanaxac.

⁶ Qaq can nvi' so Timoteo da chigaqa'a na Tesalónica, nachi qomi' nda'alo da 'onaxaic qad'axaÿaxac da qadpi'iÿaxaqui, qataq da qadsoxoyiqui. Qataq qomi' da'aqtaxanema da saqalota da qadhuennataxaqui da shinaqta, qataq huo'o da qadyaqai da qomi' qanauañiito. Nachi 'en'am qomi' nataq'en huo'o da qadyaxa da qami' ñauanaxato.

⁷ Ÿoqo'oyi qami' qadqaÿa't, nai'ctaxa da qomi' souaqtangui 'enauac na qadhuenaxanaxa qataq na qanque'ejnaxaguesat, qalaxayi selagaqchiguiñi can saÿajnaq da qoñiita da ñaq qoquiito'ot da qadpi'iÿaxaqui.

⁸ Qaq damayi 'eeta'am qaltaq qomi' nca'alaxatreec can saÿajnaq da qoñiita da sa ishit da qai'axañiiuec so qadataxala' Jesús.

⁹ Qaq ÿoqo'oyi qomi' sa saÿajnaq ca shinaqtec da sanqot da qan'achiquiaxac ñim souaqto'ot qadta'a Dios souaxat da qoñiita, qataq saq llalcolec da ñitonaqtapegueque qami'.

¹⁰ Qaq ÿoqo'oyi naua na'axa'te qataq naua pesa'chi ñoqouagaxaunaqtacot ñi Dios, da ishit da qomi' ÿanema da qami' ñauanaxato, yaqto' qami' setaunaxaque da ÿataqta nalochiguiñi da qadpi'iÿaxaqui.

¹¹ Qaq ñi qadta'a Dios qataq ñi qadataxala' Jesucristo maichi huapegueto ca 'eetec da qoyiquiaxac da qami' ñoqo'onaxalo.

¹² Qaq ñim qadataxala' Jesús nañaxat qataq chochi huañi naq'en da qadsoxoyiqui, yaqto' qanchoxonñiÿa't qataq qavidaxachiÿauga 'enauac na shiÿaxauapi, 'eeta'ama qomi' da ÿataqta qami' sauotaxaque.

¹³ Qataq ñimayi qami' itauanque ca l'añaxac da qadhuennataxaqui, yaqto' ishit da qanaÿañiÿot da saqca ca qadasouaxashichi hueto'ot ñi qadta'a Dios que'eca na'a'q qom ñi'iguelaq so qadataxala' Jesús, da nactaigui 'enauac na lalamaxatpi.