1 Ts 2 - Nuevo Testamento Toba Sur

Da l'onataxanaxac so Pablo co'ollaq hueta'a yi Tesalónica

¹ Cha'ayi qami' qadqaÿa't, qauaÿajñiita so hua'auchiguiñi qadvidaxac da qoñiita, somayi sa ishit da saqca ca naigui.

² 'Eesa da co'ollaq souaqta'a yi la ciudad Filipos, ÿataqta saqalota da qanshiunaguec, qataq qomi' qaiuaxaata'pe. Damayi mashi qauaÿajñiita. Qalaxayi co'ollaq qami' ñovidaxaiguilo, nachi ñi Dios qomi' itauanque da sa ishit da leutapigui qadhuel da qami' sa'axataxama da n'aqtac mayi chigaqaigui da nca'alaxa mayi chigoqo'ot ñi Dios. Qaq nai'ctaxa da souaqtangui na ÿotta'a't qanpa'aguenataguec.

³ Cha'ayi qomi' saÿajnaqta da sa ishit da nsomaxac da sa'axataqtac, qataq sa ishit da sa ÿaÿamaxañi ca shinaqtapeguec, qataq sa ishit da qadhuennataxa da qami' satenachitaqta'pe.

⁴ Chaqdata da ñi Dios qomi' ÿi'igue'n. Qaq co'olla qomi' ÿaÿamaxadeete' nachi qomi' ipataxalguete da sa'axataq da l'aqtac mayi chigaqaigui da nca'alaxa. Qa nachida da huo'o mshi sa'aqtaxanaqtac. Sa ishit da ñimitaqtaique da chochi qomi' ÿaÿamaxadeeta'pe naua qadquiyaqte.

⁵ Cha'ayi qami' qauaÿajñiita da qomi' sa ishit da chochi samaicna'q naua qadtaxaÿaxaco, qataq sa ishit da chochi ñapoqtaña ca qadatenataxanaxac da ñaqataq añi plata. Qaq damayi ÿaÿateeta ñi Dios.

⁶ Qataq sa ishit da qomi' ñimitaqtaique da qomi' qavi'oxoyiñi', huo'otaq na ÿaqauga shiÿaxauapi, nai'ctaxa da qomi' lamaxa'shi so Cristo. Qalaxayi ñaqaiyita sa ishit da nachida da shigaqtega da yaqto' qomi' qauloigueta.

⁷ Nachaqdata da qomi' huosotte' da qadsoxosoxonaxac da qoñiita, shinaqta'am aca 'alo da ÿataqta ÿaÿaten da ilo'ogue ca llalcolec.

⁸ Qomi' ÿataqta saq llalcolec da qadauotaxanaqtaic da qoñiita. Ÿoqo'oyi saqdata da qami' sanaxama da no'on qad'axaÿaxac mayi chigoqo'ot ñi Dios. Nataq'en huac da ÿataqta qami' sanaxama da maichi qanachaalataxac, souaxat da ÿataqta qami' qanauochaxa'u.

⁹ Qami' qadqaÿa't, machi qauaÿajñiita co'ollaq qami' souaqta'agueta, qalaq ÿataqta so'onataxanaqtac, qataq ñasamaqtañi. Cha'ayi ñishoqtaique da ñauegaq cam qadhuenec. Qaq nachida da huo'o mshi so'onataxanaqtac na na'axa'tesat qataq pesa'chi, yaqto' sa ishit da huo'o ca nsallaxaueetapegueto qomi' da qoñiita. Qaq 'eda da shinaqtec co'ollaq qami' sa'axataqtapeguema da l'aqtac ñi Dios.

¹⁰ Qataq qami' 'amqajnataxanaxaiqa mashi qauaÿajñiite' qomi', qataq ñi Dios qomi' ÿaÿateete' co'ollaq qami' souaqta'agueta, qalaq ÿataqta qui'itta qataq no'on da qadataxac. Sa ishit ñaq'enaq da huo'o ca qan'aqtaguec sa ÿaÿamaxañi.

¹¹ Nataq'en qauaÿajñiite' qomi' co'ollaq qami' souaqta'agueta, qalaq se'enaxataqteguem ca shiÿaxaua da i'añaqchit qataq ÿanem da lamaiquiaxac ca llalec.

¹² Qataq saqataqtapeguelec 'enauac da qoñiita da ÿataqta qoquiitelec da lataxac ca shiÿaxaua da quetague' ñi Dios mayi qami' iÿaxanalo da qoviito'ot naq'en da l'onataxanaxac da ilo'ogue 'enauacna qataq da lli'oxoyic.

¹³ Qaq nachida da huo'o mshi sanaqtacot da qan'achiquiaxac ñi Dios, cha'ayi co'ollaq qan'axaÿaxañiÿa da l'aqtac ñi Dios mayi qami' sa'axataxama, nachi qau'amaqchiñi da ÿataqta 'eesa l'aqtac ñi Dios, da sa ishit qanqashiñi da l'aqtac ca chochi shiÿaxaua. Qaq damayi ÿataqta 'eesa l'aqtac ñi Dios, qaq ÿoqo'oyi ishit da huo'o ca naigui naq'en da nachaalataxac da qoñiita nam mashi da'amqajnataxan.

¹⁴ Qami' qadqaÿa't, co'ollaq qami' icaata'pe da saq qami' ÿalemaxa't na maichi qadhuo'oi l'ecpi. Qaq de'eda qami' qai'oteque nachi 'eeta'am dam qai'otec na quetague' ñi Dios mayi netaña yi Judea, nam i'amaqteetac so Cristo Jesús. Namayipi nataq'en saqalota da ncanaguec. Qaq de'eda ncanaguec chigaqaigui na maichi lauo' l'ecpi judiopi.

¹⁵ Ne'ena judiopi nachina na ÿalauat co'ollaxa so qadataxala' Jesús, 'eeta'am so hua'au lta'alpi co'ollaq maichi ÿalauat so lalamaxat mayi Dios l'aqtaxanaxanecpi. Qataq nachina na qomi' ÿamaqdauec co'olloxochiyi. Ñi Dios ÿataqta sa ÿaÿamaxaden namayipi. Qataq namayipi taÿa da sa ÿalemaxat 'enauac na shiÿaxauapi.

¹⁶ Qaq ÿoqo'oyi naxa da sauoqtaique da sa'aqtaxanaxam da saq judiopi, da yaqto' ividauga nataq'en da qanca'alaxateec, qaq namayipi qomi' sa ÿashinema da shinaqtapeguec. Qaq de'eda 'eetec namayipi maichi nquigaxattauec da lasouaxashit. Qaq ÿoqo'oyi nagui namayipi mashi talec da saqca ca 'en'am nhuaxanaguec mayi chigoqo'ot ñi Dios.

So Pablo nshitaique da qaltaq namaqtega so Tesalónica l'ecpi

¹⁷ Qami' qadqaÿa't, se'eso na'a'q co'ollaq qami' sachigoxosoqtegueta da cada'acolec saq qami' souaqa'agueta. Qaq nai'ctaxa da sa qami' ñaqataxagueta, qalaxayi nachi 'eetai' da 'en'am da qami' souaqta'agueta. Qaq ÿoqo'oyi saqalota da qadyaxa da qaltaq qami' ñauanaxato.

¹⁸ Ÿoqo'oyi huo'o so na'a'q sauoqtaique da soqolaq. Qaq aÿim mayi saqalota da temaq qami' ñoqo'onalo. Qalaxayi so Satanás ÿataqta qomi' nqanaxa't.

¹⁹ Cha'ayi ¿negue'to' ca i'ot da qanaquitaxac, qataq da qantonaxac? qataq ¿negue'to' ca i'ot da qadamaiquiaxac da ñitonaqtapeguec? Taxaaso' nachida da qoñiita que'eca na'a'q qom ñi'iguelaq so qadataxala' Jesucristo.

²⁰ Aja', nachiqami' mayi qau'ochi da qadamaiquiaxac qataq da qantonaxac.