1 Timoteo 6 - Nuevo Testamento Toba Sur

¹ Ca namaxashic sa ishit da huo'otaq sa ÿalaxalec ca n'aco', yaqto' sa ishit da qauem ca n'aqtaguec da l'enaxat ñi Dios qataq dam sapaxaguenataxanaqtapeguec.

² Qaq ca namaxashic da huo'otaq huo'o ca n'aco' 'amqajnataxanaxaic, qalaq sa ishit da huo'otaq sa ÿalaxalec, lamaaxa da da'amqajnataxan. Chaqdata da ÿataqta huelec da lalaxayic, cha'ayi ca do'onataxaatacot, 'eeta'am l'amqajnataxanaxaua, qataq ÿataqta nauochaxaua lqaÿa. Qaq de'eda shiitega ÿataqta 'auapaxaguenataxanec qataq 'au'axat.

Da n'amqajnataxanaxac qataq da namaxayic

³ Da huo'o ca dapaxaguenataxaatapeguec na 'onataxacpi mayi sa lataxac, qataq sa iuona'aguet da napaxaguenataxanaxac no'oita mayi chigoqo'ot so qadataxala' Jesucristo, qataq da qad'amqajnataxanaxac mayi sapaxaguenataxanaqtapeguec,

⁴ que'eca shiÿaxaua chochi n'amqajnaxaic, qalaxayi qaica ca ÿaÿaten. Ÿoqo'oyi lqopitaxat da chochi nmitta'ai da ÿauotaique ncotaxaqui na n'aqtacpi. Qaq de'eda 'eeta'am ca yi'oqchigui lalolaxa. Qaq de'eda nachida da chigoqtapoigui da pa'aguenaxac, cotaxac, nshiunaxanaxac, qataq da qaipettega ca nÿa,

⁵ qataq da loquiaxac qaica ca loga't. 'Eda da 'eetec na shiÿaxauapi mayi mashi sotaq ÿaÿamaq da lauattonaxanaxac, qataq mashi sotaq ÿauatton da 'eesa lataxac. Namayipi ipi'itaxano' da qaÿachigoxottapoigui da yi'oqchigui nsallaxa da n'amqajnataxanaxac. 'Ena na sa ishit da 'anhuoiguet qome.

⁶ 'Eesa mque' da qad'amqajnataxanaxac naigui da nsallaxa, qalaxayi ca shiÿaxaua ÿaÿaten da ntootapeguec catai' hueto'otolec.

⁷ Cha'ayi qomi' sa ishit da huo'o ca ñachoqteec co'ollaq ñanaxa ana'ana 'alhua. Nachi 'en'am da shi'iguelaxasoq, qaica ca qayi'ac.

⁸ Ÿoqo'oyi da huo'o ca qonoq, qataq ca ñapoxoña, qalaq nachiyi ishit da ñitonaqtapeguec.

⁹ Qalaxayi na nshitaique da sallaxanec, sa ishit da nalo'oguet ca ñi'iguenaguec, ivitta'a da 'ico' lpachigui na saqalota lqopitaxanaqtaicpi mayi qaica ca naigui. Namayipi ishit da n'aqchit ca shiÿaxaua, qataq 'ico' iyiiñi naq'en, qataq ividaxatta'a da nlaxajñi.

¹⁰ Cha'ayi da nqopitaxanaqtaic aca yi'oqchigui plata, nachida da 'ico' lpa'a'q na 'enauac ÿotta'a't sa ÿaÿamaxañisat. Cha'ayi mashi huo'o na ime'eguet da lqopitaxanaqtaic anamayi, nachi ÿalatauec da npi'iÿaxac, nachi taigui na ÿotta'a't nque'ejnaxac da nachaalataxac.

Qoÿinapega so Timoteo da n'añaxajlec da lpi'iÿaxac

¹¹ Qalaxayi 'am, 'am lamaxashic ñi Dios, 'auataueguesop 'enauac ne'ena sa ÿaÿamaxañi. Ÿataqta 'anañanot ñi Dios. Qoquetelco' da achaalataxac qui'itta, qataq da npi'iÿaxac, nsoxoyic, nhualaxavic, qataq huosotta da 'adquiyaqteÿaxac.

¹² 'An'añaxajleco' qome da 'adpi'iÿaxac, yaqto' ishit da 'anauec da achaalataxac mayi chochi tateec. Cha'ayi de'eda achaalataxac nachida da huo'o mshi Dios 'am iÿaxana, qataq mashi ime da 'anachaachisop da 'au'axat da 'adpi'iÿaxac, qataq saqalota na 'am ÿauaachigui.

¹³ Qaq nagui qomi' ÿauaachiguilo ñi Dios mayi chigoqtacot da lca'alaxa 'enauacna, nataq'en ñi Jesucristo mayi i'axat da lpi'iÿaxac co'olloxochi qaÿataxaato'ot so nta'a Poncio Pilato. Ÿoqo'oyi nagui 'am shinapega

¹⁴ da 'aualaxalguete naua ÿaqataxaco. Ÿataqta sa ishit da 'auashaxaadeec, yaqto' sa ishit da qauem ca 'an'aqtaguec. Qataq qoquetot de'eda, chochi ivitta'a que'eca na'a'q qom ñi'iguelaq so qadataxala' Jesucristo.

¹⁵ Qom ivita que'eca laloqo', nachi ñi Dios ÿachaxan somayi, cha'ayi ñimayi 'oonolec, 'añaxaic, qataq hueto'ot da namaxayic. Ñimayi mayi lta'a na nta'alpi, qataq lataxala' na nataxala'pi.

¹⁶ Ñimayi mayi chochi tateec, qataq huetaigui na n'edaxa mayi sa ishit da qanhuogou'a. Qaica ca shiÿaxaua ishit da ila'a. Ñimayi mayi hueto'ot da lli'oxoyic qataq da l'añaxac chochi tateec. Aja', nachi 'eetec de'eda.

¹⁷ Qaq camayi hueto'ot da yi'oqchigui nsallaxa, qonapega da sa ishit da n'amqajnaxaic, qataq sa ishit da pe'etega da nsallaxa, cha'ayi damayi saq 'eetai'. Chaqdato' da ÿachito'ot ñi Dios da naquitaxac. Cha'ayi ñimayi mayi nca'altauec, qataq qomi' ÿanema 'enauac na qadhueneguesat, chochaq huañi naq'en, yaqto' ishit da ñitonaqtapigui'.

¹⁸ Qonapega nataq'en da i'ot ca no'on, yaqto' 'ico' lsallaxa da l'onataxanaxac ÿaÿamaqchiguiñi. Qataq qaica ca ÿictega da huo'o ca ÿan da detaunaxanot.

¹⁹ Yaqto' de'eda sa yi'oq lsallaxa ishit da huo'o da naquitaxac naq'en cam ñaq natauo, qataq ishit da nauec ca achaalataxac chochi tateec.

Da pa'ateec nqataxac mayi qoÿami' so Timoteo

²⁰ 'Am Timoteo, ÿataqta 'antelo'o' qome da 'am qaipataxalec n'onataxanaxac. Sa ishito' da 'auqocha'a na ntaxaÿaxacpi lma'na mayi qaica ca naigui, qataq da npa'aguenataxanaxac mayi chigaqaigui da qoÿiitega naÿajnec, qalaxayi saqda.

²¹ Cha'ayi na queueegue de'eda qoÿiitega naÿajnec, nachi ÿashaxaneec da ca'ai naq'en da npi'iÿaxac. Qaq ñi Dios 'am ÿami' qome ca no'on 'iquiaxac. Aja', nachi 'eetec de'eda.