1 Timoteo 4 - Nuevo Testamento Toba Sur

Ca shiÿaxaua da ca'ai da lpi'iÿaxac

¹ Qalaxayi so Espíritu i'axatta'agueta naua natrauo na'axa'te da huo'o qome na ca'ai da lpi'iÿaxac, nachi ca'attegueñi' na saq cha'api tenataxanaxaic, qataq n'axaÿaxaatega da lapaxaguenataxanaxac na lamaxashicpi so shiÿaxaua lma'na.

² Qataq n'axaÿaxaatega na saq ÿataxalec qataq tenataxanaxaic mayi mashi ÿavic da ntounaxac, ÿoqo'oyi sotaq nomguet da i'ot ca ÿaÿamaqchiguiñi.

³ Ne'ena shiÿaxauapi sa ÿashin da nadonaxac, nataq'en huo'o na sa ÿashin nallicpi da qanallic. Qalaxayi ñi Dios i'ot 'enauac na nallic, yaqto' ishit da chictac nam da'amqajnataxan qataq mashi ÿauatton da 'eesa lataxac, da ÿanem da n'achiquiaxac ñi Dios.

⁴ Cha'ayi 'enauac na l'onatac ñi Dios ÿataqta 'onaxaic. Ÿoqo'oyi sa ishit da semaxaÿaxanaqtac, chaqdata da saconaxaguet, qataq sanaqtacot da qan'achic ñi Dios.

⁵ Cha'ayi naua l'aqtaqa ñi Dios da qouagaxaunaxac ishit naq'en da iqui'itaxatta na qanallic.

Ca no'on l'onataxanaxanec so Jesucristo

⁶ Da 'am 'auapaxaguenec na qadqaÿañicpi de'eda shiitega, qaq 'am ÿataqta no'on l'onataxanaxanec so Jesucristo. Qataq 'am i'añaqchi't naua lqataxaco da qad'amqajnataxanaxac, qataq da ÿaÿamaqchiguiñi 'anapaxaguenataguec mayi qoquetalec.

⁷ Qalaxayi sa ishit da 'auqocha'a na chochi n'aqtaxanaxac lma'na qataq qaica ca naigui. Chaqdata da 'anpa'ataxadeelec da qad'amqajnataxanaxac ñi Dios.

⁸ Cha'ayi ca shiÿaxaua da ñi'igueeteguela't da sa desalli naq'en na l'oc, nataq'en cada'acolec da huo'o da naigui. Qalaxayi da qanpa'ataxadeelec da qad'amqajnataxanaxac ñi Dios, ÿataqta huo'o naq naigui. Cha'ayi ÿataqta naigui da 'achiquiaxac da achaalataxac nagui, nataq'en cam ñaq natauo.

⁹ Qaq de'eda ÿataqta 'eesa, sa ishit da qaÿoqolguet.

¹⁰ Qaq nachida da huo'o mshi so'onataxanaqtac qataq ñi'añaxataxaguet da qanshiunaguec, cha'ayi mashi hueto'ot ñi Dios da qanaquitaxac. Ñimayi mayi nca'altauec, qataq nachiñi ñi nshitaique da nca'alaxateec 'enauac na shiÿaxauapi, qalaxayi ca da'amqajnataxan nachica ca qanca'alaxateec.

¹¹ Qaq de'eda shiitega ÿataqta 'auamaxasoxoolec qataq 'auapaxaguenataxanec.

¹² Qataq 'antel-la't, yaqto' sa ishit da 'am qanamattaña, souaxat da ñaq 'am nsoqolec. Chaqdato' da 'am laloqnaxanaxat na 'amqajnataxanaxaicpi souaxat da ÿaÿamaqchiguiñi 'adtaxaÿaxac, qataq da no'on 'iquiaxac, qataq da 'adsoxoyic, qataq da 'adataxac, qataq da 'adpi'iÿaxac, qataq da qui'itta n'aqtaguec da 'anachaalataxac.

¹³ Qom saxanaxa da 'am sovita, qalaxayi qoqueto'ot na naponaxac da 'autaxaÿaxaata'pe naua ñiyigui'shi l'aqtaqa ñi Dios, qataq da 'ai'añaqchit na qadqaÿañicpi, qataq 'auapaxaguen.

¹⁴ Sa ishit da 'anañaxane' da l'onataxanaxac ñi 'anshitaxat mayi 'am ÿami' ñi Dios so na'a'q co'ollaq ÿachanguit añi lquiyaqte na lataxala'pi na 'amqajnataxanaxaicpi da 'am ÿashil-lec.

¹⁵ Qataq qouapegue' de'eda shiitega, ÿataqta 'anañanguet, yaqto' 'enauac qaila'a da 'adañaxataxac.

¹⁶ Qataq 'antel-la't, 'aulotegue da 'adapaxaguenataxanaxac. Ÿataqta qoquetot de'eda shiitega, cha'ayi da 'au'ot de'eda, nachi ÿataqta 'avida'aguet da 'am qanca'alaxateec qataq 'enauac na 'am n'axaÿaxaatega.