1 Timoteo 3 - Nuevo Testamento Toba Sur

Da 'eetec da lataxac na lataxala'pi na 'amqajnataxanaxaicpi

¹ De'eda ÿataqta 'eesa: Da huo'otaq huo'o ca nshitaique da lataxala' na 'amqajnataxanaxaicpi, qalaq ÿataqta ÿaÿamaqchiguiñi 'onaxaic yim tategueu'a n'onataxanaxac.

² Ÿoqo'oyi ca lataxala' na 'amqajnataxanaxaicpi sa ishit da huo'otaq sa ÿaÿamaxañi da n'aqtaguec. Chaqdata da 'oonole naq'en aca lhua, qataq ÿataqta ilotegue da lliquiaxac, nloteec, qataq qaica ca taÿapegueu'a. Qataq ÿataqta nloshiguem, sa ishit da sa ilo'oguet da lÿa da namaxasoxoic. Qataq ÿaÿaten da dapaxaguenataxan.

³ Qataq sa ishit da taxaic, qataq sa ishit da sa lhuanguit da lalemataic. Qataq sa ishit da quetaigui da latenataxanaxac da nmitta'a aca plata. Chaqdata da soxodaic, qataq huo'o da lhualaxavic, qataq sa ishit da chochi naquitta'a aca plata.

⁴ Qataq ÿaÿaten da ilo'ogue da lma'ÿaxac, qataq ÿapaxaguen da lco'oxoc da ÿalaq qataq detelaxanaqta.

⁵ Cha'ayi da huo'otaq sa ÿaÿaten da ilo'ogue da lma'ÿaxac, qaq ¿huá'ago' ca 'eetec da ilo'ogue na i'amaqten ñi Dios?

⁶ Ca nataxala' sa ishit da huo'otaq chita'ague da da'amqajnataxan, cha'ayi sa iuena'a da huo'otaq taigui da n'amqajnaxaic, nachi ishit da que'emaxam qome, qanachi ishit da 'eeta'am da nhuaxanaguec co'olloxochiyi so shiÿaxaua lma'na.

⁷ Nataq'en iuen da no'on da n'aqtaguec naq'en na saq 'amqajnataxanaxaicpi, yaqto' sa ishit da sa qaÿauo'o ca 'enec qanqoÿin, yaqto' sa ishit da ilamqa'aguet ca lqoinaxanaxac so shiÿaxaua lma'na.

Da 'eetec da lataxac na ltauapi ca nataxala'

⁸ Nachi 'eetec nataq'en na ltauapi ca nataxala' iuen da no'on da n'aqtaguec, qataq sa ishit da ÿatenachit da l'aqtac. Qataq sa ishit da taxaic, qataq sa ishit da quetaigui da latenataxanaxac da nmitta'a aca plata.

⁹ Nataq'en ÿauattoota ca saq cha'a ltaxac da qadpi'iÿaxac, qataq da lavilÿaxac ÿaÿamaqchiguiñi.

¹⁰ Nataq'en iuen da hua'auñi qaÿi'iguen. Qaq da ime da qaica ca sa ÿaÿamaxañi n'aqtaguec, nachi ishit da ltaua qanqoÿin ca nataxala'.

¹¹ Aca 'alo nataq'en iuen da no'on da n'aqtaguec, qataq sa ishit da n'aqtaqa l'o'. Chaqdata da sa daÿactac, qataq ipactelec 'enauac da l'onataxanaxac.

¹² Ca ltaua ca nataxala' ÿataqta 'oonole aca lhua naq'en, qataq ÿaÿaten da ilo'ogue da lco'oxoc qataq da lma'ÿaxac.

¹³ Cha'ayi ca ltaua ca nataxala' da 'onaxaic da l'onataxanaxac, nachi camayi ivitta'a da huo'o da lli'oxoyic, qataq sa ishit da ñi'ilec da i'axattac da lpi'iÿaxac mayi ÿachigoxoto'ot so Cristo Jesús.

Ca saq cha'a lataxac da qad'amqajnataxanaxac

¹⁴ Huo'o da iyaxa da 'am ñauane'. Qalaxayi 'am samaxa ana'ana ÿide,

¹⁵ yaqto' da aÿim lcopata'aguet, qalaxayi mashi lhuotta da 'auaÿaten ca no'on n'onataxac ca 'oonolec na llalaqpi ñi Dios, mayi qoÿinac, nachina na 'amqajnataxanaxaicpi nam i'amaqten ñi Dios mayi ÿataqta nca'altauec. Namayipi nachina na nllitañi da 'eesa lataxac, qataq 'ico' lcopaqtaxat.

¹⁶ Qaq sa ishit da qaÿoqolguet de'eda saq cha'a lataxac da qad'amqajnataxanaxac, cha'ayi ÿataqta lta'adaic da lli'oxoyic: Ñi Dios nachaxan, qalaxayi nachida da yi'oqchigui lapachiyaxac na shiÿaxauapi; qaq da n'aqtaguec co'ollaq i'axat so Espíritu ÿataqta 'en da no'on shiÿaxaua, qaq ÿauaachigui somayi 'enauac na chigaqshiguem Dios lamaxashicpi. Qataq qai'axatem 'enauac na ÿotta'a't shiÿaxauapi, ÿoqo'oyi huo'o na i'amaqten na 'enauac ÿallippi nam huetalecna. Ime, qaq qaÿaueegue da piguem.