1 Timoteo 2 - Nuevo Testamento Toba Sur

So Pablo dapaxaguenataxanec da qouagaxaunaxac

¹ Qaq da hua'auchiguiñi i'aqtac 'eeta': Ñishitaique da saqata da qanayictot da qouagaxaunaxac, da qanqouagaxaueelec 'enauac na shiÿaxauapi, da qanqouagaxaunot ñi Dios, nataq'en da qoÿanot da 'achiquiaxac.

² Nataq'en ñishitaique da qanqouagaxaueelec na nta'alpi mayi lta'adaicpi qataq 'enauac na ltauapi, yaqto' da qanachaalataxac qaica camachaqca. Nda'a't da qadamachiguiñi, selagaqtapiguiñi, cha'ayi ÿataqta ñañanqot ñi Dios, qataq no'on da qanmejnaguec.

³ Qaq de'eda qouagaxaunaxac ÿataqta 'eesa lataxac, ÿaÿamaxadeeta ñi Dios mayi qadca'alaxaqui.

⁴ Cha'ayi ñimayi nshitaique da 'enauac qanca'alaxateec na shiÿaxauapi, qataq ividaxatta'a da ÿaÿateeta da lataxac mayi ÿataqta 'eesa.

⁵ Cha'ayi 'oonolec ñi Dios, nataq'en 'oonolec so shiÿaxaua mayi ishit da ÿi'iguelaxateguet da nmane' naq'en ñi Dios na shiÿaxauapi. Somayi l'enaxat Jesucristo.

⁶ Somayi nañanguet da qaÿalauat, qaq de'eda nalaataguec naigui da ishiiten aso lashiue da lca'alaxa na 'enauac shiÿaxauapi. Qaq de'eda co'ollaq ivita so laloqo', nachi jec da qai'axateec.

⁷ Ÿoqo'oyi ñi Dios aÿim ÿanagui da aÿim l'aqtaxanaxanec qataq lamaxashic, da sapaxaguen na saq judiopi, da sapaxaguenec da npi'iÿaxac qataq da lataxac mayi ÿataqta 'eesa. Da i'aqtaxanaxac ÿataqta 'eesa, sa ishit da aÿim tenataxanaxaic, cha'ayi sa'amaqten so Cristo.

⁸ Ÿoqo'oyi ñishitaique da 'enauac na ÿallippi da nqouagaxauen, qalaq ÿachaxaatrashigue'm naua lhua'q. Qalaxayi ÿataqta iqui'itaxatte' naua lquiyaqte, sa ishit da huetacot ca lalemataic, huo'otaq da ncotatague' ca lÿa.

⁹ Nataq'en ñishitaique da na 'alpi ÿataqta ÿaÿamaxatta da n'otaxac, qataq ÿaÿaten da ntel-la't, sa ishit da ñi'oxonnaxai. Yaqto' 'ique' n'otaxat da ÿaÿamaqchiguiñi 'onataxac. Sa ishit da nachida da yi'oqchigui da huo'otaq i'ot na laue, huo'otaq ca 'otaxat chigaqaigui na oro huo'otaq perlas, huo'otaq ÿauo'o aca lapoto da saqaÿoqteu'a naq'en.

¹⁰ Chaqdata da i'ot ca ÿaÿamaqchiguiñi, yaqto' 'ique' n'otaxat. Cha'ayi nachida da 'eetec aca 'alo da quetague' ñi Dios.

¹¹ Nataq'en ñishitaique da na 'alpi ÿataqta ñi'imaxatta da n'axaÿaxana da napaxaguenataxanaxac. Sa ishit da sa n'axaÿaxan.

¹² Cha'ayi sa ishit da sashinem aca 'alo da dapaxaguenataxan da huo'otaq huetaigui ca naponaxac. Qataq sa ishit da napacapeguelec ca shiÿaxaua. Chaqdata da ñi'imaxatta.

¹³ Cha'ayi ñi Dios hua'auchiguiñi i'ot so Adán. Qaq co'ollaq ime, nachi i'ot aso Eva.

¹⁴ Qaq so Adán sa ishit da nachiso so qaÿatenachit. Chaqasota aso Eva mayi qaÿatenachit. Qaq co'ollaq qaÿatenachit, nachi huo'o da lasouaxashit.

¹⁵ Qalaxayi aca 'alo ishit da qanca'alaxateec da ÿataqta huelec da ntela'a da lco'oxoc, qataq quetot da lpi'iÿaxac qataq da lsoxoyic, qataq ÿataqta iqui'itaxatta da nachaalataxac, qataq ntel-la't.