1 Pedro 5 - Nuevo Testamento Toba Sur

Da nqataxac na 'amqajnataxanaxaicpi

¹ Nagui saqatalo qami' lataxala'te na 'amqajnataxanaxaicpi, cha'ayi nachi shin'ama qami' aÿim nataxala', qataq sauaachigui 'enauac na nque'ejnaxaguesat so Cristo, qataq nachi shin'ama qami' ñiuanau'a ca ñi'oxoyic mayi ñaq natai' da qaÿachaxan.

² Da ÿaqataxac 'eeta': Ÿataqta qauloÿigue qome na 'amqajnataxanaxaicpi mayi qami' ipataxalguete ñi Dios da qauloÿigue. Qau'enaxachiichigui cam ilotague' aca qagueta. Ÿataqta qanpa'ataxayiñiilec, cha'ayi nachida da 'eetapeguec ñi Dios. Sa ishit da chochi qami' qaÿamaqta'pe, qataq sa ishit da chochi qanaquichiita'a aca plata. Chaqdata da ÿataqta qanasapachiitelec da qad'onataxanaxaqui.

³ Qataq sa ishit da qami' maxasoxonaxaiqa da qami' qauamaqaitac nam qami' qaipataxalguete 'amqajnataxanaxaicpi. Chaqdato' da qami' laloqnaxanqa'te namayipi,

⁴ yaqto' qom ivita da ñi'iguelaq som ilotague' 'enauac na lataxala'pi na 'amqajnataxanaxaicpi, nachi qami' qauacoñiiguet aca qanshiitenaqchi mayi saqca ca 'en'am da lyac, saq 'en'am aca lshiitenaxanaqte ca shiÿaxaua mayi ishit da daqaqtañi, 'eeta'am ana laue ca qo'ipaq.

⁵ Qaq nachi 'en'am nataq'en qami' nsoxotpi ÿataqta qaualaqaiguet qome ca 'enapec na ÿi'axaiquipi. Qataq 'enauac na shiÿaxauapi iuen da ñi 'oonolec ÿataqta nañanguet da ÿalaxaguet ca lÿa qataq sa n'amaqten. Cha'ayi naua ñiyigui'shi n'aqtaqa 'eeta': Ñi Dios nachaata'aguet ca n'amqajnaxaic, qalaxayi nqouaguec da itauan ca sa n'amaqten.

⁶ Qaq ÿoqo'oyi sa ishit qome da qan'amaqchiñi, ÿataqta qanañañiÿot da lhuaqÿaxac ñi Dios mayi qaica ca ÿaqalanapec, da yaqto' ñimayi qami' nauaxaÿaxaayishigue'm qom ivita ca na'a'q mayi laloqnec.

⁷ Qataq 'enauac na qauennachiitapega ÿataqta qaumachiÿo'ot ñi Dios, cha'ayi ñimayi ÿataqta qami' ÿoqocha'alo.

⁸ Qataq ÿataqta qanaÿajnaxanaqchiñi, qataq qanloiteec, cha'ayi so qami' ipa'agueeta'pe shiÿaxaua lma'na coleetac, nmittaique ca loxonec, 'eeta'am ca quiyoc da desoqtac.

⁹ Qalaxayi ÿataqta qanachaachiÿa'aguet, qataq sa ishit da qai'axañiiuec da qadpi'iÿaxaqui, cha'ayi qami' qauaÿajñiitac da 'enauac na qad'amqajnataxanaxauaipi mayi neta'alo naua lÿa't 'ale'u nachi nque'etaxanaxac de'eda.

¹⁰ Qalaxayi qom ime da qami' cada'ac da huo'o da qanque'ejnaxaqui, nachi ñi Dios ÿataqta qami' nalochiyiñi naq'en, qataq qami' qadamchiyiñi, qataq qami' 'añaxaiqa, qataq qaica ca qami' ÿayigo't. Cha'ayi nachiñi ñi Dios ñim qomi' ÿanema da qanchoxonnataguec, qataq qomi' iÿaxanalo da ñiuanaqhua'a naq'en da lli'oxoyic mayi chochaq tateec, qataq da ñi'adaqtau'a so Jesucristo.

¹¹ Qaq ñimayi mayi lalamaxat da lli'oxoyic qataq da l'añaxac mayi chochaq tateec. Aja', nachi 'eetec.

Da pa'ateec nquinaxanaxac

¹² Qaq ana ÿide mayi shiyiñi da qami' samaxalo, chigoqchigui da ÿiyiñi ñaq'en ñi Silvano ñim ÿaqaÿa mayi ÿataqta ipe'et. Da qami' saqatalo qataq da ÿoqta 'eesa ñaq'en da qanchoxonnataguiiqui mayi qauacoñiiguet, qaq damayi nachida da ÿoqta 'eesa naq'en da lauotaxanaqtaic ñi Dios. Qaq damayi ÿataqta qoquiitelec qome.

¹³ Qaq nam 'amqajnataxanaxaicpi mayi netaña na Babilonia, nam lca'aguishicpi ñi Dios mayi 'eeta'am da qoñiita, namayipi qami' ÿamaxalo da lquinaxanaxac, qataq nataq'en ñim 'eeta'am da ÿalec Marcos.

¹⁴ Qaq ñi 'oonolec qome da qoñiita ÿataqta napigoq ca lÿa da nquine', qataq ÿataqta qanchoxonñiÿa't. Qataq ñi 'oonolec da qoñiita ÿaconguet qome da nlagaxayic, nam mashi lalamaxatpi so Jesucristo. Aja', nachi 'eetec.