1 Pedro 4 - Nuevo Testamento Toba Sur

Ñi 'oonolec iloteguet ca nshitaxat mayi ÿanem ñi Dios

¹ Qaq ÿoqo'oyi de'eda 'eetec da so Cristo huo'o da nque'ejnaxac da l'oquiaxac, qami' nataq'en sa ishit da huo'o ca qai'iquiitega da qanque'etaxañi. Cha'ayi cam huo'o da nque'ejnaxac da l'oquiaxac, camayi ca'ai da ñi'itaxaloxo,

² da yaqto' cam taÿa'ague da qanachaalataxaqui, qanachaachiitaigui cam 'eetapeguec ñi Dios, nachi sa ishit da qau'ochi ca 'eetapeguec da qadapachiyaxaqui.

³ Cha'ayi mashi 'eeso'oya' da soua hua'a'u vi'iyi da qau'ochiitac nam nqopita nam sa ishit da ÿauatton ñi Dios. Se'esoua vi'iyi qami' qoviitaigui nam namanaxanaqtaiguesat, qauem qoÿiitapegueguesat, ntaxa, qataq nam nqui'axaguesat, qataq ÿomaxac chochaq tateec, qataq qanatamñiitacot na nqolacpi mayi sa qaÿashin.

⁴ Qaq namayipi ÿataqta nhualeguet da qami' sa ishit da qaualliquiitau'a nam chochaq tateec qauem mayi i'ottac. Qaq ÿoqo'oyi namayipi sa qami' iyacna'pe da qami' detaxaÿalo.

⁵ Qalaxayi namayipi taÿa'a da i'axatem 'enauac nam i'ottacpi ñim Dios mayi mashi naÿamaxattai' da nmit nam lasouaxashitpi na shiÿaxauapi mayi nca'altauecpi qataq nam mashi saqcapi.

⁶ Cha'ayi nam mashi ileu, qalaq ivida'a da qai'aqtaxanem da n'aqtac, yaqto' da nachaalataxac saq cha'a ishit da nca'altauec da 'eeta'am da nachaalataxac ñi Dios. Qaq nai'ctaxa da co'ollaq huetalec ana 'alhua, qaq sogote da qanmit da 'eeta'am 'enauac na shiÿaxauapi.

⁷ Qaq mashi nayiita'a yi loga't 'enauacna. Qaq ÿoqo'oyi ÿataqta qanloiteec qome, qataq ÿataqta sa qauasaguiyii da qanqouagaxauñiitac.

⁸ Qalaxayi ÿataqta ÿacteec qome qanqashiñi da qalota da qadsoxoyiqui, cha'ayi da nauotaxanaqtaic i'oteu'a da ÿataqta qalota na nasouaxashitpi qaÿapalaxat.

⁹ Qataq ñi 'oonolec da qoñiita ÿataqta ilo'oguet ca lÿa da namaxasoxoic, qataq sa ishit da quetapeguelec.

¹⁰ Qataq ñi 'oonolec ÿataqta iloteguet ca nshitaxat mayi ÿanem ñi Dios da do'onataxaalec na laÿipi, qoñiita'am ca ÿataqta ÿaÿaten da ilo'ogue na ÿotta'a't lachitaqtaxanaxatpi ñi Dios.

¹¹ Da huo'o ca qoÿanem da da'aqtaxan, qalaq naua l'aqtaqa ÿataqta nachinaua naua l'aqtaqa ñi Dios. Qataq ca qoÿanem da l'onataxanaxac, qalaq nachida da n'añaxac mayi ÿanem ñi Dios. Qaq 'enauac nam qaÿacoolec da qai'ot, namayi naigui da yaqto' qaÿi'oxoden ñi Dios, chigoqchigui so Jesucristo. Somayi mayi lalamaxat da lli'oxoyic qataq da l'añaxac mayi qaica ca loga't. Aja', nachi 'eetec.

Da que'ejnaxac souaxat da qanayictague' so Cristo

¹² Qami' ÿaqaÿadolqa, sa ishit qome da qadhualliÿa'aguet nam sa nsatta qañi'iguenataguiiqui mayi qami' novitalo da 'eeta'am da huo'otaq qami' huanguilo cam ÿapacteec sa ishit da qaÿauanapigui.

¹³ Qaq chaqdato' qome da ÿataqta qauamaichiguiñi da qami' qanhuañiÿau'a na nque'ejnaxacpi so Cristo, yaqto' ÿataqta qami' nlaqchiguilo da qantonaxaqui qom qaualoÿa'a da lli'oxoyic qom ivita da ñi'iguelaq somayi.

¹⁴ Da huo'otaq qami' qaishiueeta'pe souaxat so Cristo, qalaq ÿataqta qami' machiyiñi, cha'ayi som qaica ca 'en'am da lli'oxoyic n'Espíritu ñi Dios qami' hueta'agueta. Namayipi ÿataqta sa iyacnapec da detaxaÿa so Cristo, qalaxayi qami' ÿataqta qavi'oxoyiñi somayi.

¹⁵ Qaq da huo'o ca 'oonolec da qoñiita da huo'o da nque'ejnaxac, qalaxayi sa ishit qome da souaxat da laataxanaxaic, huo'otaq cachaxaic, huo'otaq cam i'ottac na qauem, qataq tatapegueu'a ca sa lalamaxat.

¹⁶ Qalaxayi cam huo'o da nque'ejnaxac souaxat da quetague' so Cristo, qaq no'on da camayi sa ishit da ncoqtac. Chaqdata da ÿi'oxoden ñi Dios, souaxat da quetague' somayi.

¹⁷ Cha'ayi mashi ivita yi laloqo' da qai'auaxaachiguiñi da qanmit ñi 'oonolec nam llalaqpi ñi Dios. Qaq da qai'auaxaachiguiñi da shinaqta, qaq ¿chaxan 'eetec qome ca loga't nam sa ishit da ÿalaxaguet da l'aqtac ñi Dios?

¹⁸ Cha'ayi nam no'on da lataxac da ÿataqta huo'o da lqalaic da qanca'alaxateec, qaq ¿chaq huá'ague ca 'eetec ca lataxac na qauemaicpi qataq 'itaxaloxoicpi?

¹⁹ Qaq ÿoqo'oyi ca maichi chigoqchigui ñi Dios da huo'o naq'en da nque'ejnaxac, qaq no'on da camayi quetot da i'ottac ca ÿaÿamaqchiguiñi. Chaqdata da ipa'axano'ot naq'en ñi Dios da nachaalataxac mayi maichi l'onatac, cha'ayi ñimayi ÿataqta ipacchigui ca 'enapec.