1 Pedro 3 - Nuevo Testamento Toba Sur

Da 'eetec da lataxac caua namoxo'u

¹ Nachi 'eetec nataq'en qami' 'alpi mayi mashi qauadoñi. Añi 'oonole da qoñiita ÿataqta nañanguet da ÿalaxaguet ca lalamaxat lhua, yaqto' da huo'o ca 'oonolec namayipi da huo'otaq saxanaxa da i'amaqten da n'aqtac, nachi ishit da da'amqajnataxan, souaxat da ÿauaachigui da no'on 'an'onataxac. Nachi nai'ctaxa da sa ishit da 'au'aqtaxanem camayi,

² qalaxayi souaxat da ila'a da no'on 'adataxac da 'aualaxaguet ñi Dios.

³ Qataq da n'otaxac añi 'oonole sa ishit qome da nachida da yi'oqchigui da ileguemaxachigui da napicnaxac, huo'otaq da ÿaañi ca 'otaxat mayi chigaqaigui na oro, huo'otaq da ÿacteec naq'en da lyac aca lapoto.

⁴ Chaqdato' da ÿaañi ca saq cha'a 'otaxat mayi chochaq tateec da lyaquiaxac. Huosotta naq'en da lataxac qataq qaica camachicague't. 'Eda mayi ÿataqta huo'o naq 'enec naq'en ñi Dios.

⁵ Cha'ayi 'eda da 'eetec naq'en da naÿamaxataxac co'olloxochiyi so hua'au 'alpi mayi nañanot da quetague' ñi Dios. Asomayipi pi'iÿa'a ñi Dios, qataq nañanguet da ÿalaxaguet so lamoxouapi.

⁶ 'Eda da 'eetec aso Sara co'ollaq ÿalaxalec so lhua Abraham. Ÿoqo'oyi asomayi da iÿaxana, qalaq 'eeta': “'Am ÿataxala'.” Qaq qami' nagui qaviyiita'a da qoñiita'am asomayi, lamaaxa da ÿataqta qau'ochi ca ÿaÿamaqchiguiñi, qataq sa ishit da huo'o ca qayi'iitaique.

⁷ Qaq nachi 'eetec nataq'en qami' ÿallippi mayi mashi qauadoñi. Ñi 'oonolec ÿataqta naÿajnaxanaqchin da ilo'ogue da lhuaÿaxac, qataq sa ishit da ÿi'inai', cha'ayi ÿaÿaten da acamayi saqalligueme da l'añaxac, qalaxayi nataq'en nhuanau'a da nca'alaxa mayi chigoqchigui da lqouagaxanaqtaic ñi Dios da qami' ÿanema. Qaq 'eda qome da qoñiitec, yaqto' da qanatamnaxaqui saqca ca nqanaxat.

Nam huo'o da nque'ejnaxac souaxat da i'ot ca no'on

⁸ Qataq iuen da 'enauac da qoñiita ÿataqta 'oonolec da qadhuennataqai, qataq qauchoxoyiñi ca huo'o ca huetapoigui qadÿai. Ñi 'oonolec ÿataqta ÿauotec ca lÿa, 'eeta'am naq'en ca maichi lqaÿa. Qataq ÿataqta qami' choxonnataxanaxaiqa, qataq sa ishit da qami' napagaqnaxaiqa.

⁹ Qataq sa ishit da qavi'iguelaxachiÿa'aguet ca sa ÿaÿamaxañi, qataq ca qanshiunaguiiqui. Chaqdata da qai'añiim ca no'on ca shiÿaxaua, cha'ayi ñi Dios qami' iÿaxanalo, da yaqto' qauacoñiiguet da lqouagaxanaqtaic.

¹⁰ Cha'ayi naua nanettrañi l'aqtaqa ñi Dios 'eeta': Ca nshitaique da ÿauotec da nachaalataxac qataq machiguiñi 'enauaque naua na'axa'te mayi quetaiguilo, qaq no'on da ntela'a ñi lachaxat, da yaqto' sa nasaxauec ca qauem, qataq na alap sa ishit da nauoigui naq'en ca natenataxanaxac.

¹¹ Qataq no'on da ÿaxanapec ca sa ÿaÿamaxañi. Nda'a't da i'ot ca ÿaÿamaqchiguiñi, qataq nmitaique ca nlagaxayic, qaq nachica quegue.

¹² Cha'ayi ñi qadataxala' ÿataqta ntela'a cam i'ot ca ÿaÿamaqchiguiñi, qataq hua'axaÿa da nqouagaxaunaxac, qalaxayi ñimayi sa ishit da iuoten cam i'ottac ca sa ÿaÿamaxañi.

¹³ Qaq ÿoqo'oyi ¿negue'tom ca ishit da qami' i'oteque ca sa ÿaÿamaxañi, da huo'otaq nachi 'eetai' da qau'ochiitac ca ÿaÿamaqchiguiñi?

¹⁴ Qaq nai'ctaxa da huo'otaq huo'o da qanque'ejnaxaqui souaxat da qui'itta qanachaalataxaqui, qalaxayi ÿataqta qami' machiyiñi. Qataq sa ishit da huo'o ca qayi'iitega, qataq saq qami' qaicolanaqchi't.

¹⁵ Chaqdata da ÿi'oxoden da qadquiyaqteÿaxaqui so Cristo som qadataxala'ai. Qataq qami' lhuotte' da qau'aqtaxañiim 'enauac cam ichimaxattega da qadpi'iÿaxaqui, qalaxayi sa ishit da qami' napagaqnaxaiqa, qataq huo'o naq 'enec qanqashiñi que'eca shiÿaxaua.

¹⁶ Qataq ÿataqta qan'onaxachiila't, yaqto' da qadvilÿaxaqui ÿataqta machiguiñi, yaqto' nam sa iyacnapec da detaxaÿa da no'on qadataxaqui, souaxat da qau'amaqchiñiitac so Cristo, namayipi ishit da maichi n'aloxon souaxat naua maichi l'aqtaqa.

¹⁷ Cha'ayi ÿaÿamaqchiguiñi da qami' qanque'etaxañi, souaxat da qau'ochiitac ca ÿaÿamaqchiguiñi, da huo'otaq ÿaÿamaxadeeta ñi Dios. Qaq saq 'en'am da qai'ottac ca sa ÿaÿamaxañi.

¹⁸ Cha'ayi so Cristo nataq'en mashi ime da qomi' ileualguete souaxat na qadasouaxashitpi. Somayi no'on da lataxac, qalaxayi huo'o da nque'ejnaxac, souaxat qomi' mayi qomi' qauemaiqa, da yaqto' qomi' ÿauegueu'alo ñi Dios. Somayi co'ollaxa ileu da yi'oqchigui l'oquiaxac, qalaxayi qaltaq ÿi'iguelaxalec da nca'aleec, qalaxayi saq cha'a.

¹⁹ Huaña, nachi da saq cha'a nachaalataxac nqo'ooña da da'aqtaxanem da nca'alaxa som nqui'ipi mayi qaicoñittai'.

²⁰ Somayipi nachiso so sa ishit da ÿalaq som hua'a'u vi'iyi mayi huetaiguilo so Noé, co'ollaq ñi Dios huo'o da lhualaxavic da iuatta'a da qai'attega't aso notaxaqui, co'ollaq vichigui da 'oocholqa soua shiÿaxa'u mayi nca'aleeguesopa so 'etaxat.

²¹ Qaq se'eso 'etaxat nachiso so naigui da achilaxac mayi chigoqchigui da qomi' qanca'alaxatreec nagui. Qaq de'eda achilaxac, damayi sa ishit da chigoqchigui ca nÿoxoc da qad'oquiaxac, cha'ayi chaqdata da qaiÿaxanot ñi Dios da ÿan ca nvilÿaxac qui'itta. Nachi ishit da qomi' nca'alaxatreec de'eda achilaxac, chigoqchigui naq'en da 'eetec co'ollaq qaltaq qanca'alaxateeguesop da nleuaxa so Jesucristo,

²² som taigue da piguem, nachi nso'oota'ague da aloic ñi Dios da ÿamaqpec na namaxashicpi piguem l'ecpi qataq na damaxasoxonapecpi qataq na n'añaxacpi.