1 Pedro 2 - Nuevo Testamento Toba Sur

¹ Qaq ÿoqo'oyi no'on qome da qai'axañiiuec 'enauac na ÿotta'a't sa ÿaÿamaxañisat. Sa ishito' da qauatenataxañiitac, qataq sa ishit da dos naua qoquiitagueto, qataq sa ishit da qaupa'aguiñiitac ca qadÿai, qataq sa ishit da qami' n'aqtaqa l'o'.

² Qami' qoñiita'amo' ca nogotolec chita'ague da ñiguiñi da ÿataqta qansoxochi da l'aqtac ñi Dios mayi 'eeta'am ca ÿataqta ndoteec lchi' aca nate'e, yaqto' damayi qami' nañaxa't naq'en, qataq qami' ividaxata'alo da qanca'alliiuec.

³ Lamaaxa qom ÿataqta qauaÿajñiita da so qadataxala' ÿataqta soxodaic.

So Cristo 'eeta'am ca coma' mayi ÿataqta nca'altauec

⁴ Qaq ÿoqo'oyi qanquiquiu'a qome so qadataxala' Jesús som 'eeta'am ca coma' mayi ÿataqta nca'altauec. Se'eso coma' l'otanec co'olloxochiyi na shiÿaxauapi, qalaxayi ñi Dios lca'aguishic qataq ÿataqta lauotaxat.

⁵ Nataq'en qami' qoñiita'am qome ca coma' mayi ÿataqta nca'altauec, qataq ÿataqta qanañañiÿot ñi Dios, da yaqto' qami' do'onataxanalo da n'oxooshiguem aca maichi l'onaxanaxaqui mayi saq cha'a, qataq da ÿauo'oi qami' ltaxaÿaxanaxanqa naq'en na shiÿaxauapi da qan'aqtaxañi' ñimayi, qataq nshitaique da qai'añiitacot aca maichi qadachitaqtaxanaqchi mayi saq cha'a, qaq acamayi ÿataqta ÿaÿamaxadeeta ñimayi, cha'ayi huo'o da qadpi'iÿaxaqui so Jesucristo.

⁶ Cha'ayi naua ñiyigui'shi l'aqtaqa ñi Dios nataq'en 'eeta': Aÿim sanangui na laiñi yi Sión ca 'eeta'am ca coma' mayi nllañi ca noÿic; camayi llica'aguishic qataq ÿataqta ÿauotaxat. Qaq ca i'amaqten camayi, qaq sa ishit da n'aloxootac.

⁷ Qaq qami' mayi qau'amqajnataxañi, nachi que'eca coma' ÿataqta huo'o qanqashiñi da lli'oxoyic; qalaxayi nam sa ishit da da'amqajnataxan, nachi ipacchiguilo naua ñiyigui'shi l'aqtaqa ñi Dios mayi 'eeta': Som coma' mayi ÿalateec co'olloxochiyi nam noÿic l'opi, somayi nachiso nagui so nllañi ca noÿic.

⁸ Qataq nataq'en yi lÿa nanettañi l'aqtac ñi Dios 'eeta': Se'eso coma' ishit da qaiqui'aqaisop, qataq qaisallilec. Qaq namayipi qui'aqañi souaxat da sa ishit da i'amaqten de'eda n'aqtaxanaxac. Qaq ñi Dios nataq'en nachi 'en'ac naq'en namayipi.

Nam lalamaxatpi ñi Dios

⁹ Qalaxayi qami' ÿataqta qami' lca'aguishicpi ñi Dios, qataq qami' ltaxaÿaxanaxanecpi naq'en na shiÿaxauapi da qan'aqtaxañi' ñimayi mayi qadta'a, qataq qami' qui'itte' naq'en, qataq qami' lalamqa'te. Qaq de'eda 'eetec ñimayi, nshitaique da qami' qau'axachi na l'onataxanaxacpi mayi ÿi'oxodaq, ñim qami' ÿachigoxottoiguilo na napalaxa, da yaqto' qaunoxoñiu'a da l'edaxa mayi qaica ca 'en'am da lli'oxoyic.

¹⁰ Qami' co'ollaxa sa ishit da qami' lalamqa'te ñi Dios, qalaxayi nagui qalaq ÿataqta qami' lalamqa'te. Co'ollaxa qaica da huo'o ca qami' ichoxodeeta'pe, qalaxayi nagui ñimayi ÿataqta qami' ichoxode'n.

Ÿataqta qau'onataxañiÿot ñi Dios

¹¹ Qami' ÿaqaÿadolqa, qami' mayi qoñiita'am ñaqshin ca sa ishit da nqajlec ca lañoqo', qami' ñachoxodeetoiguilo da sa ishit qome da qauauo'oi ca ldaqa' ca 'eetapeguec da qadapachiyaxaqui mayi iloquiaxaatac da qanachaalataxaqui.

¹² Qaq ÿataqta no'on qome qanqashiñi da qadataxaqui da qoñiitangui nam sa ÿauatton ñi Dios. Qaq yaqto' namayipi ishit da ila'a cam ÿaÿamaqchiguiñi qau'ochiitac, nachi ishit da ÿi'oxoden ñi Dios qom ivita ca na'a'q da ñimayi nmitna, qaq nai'ctaxa nagui da qauema naua ltaxaÿaxaco da qami' detaqtegalo, qalaq 'eeta'am naq'en ca qalota na ÿasouaxat.

¹³ Qaq souaxat da qauauochiic so qadataxala', nachi qami' iuen da ÿataqta qaualaqaiguet 'enauac na nta'alpi mayi ÿanashiguem na shiÿaxauapi, lamaaxa ca nta'a mayi ÿataqta ÿaquitchiguem,

¹⁴ huo'otaq na nta'alpi mayi lamaxashicpi camayi, da yaqto' ÿauo'o ca nhuaxanaguec cam i'ottac ca sa ÿaÿamaxañi, qataq da ÿi'oxoden cam i'ot ca ÿaÿamaqchiguiñi.

¹⁵ Cha'ayi ñi Dios nshitaique da qami' qau'ochi ca ÿaÿamaqchiguiñi, yaqto' qaica ca llic naq'en ca l'aqtac nam qaica ca ÿaÿajnapec qataq 'oopaicpi.

¹⁶ Qami' qoñiita'amo' qome ca shiÿaxaua ÿataqta huesochiguiñi, qalaxayi sa ishit da qau'ogoxoñiÿa da qami' huesochiyiñi da qau'ochi ca sa ÿaÿamaxañi. Chaqdato' da qoñiita'am da ÿataqta qami' l-lataqa ñi Dios.

¹⁷ Qaica qome ca qadapaquiÿalec 'enauac na shiÿaxauapi. Qataq ÿataqta qauauochiic na qad'amqajnataxanaxauaipi, qataq ÿataqta qayi'iÿai ñi Dios, qataq qaualaqaiguet ca nta'a mayi ÿataqta ÿaquitchiguem.

Qailolec da nque'ejnaxac so Cristo

¹⁸ Qami' namaxashicpi, ÿataqta imauec qome da qaualaqailec na qan'aco'oipi, lamaaxa da soxodaicpi qataq ichittac ca shiÿaxaua, qataq nachi 'en'am da yiloxoic.

¹⁹ Cha'ayi ÿataqta ÿaÿamaqchiguiñi ca shiÿaxaua da n'añaxateguet na nque'ejnaxaguesat mayi chochi qai'otec, souaxat da lhuennataxa ñi Dios.

²⁰ Cha'ayi da huo'otaq qami' qau'ochi ca sa ÿaÿamaxañi, nachi qaÿauo'o ca qanhuaxanaguiiqui, qaq ¿négue't ca naigui da huo'otaq qanhualaxauñi da qan'añaxachiiguet damayi? Qalaxayi da huo'otaq qanque'etaxañi souaxat da qau'ochiitac ca ÿaÿamaqchiguiñi, nachi ÿataqta qanhualaxauñi da qan'añaxachiiguet, qaq damayi ÿataqta ÿaÿamaqchiguiñi, ÿaÿamaxadeeta ñi Dios.

²¹ Cha'ayi nachida da huo'o mshi qami' iÿaxanalo ñi Dios. Cha'ayi so Cristo huo'o da nque'ejnaxac souaxat da qoñiita, da yaqto' qomi' ishit da qauloilec somayi, qataq qoquiitelec da lliquiaxac.

²² Somayi sa ishit da huo'o ca lasouaxashit, qataq sa ÿauango' da huo'o ca ÿatenachit.

²³ Qataq co'ollaq qaishiueetac, qalaq sa ishit da ÿi'iguelaxata'aguet da nshiunaguec, qataq co'ollaq qaÿauo'o da nque'ejnaxac, qalaq sa ishit da dadenaxaatac. Chaqdata da ipa'axano'ot ñi Dios mayi sa ishit da depe'enaxan da nmit ca nasouaxashit.

²⁴ So Cristo nque'etaxangui 'enauac na qadasouaxashitpi da nachishiguem co'ollaq qaiuaxanguet so npe'enaxaqui, yaqto' qomi' soqolqa'ai da ñi'itaxaloxo, ime, qaq soqolaxague da qui'itta achaalataxac. Na nhuaxanecpi somayi co'ollaq qaiuaxaatalec, nachina na naigui da qami' qanatade'n.

²⁵ Cha'ayi qami' co'ollaxa qoñiita'am aca qaguetapi mayi isomtac, qalaxayi nagui da qavi'iguelaqaÿa so Cristo mayi ishit da qami' ntela'alo da 'eeta'am ca qagueta l'o, qataq ilo'ogue da qanachaalataxaqui.