1 Pedro 1 - Nuevo Testamento Toba Sur

So Pedro ÿamaxa aso lede so 'amqajnataxanaxaicpi mayi nlagaxattac

¹ Aÿim Pedro, aÿim lamaxashic so Jesucristo, shiyiñi ana ÿide da samaxa 'enauac nam nlagaxattacpi mayi sa ishit da nqajleguete naua lañoqo'te, nam neta'alo yiua 'ale'u Ponto, Galacia, Capadocia, Asia, qataq yi Bitinia.

² Qami', mayi nal'ena da qami' lca'agui'shi ñi qadta'a Dios co'ollaq saxanaqaca ana 'alhua, da ÿachigoxotchigui naq'en so n'Espíritu da qami' iÿotaugalo, da yaqto' qaualaqaiguet ñimayi, qataq yaqto' ÿataqta qami' qui'itto' naq'en naua ltago'q so Jesucristo. Aÿim ñishitaique da qauacoñiiguet da chochaq huañi nqouagaxanaqtaic qataq da nlagaxayic.

Da aquitaxac mayi chochaq tateec

³ Ÿataqta shi'oxodenaq qome ñi qadta'a Dios ñim lta'a so qadataxala' Jesucristo. Cha'ayi ñimayi ÿachigoxotchigui dam lta'adaic lchoxonnataxanaxa da qaltaq qomi' nañaxa't naq'en, ÿachigoxotchigui so Jesucristo co'ollaq nca'aleeguesop naq'en da nleuaxa. Qaq 'eda da chochaq tateec naq'en da qanaquitaxac,

⁴ qataq i'ot da qami' ishit da qauacoñiiguet naq'en cam ÿachaxanapec ñi Dios mayi hueta'ague da piguem, cam sa ishit da qailaxachigui qataq sa ishit da qaishipaxanaqchit qataq sa ishit da daqaqtañi da 'eeta'am aca huoue lauoxo.

⁵ Qataq souaxat da qami' huo'o da qadpi'iÿaxaqui ñi Dios, nachi ñimayi qami' npaxattalguete naq'en da l'añaxac, da yaqto' qaviyiÿa'aguet ca nca'alaxa mayi ÿaqataxaatapigui' ñimayi da qami' ÿauattonaxanaxanque caua pa'atreec na'axa'te.

⁶ Qaq ÿoqo'oyi nachida da huo'o mshi qami' ÿataqta qauamaichiguiñi, nai'ctaxa da huo'otaq qami' iuen da cada'acolec da huo'o da qanque'ejnaxaqui, souaxat nam qalota qañi'iguenataguiiqui.

⁷ Cha'ayi dam qadpi'iÿaxaqui qami' 'eeta'am ca oro da iuen da qaÿi'iguenec ca nodec, da yaqto' qaÿaÿaten da ÿoqta no'on. Qaq ca npi'iÿaxac mayi nala'aguet da ñi'iguenataguec, nachi ÿataqta napacalec da lyac ca oro mayi taÿa'a da imeuo. Qaq ÿoqo'oyi qami' de'eda qadpi'iÿaxaqui da huo'otaq nachi 'eetec de'eda da qaÿi'iguen, nachi ÿataqta qaÿaÿamaxadeeta, qataq huo'o da lli'oxoyic qataq ñi'oxonnataguec qom ivita da nachaxan ca Jesucristo.

⁸ Cha'ayi qami' ÿataqta qauauochiic so Jesucristo, nai'ctaxa da sa qauauañiigui; qataq da qau'amaqchiñi nagui, nai'ctaxa da saxanaxa da qauloÿo'ot, qataq ÿataqta huo'o da lli'oxoyic da lta'adaic qadamaxayiqui. Qaq damayi sa ishit da qaivi' da qai'axategue.

⁹ Cha'ayi qami' mashi qauacoñiiguet da lca'alaxa da qanachaalataxaqui, cha'ayi nachida da ÿataqta 'eetapeguec da qadpi'iÿaxaqui.

¹⁰ Som hua'a'u vi'iyi so l'aqtaxanaxanecpi ñi Dios co'ollaxa ÿataqta nmittac qataq ichimaxattega ca llic de'eda nca'alaxa, qataq somayipi i'axattac da lqouagaxanaqtaic ñi Dios mayi nshitaique da qami' ÿanema.

¹¹ Qataq so n'Espíritu so Cristo nal'ena co'ollaxa ÿaÿajnaxanaxanec se'eso l'aqtaxanaxanecpi ñi Dios dam taÿa'a nque'ejnaxac so Cristo qataq da lli'oxoyic mayi nca'attauo. Nachi somayipi ÿauotaique da ÿataqta ÿauattoota chaq negue't que'eca shiÿaxaua qataq huotaique da ÿaÿaten ca na'a'q mayi huetoigui cam i'axatta'aguet so Espíritu Santo mayi hueta'aguet somayipi.

¹² Qalaxayi ñi Dios ÿaÿajnaxanaxanec somayipi da de'eda huetapegue' sa ishit da lalamaxat, cha'ayi damayi qaÿauotaique da qomi' talguete. Qaq ÿoqo'oyi nachida da qami' qai'axattapeguema dam qami' i'axatema nam i'añaqchit so Espíritu Santo mayi chigoqo'ot na piguem mayi i'axattac da n'aqtaxanaxac mayi chigaqaigui da nca'alaxa. Qaq damayi nataq'en nachida da nshitaique da ÿaÿateeta co'ollaxa nam chigaqshiguem lamaxashicpi ñi Dios.

Ñi Dios nshitaique da qui'itta da qanachaalataxac

¹³ Qaq ÿoqo'oyi no'on da ÿataqta qauaÿamaxachiichiguiñi cam qau'ochi, qataq ÿataqta qanloiteec, qataq ÿataqta qaumachiÿo'ot 'enauac da qadpi'iÿaxaqui ñi Dios souaxat da lqouagaxanaqtaic mayi qami' ÿanema qom ivita da nachaxan so Jesucristo.

¹⁴ Qaq cha'ayi qami' qoñiita'am ca ñalec mayi ÿataqta laxadaic, sa ishit qome da qau'ochi nam qoñiitapeguecpi co'ollaq saxanaxa da qauauattoñi ñi Dios.

¹⁵ Chaqdato' qome da qoviitaigui da achaalataxac mayi ÿataqta qui'itta, cha'ayi ñim Dios mayi qami' iÿaxanalo, ñimayi ÿataqta qui'itta.

¹⁶ Cha'ayi nam ñiyigui'shi l'aqtaqa ñi Dios 'eeta': “Qami' ÿataqta qui'itta qome da qadataxaqui, cha'ayi aÿim ÿataqta aÿim qui'itta.”

¹⁷ Cha'ayi qami' da qauÿaxañiitega ñi Dios da ÿataqta qadta'ai, ñim sa ishit da lca'atagui na shiÿaxauapi da nmit ñi 'oonolec cam lasouaxashit, nachi ÿataqta qayi'iÿai qone' ñimayi 'enauaque naua na'axa'te nagui da ña qoviitalec ana 'alhua.

¹⁸ Cha'ayi ñi Dios qami' nca'alaxateeguesopa dam achaalataxac mayi ÿataqta qaica ca naigui, dam qami' n'onaxata'agueta som hua'au qadta'aipi; qataq qami' ÿataqta qauaÿajñiita da lashiichiÿaxac de'eda nca'alaxa da sa ishit da chochi lashiue qanqoÿin cam taÿa'a da imeuo da 'eeta'am aca oro huo'otaq aca plata,

¹⁹ cha'ayi nachisouate' soua ltago'q so Cristo mayi ÿataqta lta'adaic da lashiichiÿaxa'c co'ollaq 'eeta'am ca qagueta llalec mayi qaica ca lque'emaxa qataq qui'itta da qaÿalauat nachi qoÿaneuo da qaÿavigaxat.

²⁰ So Cristo nal'ena da qaÿaqataxaatapigui' co'ollaq saxanaqaca ana 'alhua da qoÿan, qalaxayi chaqnacta nagui da mashi pa'atreec naua na'axa'te, nachi yi'oq somayi, souaxat da qoñiita.

²¹ Qaq chigoqchigui so Cristo da huo'o mshi qami' qau'amaqchiñi ñi Dios, ñim qaltaq nca'alaxateeguesop somayi da nleuaxa qataq ÿanem da lli'oxoyic, ÿoqo'oyi qami' qaupi'iÿa'ai qataq qanaquichiÿa'a ñimayi.

²² Qaq nagui da chigoqchigui so Espíritu Santo da qami' qaualaqailec da n'aqtaxanaxac mayi ÿataqta 'eesa, nachi ÿataqta qauqui'itaxachiita da qanachaalataxaqui, da yaqto' ÿataqta qauauochiic na qadqaÿanquiipi. Qaq ÿoqo'oyi ñi 'oonolec da qoñiita ÿataqta imauec naq'en da lquiyaqteÿaxac qataq 'enauac da l'añaxac da ÿauotec ca lqaÿa.

²³ Cha'ayi qami' dalaxaic da qadañoxoqui. Qaq de'eda qadañoxoqui sa ishit da chigoqchiguilo caua yi'oqchiguilo qadta'alli' mayi taÿa'alo da imedeuo, cha'ayi nachida da l'aqtac ñi Dios mayi nca'altauec, qataq sa ishit da huo'o ca loga't.

²⁴ Cha'ayi naua ñiyigui'shi l'aqtaqa ñi Dios 'eeta': 'Enauac na ÿotta'a't shiÿaxauapi 'eeta'am ca chochi 'auaqpi, qataq dam l'amaqchic 'eeta'am aca lauoxo na 'auaqpi. Cha'ayi na 'auaqpi taÿa'a da daqaqa, qataq najñi ana lauoxo,

²⁵ qalaxayi da l'aqtac ñi qadataxala' sa ishit da huo'o ca loga't. Qaq de'eda n'aqtac nachida da n'aqtaxanaxac mayi chigaqaigui da nca'alaxa dam qami' qai'axattapeguema.