1 Juan 5 - Nuevo Testamento Toba Sur

Da 'eetec da qodoxonec na 'onataxacpi

¹ Qaq 'enauac nam huo'o da lpi'iÿaxac so Jesús da nachiso so nta'a mayi qadca'alaxaqui, namayipi llalaqpi ñi Dios. Qaq ca ÿauotec ñi qadta'a, qaq nataq'en ÿauotec na llalaqpi ñimayi.

² Qaq da huo'otaq sauotaxac ñi Dios, qataq so'otaq 'enauac nam damaxasoxoolecpi, qaq nataq'en saÿajnaqta da sauotaxac na llalaqpi ñimayi.

³ Cha'ayi da qaÿauotec ñi Dios, damayi naigui da qaÿalaxaguet nam lamaxasoxonaxacpi ñimayi. Qaq nam lamaxasoxonaxacpi sa ishit da qapa'atta.

⁴ Cha'ayi 'enauac nam llalaqpi ñi Dios, namayipi loxonec nam 'onataxacpi mayi huetalec ana 'alhua. Qaq nachida da qadpi'iÿaxac da chigoqchigui da qodoxonec na 'onataxacpi.

⁵ Qaq ÿoqo'oyi cam huo'o da lpi'iÿaxac so Jesús da nachiso so llalec ñi Dios, mayi nachicata ishit da loxonec na 'onataxacpi.

Da n'aqtaguec so llalec ñi Dios

⁶ Qaq da lvidaxac co'ollaq hueta'a ana 'alhua so Jesucristo, dos naua l'anqa'te: so 'etaxat co'ollaq qanachilaxan, qataq soua ltago'q co'ollaq qaÿalauat. Qaq sa ishit da nachaqsota so 'etaxat, cha'ayi nataq'en soua ltago'q co'ollaq qaÿalauat. Qaq so Espíritu Santo nachiso so i'axat de'eda, qalaq ÿataqta 'eesa da l'aqtaxanaxac.

⁷ Qaq tres naua hueto'oto na piguem mayi i'axa't de'eda: ñi qadta'a, qataq so l'enaxat n'aqtac, qataq so Espíritu Santo. Qaq ne'enaua tres 'eeta'am da 'oonolec.

⁸ Qataq tres naua huetalguete ana 'alhua mayi i'axa't de'eda: so Espíritu Santo, qataq so 'etaxat mayi qanachilgui, qataq soua ntago'q mayi qaicoldeec. Qaq ne'enaua tres 'eeta'a't da l'aqtaxanaxa'c.

⁹ Qaq qomi' ishit da sa'amaqtenaq da l'aqtaxanaxac ca chochi shiÿaxaua. Qalaxayi da l'aqtaxanaxac ñi Dios ÿataqta ÿacteec, cha'ayi damayi i'axat da n'aqtaguec so llalec.

¹⁰ Qaq cam i'amaqten so llalec ñi Dios, nachi camayi huetaigui añi lquiyaqte de'eda n'aqtaxanaxac. Qaq cam sa ishit da i'amaqten ñi Dios, nachi camayi 'eeta'am da shipecaic naq'en ñimayi. Cha'ayi sa ishit da i'amaqten da l'aqtaxanaxac ñi Dios co'ollaq i'axat so llalec.

¹¹ Qaq de'eda l'aqtaxanaxac ñi Dios naigui da qomi' ÿanema da nca'alaxa mayi chochaq tateec. Qaq de'eda nca'alaxa chigoqchigui so llalec.

¹² Qaq cam n'attau'a so llalec ñi Dios, qaq camayi nataq'en hueto'ot de'eda nca'alaxa. Qaq cam sa ishit da n'attau'a somayi, qaq sa ishit da hueto'ot de'eda nca'alaxa.

Da pa'ateec nqataxac

¹³ Qaq shiyiñi ana'ana ÿide da qami' samaxalo, qami' mayi qau'amaqchiñi so llalec ñi Dios, da yaqto' qauaÿajñiita da qami' hueto'oto da nca'alaxa mayi chochaq tateec.

¹⁴ Qaq ÿataqta sa ishit da ñi'aloxonaqto'ot ñi Dios, cha'ayi qomi' saÿajnaqta da huo'otaq seÿaxanqaique ca ÿaÿamaxadeeta ñimayi, qalaq ishit da qomi' hua'axaÿalo.

¹⁵ Qaq da qomi' saÿajnaq da ñi Dios hua'axaÿa da qanqouagaxaunaxac, qaq nataq'en saÿajnaq da mashi qomi' hueto'oto ca seÿaxanaqtaique.

¹⁶ Qaq da huo'otaq huo'o ca ÿauaachigui ca l'amqajnataxanaxaua da huo'o ca isoma'aguet lasouaxashit, da huo'otaq sa ishit da taÿa'a naq'en da nleuaxa, qaq no'on da nqouagaxaueelec camayi. Nachi ñi Dios ÿami' camayi da lca'alaxa, da huo'otaq que'eca lasouaxashit sa ishit da taÿa'a naq'en da nleuaxa. Cha'ayi huo'o ca nasouaxashit mayi taÿa'a naq'en da nleuaxa ca shiÿaxaua. Qaq sa ishit da shiitega da qanqouagaxaueelec que'eca nasouaxashit.

¹⁷ Qaq 'enauac nam qauemsat naigui na nasouaxashitpi, qalaxayi huo'o ca nasouaxashit sa ishit da taÿa'a naq'en da nleuaxa ca shiÿaxaua.

¹⁸ Cha'ayi saÿajnaq da ca 'eeta'am naq'en da ÿataqta lta'a ñi Dios, camayi sa ishit da huo'o ca i'ot lasouaxashit. Cha'ayi so llalec ñi Dios ntela'a camayi, qaq som shiÿaxaua lma'na sa ishit da huo'o ca 'en'ac.

¹⁹ Qaq qomi' saÿajnaqta da qomi' lalamqa'te ñi Dios, qaq nam laÿipi shiÿaxauapi mayi huetalec ana 'alhua 'enauac hueto'ot da l'añaxac so shiÿaxaua lma'na.

²⁰ Nataq'en qomi' saÿajnaq da so llalec ñi Dios, somayi anac da qomi' ÿanema da qadauattonaxanaxac, da yaqto' sauattonaqta ñim ÿoqta 'eesa Dios. Qaq ñi'adaqtau'a som llalec Jesucristo som ÿataqta 'eesa. Qaq 'eso som qadta'a Dios, qataq nachiso som chigoqo'ot da nca'alaxa mayi chochaq tateec.

²¹ Qami' ÿalqolqa, ÿataqta qadvichiÿa'a qome ca lÿa qoÿiitega qadta'a dios. Aja', nachi 'eetec.