1 Juan 4 - Nuevo Testamento Toba Sur

So n'Espíritu ñi Dios qataq nam nhuennataxacpi mayi npa'aguene' so Cristo

¹ Qami' ÿaqaÿañicpi, sa ishito' qome da qau'amaqchiñi 'enauac nam 'eetega da i'aqtaxanaxac ñi Dios. Chaqdato' da qauchimaxachiÿa camayi, yaqto' qauaÿajñiita da naua lhuennataxaco ÿataqta chigoqo'oto ñi Dios, huo'otaq sa ishit. Cha'ayi ana 'alhua mashi huotaique da nlaxalec na tenataxanaxaicpi mayi 'eetega da i'aqtaxanaxan ñi Dios.

² Qalaxayi 'eda qome da 'eetec da huo'o mshi qauauattoñi cam netangui so n'Espíritu ñi Dios, 'eeta': 'Enauac nam 'eesa naq'en da so Jesucristo ÿoqta 'eesa shiÿaxaua, qaq nachina na netanguit so n'Espíritu ñi Dios.

³ Qalaxayi cam sa ishit da ÿoqta 'eesa naq'en so Jesús, qaq camayi sa ishit da netanguit so n'Espíritu ñi Dios. Chaqdata da camayi hueto'oto naua nhuennataxaco mayi npa'agueneto so Cristo. Qaq qami' mashi qau'aqaitapeguelec da huo'o ca na'a'q, qaq yi'o'q ne'enaua nhuennataxaco. Qaq nagui mashi huetalguete naamayi ana 'alhua.

⁴ Qami' ÿalqolqa, qami' lalamqa'te ñi Dios. Qaq mashi sogote da qodoxonqui ne'ena tenataxanaxaicpi, cha'ayi ñim Dios mayi qami' hueta'agueta ÿataqta 'añaxaic, qaq sa ishit da 'en'am som hueta'aguet nam quetague' na 'onataxacpi mayi huetalec ana 'alhua.

⁵ Qaq nam tenataxanaxaicpi quetague' na 'onataxacpi mayi huetalec ana 'alhua, ÿoqo'oyi i'axattac. Qaq nam 'eeta'am quetague' na 'onataxacpi ÿataqta n'axaÿaxana namayipi.

⁶ Qomi', qalaxayi qomi' lalamqa'te ñi Dios. Qaq nam ÿauatton ñi Dios nachi ÿataqta qomi' n'axaÿaxanalo. Qaq nam sa ishit da lalamaxatpi ñi Dios, qalaq sa ishit da qomi' n'axaÿaxanalo. Qaq ÿoqo'oyi qomi' ishit da sauattonaq cam hueto'oto naua nhuennataxaco mayi ÿataqta 'eesoda qataq cam hueto'oto naua nhuennataxaco mayi desomaxanaqtaxa'n.

Huotaxanaqtaqaic ñi Dios

⁷ Qami' ÿaqaÿadolqa, ñi 'oonolec da shinaqta ÿataqta ÿauotec ca lÿa, cha'ayi dam nauotaxanaqtaic chigoqo'ot ñi Dios. Qaq 'enauac nam huo'o da lauotaxanaqtaic, namayipi llalaqpi ñi Dios, qataq ÿauatton ñimayi.

⁸ Qaq cam sa ishit da dauotaxanaqta, qachi sa ishit da ÿauatton ñi Dios, cha'ayi ñimayi huotaxanaqtaqaic.

⁹ Qaq ñi Dios qomi' ÿachaxanalo da lauotaxanaqtaic co'ollaq namaxa ana 'alhua so 'oonolec llalec, da yaqto' qomi' sachigoxotaqchigui somayi da qadca'alaxa.

¹⁰ Qaq 'eda da huo'o mshi saÿajnaq da lauotaxanaqtaic ñi Dios da ñimayi hua'auñi da qomi' ÿauoteque. Ÿoqo'oyi qomi' namaxalo so llalec, da yaqto' chigoqchigui naq'en somayi da ÿapalaxat na qadasouaxashitpi. Qaq sa ishit da nachiqomi' chigoqchiguilo da sauotaxac ñimayi.

¹¹ Qami' ÿaqaÿadolqa, da nachi 'eetec de'eda da qomi' ÿauoteque ñi Dios, qaq nataq'en ñi 'oonolec da shinaqta ÿataqta ÿauotec ca lÿa.

¹² Ñi Dios qaica da huo'o ca nma'ai' da ÿauatton. Qalaxayi ñi 'oonolec da shinaqta da ÿataqta ÿauotec ca lÿa, nachi ñi Dios qomi' hueta'agueta, nachi da lauotaxanaqtaic ñimayi ivitta'a da nalochiguiñi da qomi' huetaiguilo.

¹³ Qaq da ÿoqta 'itchiguiñi naq'en da qomi' ñi'adaqtau'a ñi Dios, qataq da qomi' hueta'agueta ñimayi, 'eeta': Ñimayi qomi' ÿanema so n'Espíritu Santo.

¹⁴ Qataq qomi' nataq'en ÿataqta sauanaqchigui ñi qadta'a Dios qataq sa'axataqtac da ñimayi namaq so llalec, da yaqto' nca'alaxateec 'enauac nam huetalec ana 'alhua.

¹⁵ Qaq cam 'eesa naq'en so Jesús da nachiso so llalec ñi Dios, camayi n'attau'a ñi Dios, qataq ñimayi hueta'aguet camayi.

¹⁶ Qaq 'eda da 'eetec da huo'o mshi saÿajnaq qataq sa'amaqtenaq da ñi Dios qomi' ÿauoteque. Ñi Dios huotaxanaqtaqaic. Qaq cam hueto'ot da nauotaxanaqtaic, camayi n'attau'a ñi Dios, qaq ñimayi hueta'aguet camayi.

¹⁷ Qaq yaqto' sevidaqta'a da ÿataqta nalochiguiñi da qadauotaxanaqtaic, yaqto' ca na'a'q qom qanmit 'enauac na shiÿaxauapi, qalaq sa ishit da ñi'aloxonaqtac. Cha'ayi qomi' nagui da ñaq souaqta'a ana 'alhua, qalaq ÿataqta shinaqta'am so Jesucristo.

¹⁸ Qaq cam hueta'ague de'eda nauotaxanaqtaic, nachi sa ishit da huo'o ca ncolanaxa. Cha'ayi de'eda nauotaxanaqtaic mayi nalochiguiñi, damayi i'odauec ca ncolanaxa. Cha'ayi de'eda ncolanaxa, damayi ilota'aguet da nhuaxanaguec. Qaq ÿoqo'oyi ca huo'o da lcolanaxa, qachi camayi sa ishit da ÿataqta dauotaxanaqta.

¹⁹ Qaq qomi' ÿataqta sauotaxac ñi Dios, cha'ayi ñimayi hua'auñi da qomi' ÿauoteque.

²⁰ Qalaxayi da huo'o ca 'eeta': “Aÿim sauotec ñi Dios,” qalaxayi camayi da ña nquiÿata'ai' ca lqaÿa, nachi camayi chochi tenataxanaxaic. Cha'ayi ca 'oonolec shiÿaxaua da huo'otaq sa ishit da ÿauotec ca lqaÿa mayi ilota'a, nachi camayi ¿huá'aguectoxo' da ishit da ÿauotec ñi Dios mayi sa ishit da ila'a?

²¹ Qaq ñimayi qomi' ÿanema da lamaxasoxonaxac, 'eeta': Ca ÿauotec ñi Dios, qaq no'on da nataq'en ÿauotec ca lqaÿa.