1 Juan 3 - Nuevo Testamento Toba Sur

Na llalaqpi ñi Dios

¹ Qaq ña qauloÿa da ÿataqta lta'adaic da lauotaxanaqtaic da shinaqta ñi qadta'a Dios da qomi' ÿamata'aque da qomi' llalqa ñimayi, qaq ÿoqta 'eesa da qomi' llalqa. Qaq ÿoqo'oyi sa ishit da qomi' ÿauatto'n nam quetague' na 'onataxacpi mayi huetalec ana 'alhua, cha'ayi sa ishit da ÿauatton ñi Dios.

² Qami' ñauochaxa'u ÿaqaÿa't, nagui mashi qomi' llalqa ñi Dios. Qaq saxanaxa da qomi' qaichoxotema chaq hua'ague ca 'eetec qome ca qadataxac ca pa'ateec na'a'q. Qalaxayi qomi' saÿajnaq da qom nachaxan so Jesucristo, nachi ÿataqta shinaqta'am somayi, cha'ayi ÿataqta ñimaqa'ai' da seloqto'ot.

³ Qaq 'enauac nam huo'o da lpe'e somayi, namayipi ÿataqta nqui'itaxatta, 'eeta'am da 'eetec so Jesucristo da ÿataqta qui'itta.

⁴ Qalaxayi 'enauac nam i'ot ca lasouaxashit, namayipi sa ÿalaxalec na lqataxacpi ñi Dios, cha'ayi da huo'o ca qaÿasouaxat, qaq 'eeta'am da sa ishit da qaÿalaxalec na nqataxacpi.

⁵ Cha'ayi qami' mashi qauaÿajñi da so Jesucristo somayi anaÿa ana 'alhua, da yaqto' ÿapalaxat 'enauac na qadasouaxashitpi. Qaq somayi ÿataqta qaica ca 'oonolec lasouaxashit.

⁶ Qaq 'enauac nam quetot da n'attau'a so Cristo, nachi namayipi sa ishit da quetot da i'otta'pe nam lasouaxashi'te. Qalaxayi 'enauac nam quetot da huo'o na lasouaxashitpi, namayipi sa ishit da ila'a qataq sa ishit da ÿauatton somayi.

⁷ Qami' ÿalqolqa, sa ishit qome da huo'o ca qami' ÿatenachi't. Cam i'ot ca ÿaÿamaqchiguiñi, camayi ÿataqta no'on shiÿaxaua, qaq 'eeta'am so Cristo da ÿataqta no'on shiÿaxaua.

⁸ Qalaxayi cam quetot da i'otta'pe naua lasouaxashi'te, camayi quetague' som shiÿaxaua mayi lma'na. Cha'ayi somayi nal'ena da ÿataqta 'itaxaloxoic co'ollaq chita'ague huo'o ana 'alhua. Qaq ÿoqo'oyi so llalec ñi Dios anac da yaqto' nlaxajñi 'enauac nam l'onataxanaxacpi somayi.

⁹ Qalaxayi nam llalaqpi ñi Dios sa ishit da huo'otaq huo'o ca queto'ot da i'otta'pe naua lasouaxashi'te, cha'ayi camayi hueto'ot da achaalataxac mayi ÿanem ñi Dios. Nachi camayi sa ishit da queto'ot da i'otta'pe naua lasouaxashi'te, cha'ayi llalec ñi Dios.

¹⁰ Huaña, nachi ishit da qaÿaÿaten cam ÿoqta 'eesa da llalaqpi ñi Dios qataq cam llalaqpi so shiÿaxaua mayi lma'na, cha'ayi cam sa ishit da i'ot ca ÿaÿamaqchiguiñi, huo'otaq sa ishit da ÿauotec ca lqaÿa, nachi camayi sa ishit da lalamaxat ñi Dios.

Ñi 'oonolec da shinaqta ÿataqta ÿauotec ca lÿa

¹¹ Cha'ayi dam n'aqtaxanaxac mayi qau'aqaichigui co'ollaq chita'ague da qau'amqajnataxañi, 'eeta': Ñi 'oonolec da shinaqta ÿataqta ÿauotec ca lÿa.

¹² Qaq sa ishit qome da shinaqta'am so Caín mayi quetague' som shiÿaxaua mayi lma'na, nachi ÿalauat co'ollaxa so lalamaxat lqaÿa. Qaq ¿chaq tá'ainco' yi ÿalauat? Qomyi da i'ottac so Caín sa ÿaÿamaxañi, qaq som lqaÿa qalaq ÿataqta ÿaÿamaqchiguiñi da i'ottac.

¹³ Qami' ÿaqaÿa't, sa ishit qome da qadhualliÿa'a qom qami' nquiÿalo nam quetague' na 'onataxacpi mayi huetalec ana 'alhua.

¹⁴ Cha'ayi qomi' mashi soqolqa'ai da 'ico' qadeleuaxa, nachi huo'o da qadca'alaxa. Qaq damayi saÿajnaqta, cha'ayi sauotaxac na qadqaÿañicpi. Qaq cam sa ishit da ÿauotec ca lqaÿa, qaq camayi ñaq 'eetalec da leuaxaic.

¹⁵ Qaq 'enauac nam nquiÿatapega cam lqaÿa, namayipi laataxanaxaic. Qaq qami' qauaÿajñi da sa ishit da huo'o ca laataxanaxaic da inoxoneu'a da nca'alaxa mayi chochaq tateec.

¹⁶ Qaq saÿajnaqta da 'eetec da nauotaxanaqtaic, cha'ayi so Jesucristo qomi' ÿapaxaguenque co'ollaq ÿan da nachaalataxac da qomi' ileualguete. Qaq ÿoqo'oyi nataq'en qomi' sanaq da qanachaalataxac da ñañanaxalec na qadqaÿañicpi.

¹⁷ Ÿoqo'oyi da huo'o ca 'oonolec da shinaqta da huo'o 'enauac nam lhueneguesat da nachaalataxac, qaq da huo'otaq ilota'a ca lqaÿa da huo'otaq huo'o da lhuenaxanaxa, qalaq sa ishit da nqouaguec camayi, nachi ¿huá'ago' ca 'eetec camayi da ÿauotec ñi Dios?

¹⁸ Qami' ÿalqolqa, de'eda qadsoxoyic sa ishito' qome da chochi ndotreec naua qad'aqtaqa, chaqdato' qome da ÿataqta 'eesa da qadsoxoyic, yaqto' ÿataqta qaila'a da huo'o ca so'otaq.

Qaica ca qan'aloxootaique da qanayiuto'ot ñi Dios

¹⁹ Qaq 'eda da 'eetec da qomi' saÿajnaq da ÿoqta qomi' 'eesoda qataq da sa ñi'aloxonaqtac da souaqto'ot ñi Dios.

²⁰ Cha'ayi da qadquiyaqteÿaxac da huo'otaq i'axat da huo'o ca qadasouaxashit, qaq saÿajnaq da ñi Dios ÿacteec da ÿaÿaten da qadquiyaqteÿaxac, qataq ñimayi ÿaÿaten 'enauac da qadataxac.

²¹ Ÿoqo'oyi qami' ÿaqaÿadolqa, da qadquiyaqteÿaxac da huo'otaq sa ishit da huo'o ca qadasouaxashit naq'en, nachi ÿataqta sa ishit da ñi'aloxonaqto'ot ñi Dios.

²² Qaq ñimayi ishit da qomi' ÿanema 'enauac cam seÿaxanqaique, cha'ayi ÿataqta salaxasoxoguet nam lamaxasoxonaxacpi, qataq so'otaq cam ÿaÿamaxadeeta ñimayi.

²³ Qaq dam lamaxasoxonaxac ñimayi 'eetega da qomi' sa'amaqtenaq so llalec Jesucristo, qataq 'eetega da ñi 'oonolec da shinaqta ÿataqta ÿauotec ca lÿa. Nachida da qomi' ÿamaxalguete.

²⁴ Qaq nam ÿalaxalec na lamaxasoxonaxacpi, nachi ÿataqta n'attau'a ñimayi, qaq ñimayi hueta'aguet namayipi. Qaq saÿajnaq da ñimayi qomi' hueta'agueta, cha'ayi so n'Espíritu mayi qomi' ÿanema, somayi qomi' ÿaÿajnaxanaxa'n.