1 Juan 2 - Nuevo Testamento Toba Sur

So Cristo nachiso so qomi' detaqleguete

¹ Qami' ÿalqolqa, shiyiñi de'eda da qami' samaxalo, yaqto' sa ishit da huo'o ca qau'ochi qadasouaxashichi. Qalaxayi da huo'otaq huo'o ca huo'o ca lasouaxashit, qalaxayi huo'o so ishit da qomi' detaqleguete da detaxaÿapegue' ñi qadta'a. Somayi nachiso so Jesucristo som i'ot ca ÿaÿamaqchiguiñi.

² Cha'ayi somayi nachiso so chigoqchigui da huo'o mshi qaÿapalaxa't naua qadasouaxashi'te, qaq sa ishit da nachiqomaqta, cha'ayi nataq'en 'enauac na shiÿaxauapi mayi huetalec ana 'alhua.

³ Qaq da ÿataqta salaxasoxogueta naua lamaxasoxonaxaco ñi Dios, nachi huaña, qaq saÿajnaqta da sauattonaqta ñimayi.

⁴ Qalaxayi da huo'o ca 'eeta': “Aÿim sauatton ñi Dios,” qalaxayi sa ÿalaxagueta naua lamaxasoxonaxaco ñimayi, nachi camayi chochi tenataxanaxaic qataq saq 'en.

⁵ Qaq cam i'o't naua lamaxasoxonaxaco ñimayi, nachi camayi ivida'a da ÿataqta ÿauotec ñi Dios. Qaq 'eda da 'eetec da huo'o mshi saÿajnaq da qomi' ñi'adaqtau'a ñimayi.

⁶ Qataq ca 'eetega da n'attau'a ñi Dios, nachi camayi no'on da i'enaxatchigui da lataxac so Jesucristo.

Da dalaxaic namaxasoxonaxac

⁷ Qami' ÿaqaÿa't, aÿim sa ishit da huo'otaq shiyiñi cam dalaxaic namaxasoxonaxac da qami' samaxalo, cha'ayi nachaqdata dam namaxasoxonaxac mayi qauacoñiiguet co'ollaq chita'ague da qau'amqajnataxañi. Qaq de'eda namaxasoxonaxac mayi l'atchiguiñi, nachida dam qau'aqaichigui co'ollaxa.

⁸ Qalaxayi ñaqaiyita de'eda shiyiñi 'eeta'am da dalaxaic namaxasoxonaxac. Qaq damayi ÿataqta 'eesa, 'eeta'am da 'eetec naq'en co'ollaxa so Cristo, qaq nachi 'eeta'am nataq'en da qoñiita. Cha'ayi so napalaxa mashi yaqta'a da ÿoxogue, ime, qaq anac na ÿoqta 'eesa da yi'oqchiguiñi.

⁹ Qaq da huo'o ca 'eetega da nachattaigui na yi'oqchiguiñi, qalaxayi nquiÿatega ca lqaÿa, nachi camayi ñaq huetaigui na napalaxa.

¹⁰ Qaq ca ÿauotec ca lqaÿa, camayi nachattaigui na yi'oqchiguiñi, nachi sa ishit da qaÿauo'o ca lasouaxashit.

¹¹ Qaq cam nquiÿata'ai' ca lqaÿa, qalaq camayi nachattaigui na napalaxa, qataq sa ÿaÿaten cam tata'ague, cha'ayi nam napalaxa sa ishit da nauaañi naq'en camayi.

¹² Qami' ÿalqolqa, qami' samaxalo ana ÿide, cha'ayi ñi Dios mashi sogote da ÿapalaxat na qadasouaxashichi, souaxat so Jesucristo.

¹³ Qataq qami' ÿi'axaiquipi, qami' samaxalo ana ÿide, cha'ayi mashi ÿataqta qauauattoñiita som nal'ena da huo'o co'ollaq ñaq saxanaxa da huo'o ana 'alhua. Qataq qami' nsoxotpi, qami' samaxalo ana ÿide, cha'ayi mashi qodoxonqui so shiÿaxaua lma'na. Qataq qami' ÿalqolqa, qami' samaxalo ana ÿide, cha'ayi mashi qauauattoñiita ñi qadta'a.

¹⁴ Qaq qami' ÿi'axaiquipi, qami' samaxalo ana ÿide, cha'ayi mashi qauauattoñiita som nal'ena da huo'o co'ollaq saxanaxa da huo'o ana 'alhua. Qataq qami' nsoxotpi, qami' samaxalo ana ÿide, cha'ayi ÿataqta qami' 'añaxaiqa, qataq qauacoñiiguet da l'aqtac ñi Dios, qataq cha'ayi sogote qodoxonqui so shiÿaxaua lma'na.

¹⁵ Qaq sa ishit qome da qauauochiic ana 'alhua qataq nam 'onataxacpi mayi huetalec anamayi. Cha'ayi da huo'o ca ÿauotec ana 'alhua, nachi camayi sa ishit da ÿauotec ñi qadta'a Dios.

¹⁶ Cha'ayi qaica da huo'o cam 'oonolec nam 'onataxacpi ana 'alhua da huo'otaq chigoqo'ot ñi qadta'a Dios, cha'ayi nachinatac nam 'onataxacpi mayi huetalec ana 'alhua. Qaq namayi nachina na qauem lhuennataxacpi da qadapachiyaxac, qataq da lqopitaxanaqtaic naua qad'ai'te, qataq da 'amqajnaxac da nachaalataxac na shiÿaxauapi. Qaq 'enauac namayi chigaqaigui nam 'onataxacpi mayi huetalec ana 'alhua.

¹⁷ Qalaxayi ana 'alhua taÿa'a da imeuo, qataq lÿauegue' 'enauac nam qauem nhuennataxacpi mayi huetalec anamayi. Qalaxayi cam i'ot cam 'eetapeguec ñi Dios, nachi camayi nachi 'eetai' da nachaalataxac.

Cam ÿataqta 'eesa qataq cam saq 'en

¹⁸ Qami' ÿalqolqa, mashi nvildeuo naua pa'atreec na'axa'te, qaq qami' qauaÿajñi da huo'o qome ca anatai' mayi npa'aguene' so Cristo. Qaq nagui mashi qalota na yi'oq nam npa'aguene' somayi. Ÿoqo'oyi qomi' saÿajnaq da mashi nvildeuo naua pa'atreec na'axa'te.

¹⁹ Namayipi qomi' ca'aisalo, qalaxayi ÿoqta 'eesa da namayipi sa ishit da ÿoqta qomi' lÿa't. Cha'ayíctaxa da ÿoqta maichi qomi' lÿa't, nachi sa ishíttaxa da qomi' ca'aisalo. Qalaxayi namayipi 'eetec de'eda, yaqto' yi'oqta da sa ishit da 'en'a't da ÿoqta qadaÿipi.

²⁰ Qalaxayi so Cristo mashi qami' ÿanema so Espíritu Santo, nachi 'enauac da qoñiita huo'o da qadauattonaxanaxaqui.

²¹ Qaq qami' samaxalo ana ÿide, cha'ayi qami' qauauattoñi da 'eesa lataxac, qaq sa ishit da huo'otaq sa qauauattoñi. Qataq qami' qauaÿajñiita da qaica ca natenataxanaxac da huo'otaq ishit da chigaqaigui dam lataxac mayi 'eesa.

²² Qaq ¿chaq négue't cam tenataxanaxaic? Qomyi nachica cam 'eetega da so Jesús sa ishit da nachiso so nta'a mayi qadca'alaxaqui. Qaq 'eca cam npa'aguenaxaua somayi, cha'ayi camayi nqolguete' ñi qadta'a qataq som llalec.

²³ Qaq 'enauac nam ÿoqolguet som llalec ñi Dios, namayipi sa ishit da hueta'aguet ñi qadta'a. Qalaxayi nam sa ishit da ÿoqolguet so llalec ñi Dios, namayipi nataq'en hueta'aguet ñi qadta'a.

²⁴ Qaq ÿoqo'oyi qami' ÿataqta qai'oxochiÿoiguilo qome naua qadquiyaqchilli' da n'aqtac mayi qau'aqaichigui co'ollaq chita'ague da qau'amqajnataxañi. Cha'ayi de'eda n'aqtac mayi qau'aqaichigui co'ollaxa da huo'otaq ÿataqta huetaiguilo naua qadquiyaqchilli', nachi qami' ÿataqta qan'ayiitau'a ñi Dios qataq so llalec.

²⁵ Qaq som Jesucristo qomi' ÿachaxanapeguema co'ollaxa da achaalataxac mayi chochaq tateec.

²⁶ Qaq shiyiñi de'eda da qami' souaxat nam nshitaique da qami' ÿatenachi't.

²⁷ Qalaxayi qami' mashi qami' netanguita so Espíritu Santo mayi qami' ÿanema so Jesucristo. Qaq sa ishit da iuen da huo'o ca qami' ÿapaxague'n, cha'ayi nachiso som Espíritu qami' ÿapaxaguenque 'enauac na lataxaguesat. Qaq nam lapaxaguenataxanaxacpi somayi ÿataqta 'eesa, qaq sa ishit da saq 'en. Qaq ÿoqo'oyi nachi 'eetai' qome da qan'ayiitau'a so Cristo, cha'ayi nachiqami' ÿapaxaguenque so Espíritu.

²⁸ Qaq ÿoqo'oyi qami' ÿalqolqa, nachi 'eetai' qome da qan'ayiitau'a so Cristo, yaqto' ÿataqta huo'o qome da qadpe'e qom ivita da nachaxan somayi, qaq sa ishit da huo'o ca qad'aloxo qom ivita da ñi'iguelaq.

²⁹ Qaq cha'ayi qami' mashi sogote da qauaÿajñi da so Jesucristo ishit da i'ot ca ÿaÿamaqchiguiñi, qataq mashi qauaÿajñiita nataq'en da 'enauac nam ishit da i'ot ca ÿaÿamaqchiguiñi, namayipi llalaqpi ñi Dios.