1 Juan 1 - Nuevo Testamento Toba Sur

So l'enaxat n'aqtac mayi chigaqaigui da nca'alaxa

¹ Qaq sedaxañi da yaqto' qami' samaxasaxalo se'eso nal'ena da huo'o co'ollaq saxanaxa da huo'o ana 'alhua, som qomi' sa'axasoqchigui qataq ñimaqa'ai' da sauanaqchigui. Somayi sauanaqchigui qataq naua qadhua'q ipottau'alo, qaq somayi nachiso so l'enaxat n'aqtac mayi chigaqaigui da nca'alaxa.

² Qaq se'eso chigaqaigui da nca'alaxa co'ollaq nachaxan, nachi qomi' sauanaqchigui, qataq sa'axataqtac somayi. Qataq qami' sa'axataxama se'eso chigaqaigui da nca'alaxa mayi chochaq tateec, som hueta'aguet co'ollaxa ñi qadta'a Dios, qataq qomi' nachaxanalo.

³ Qaq qami' sa'axataxama dam sauanaqchigui qataq sa'axasoqchigui, yaqto' qami' ishit da qomi' qan'ayiitau'alo, 'eeta'am da 'eetec da qomi' ñi'idaqtau'a ñi qadta'a Dios qataq so llalec Jesucristo.

⁴ Qaq ÿoqo'oyi sedaxañi damayi da qami' samaxasaxalo, yaqto' da qantonaxaqui ÿataqta nalochiguiñi.

Ñi Dios yi'oqchiguiñi naq'en 'enauacna

⁵ Qaq 'eda dam n'aqtaxanaxac mayi qomi' ÿapaxaguenque so Jesucristo dam qami' sa'axataqtapeguema, 'eeta': Ñi Dios yi'oqchiguiñi naq'en 'enauacna, qaq sa ishit da huo'o ca napalaxa da hueto'ot ñimayi.

⁶ Qaq ÿoqo'oyi da shinaqtega da ñi'adaqtau'a ñimayi, qalaxayi ñaq souaqtaigui na napalaxa, nachi chochi satenataxanaqtac qone' da huo'o ca shinaqpec qataq da huo'o ca so'otaq.

⁷ Qalaxayi da ñachaataqtaigui na yi'oqchiguiñi, da shinaqta'am ñi Dios da nachattaigui na yi'oqchiguiñi, nachi ñi 'oonolec da shinaqta ÿataqta n'atta'ai' ca lÿa, nachi naua ltago'q mayi qaicoldeec so llalec Jesucristo co'ollaq qaÿalauat, iÿouec 'enauac na qadasouaxashit.

⁸ Qaq da shinaqpec da qaica ca qadasouaxashit, nachi qomi' maichi ñatenachitaqtapeguela't, qataq sa ishit da qomi' 'eesoda.

⁹ Qalaxayi da sa'axata'q naua qadasouaxashi'te, nachi sepi'aqa'a da ñi Dios ishit da i'ot ca ÿaÿamaqchiguiñi da ÿapalaxat 'enauac na qadasouaxashitpi qataq da iÿouec 'enauac na sa ÿaÿamaxañisat.

¹⁰ Qalaxayi da shinaqtega da sa ishit da huo'o ca so'otaq qadasouaxashit, nachi 'eeta'am ñaq'enaq da shipecaic ñimayi, qataq sa ishit qone' da ÿoqta sa'amaqtenaq da l'aqtac.