1 Corintios 8 - Nuevo Testamento Toba Sur

Ca nallic mayi qanatameelec da qoÿanot ca nqolac

¹ Qaq nagui qami' sa'axatema da lliquiaxac ca nallic mayi qanatameelec da qoÿanot ca nqolac. 'Eesa da 'enauac da qadauattonatac de'eda. Qalaxayi de'eda nauattonaxanaxac ÿashittagui naq'en da ñi'oxonnaxac ca shiÿaxaua. Chaqdata da nsoxoyic mayi nañaxat naq'en camayi.

² Da huo'o ca ipi'itaxaatega da huo'o na ÿaÿaten, camayi saxanaxa da huo'o ca ÿaÿaten, cha'ayi saxanaxa da ÿoqta lataxac da lauattonaxanaxac.

³ Qalaxayi da huo'o ca ÿauotec ñi Dios, qaq ñimayi ÿataqta ÿauattoota camayi.

⁴ Ÿoqo'oyi ca nallic mayi qanatameelec da qoÿanot ca nqolac, saÿajnaq da na nqolacpi mayi huetalecna ÿataqta qaica ca 'enec, cha'ayi 'oonolec ñi Dios, qaica ca lÿa.

⁵ Qaq nai'ctaxa da huo'o na qanatameetacotpi saq cha'api mayi hueto'ot na piguem qataq huetalec ana 'alhua, cha'ayi ÿataqta qalota na qoÿiitega nta'alpi saq cha'api qataq na nataxala'pi,

⁶ qalaxayi qomi' saÿajnaq da 'oonolec ñi qadta'a, l'enaxat Dios. Ñimayi mayi chigoqchigui 'enauac nam huetalecna, qaq qomi' i'o't da qomi' lalamqa'te. Qataq 'oonolec so qadataxala', l'enaxat Jesucristo, som ÿachigoxotchigui ñi Dios 'enauac nam huetalecna, nataq'en qomi'.

⁷ Qalaxayi sa ishit da 'enauac qaÿaÿaten de'eda. Cha'ayi huo'o na nai'ac co'ollaxa da natameetacot na nqolacpi, da ñaq 'eetalec nagui da huo'otaq chic ne'ena nallic, 'eeta'am naq'en ca nallic mayi qoÿanot ca nqolac. Qaq da ntounaxac yi saxanaxa da da'añi, nachi nomteguet da qaishipaxanaqchit.

⁸ 'Eesa da ca nallic sa ishit da sachigoxotaqagui da qomi' ÿaÿamaxadeete' ñi Dios. Cha'ayi ca nallic da sachiguenaq, qaq sa ishit da qomi' nquigaxatta'agueta da no'on qadataxac; huo'otaq da sa ishit da sachiguenaq, qaq sa ishit da qomi' nquigaxatta'agueta da qauem qadataxac.

⁹ Qalaxayi qami' qautelaqtaxañiÿot de'eda qadataxaqui mayi huosochiguiñi da sa ishit qome da huo'o ca lasouaxashit naq'en ca saxanaxa da da'añi da lpi'iÿaxac.

¹⁰ Saloqnaxana 'am mayi 'auaÿateeta de'eda. Da huo'otaq 'anso'ooñisop cam huaña da qaÿi'oxoden ca nqolac da 'auque'e, qaq da huo'otaq 'am ilau'a ca qadqaÿa mayi saxanaxa da da'añi da lpi'iÿaxac, qaq que'eca qadqaÿa nachi i'añaxachigui lauel da dequi'iÿapegueu'a que'eca nallic mayi qoÿanot ca nqolac.

¹¹ Qaq 'am, mayi huo'o da 'adauattonaxanaxac, nachi 'auqataqchit ca qadqaÿa mayi saxanaxa da da'añi da lpi'iÿaxac cam nataq'en ileualec so Cristo.

¹² Qaq da nachi qoñiitec de'eda da qauque'emaqchichi da ntounaxac ca qadqaÿa mayi qaica ca l'añaxac da lpi'iÿaxac, qaq 'en'am da nachiso so Cristo qauque'emaqchichi.

¹³ Qaq ÿoqo'oyi aÿim da sasouaxateguet da huo'o ca lasouaxashit ca ÿaqaÿa souaxat ca nallic mayi sachic, qaq no'on da nal'en sa ishit da sachic ca lapat, yaqto' sa ishit da sasouaqtaxan.