1 Corintios 7 - Nuevo Testamento Toba Sur

N'aqtaguec da nadonaxac

¹ Qaq nagui qami' sa'axatema dam qaunataxañiitapeguelec co'ollaq aÿim qanamaqaÿa aso qad'aqtaqui lmalate. Qaq aÿim shinapec da 'onaxaic ca shiÿaxaua da sa ishit da huadon.

² Qalaxayi souaxat da huo'o na quetaigui da lquishiguetaxac, qaq no'on ca 'oonolec shiÿaxaua da ÿauo'o aca lalamaqte lhua, qataq aca 'alo ÿauo'o ca lalamaxat lhua.

³ Qaq ca shiÿaxaua mayi mashi huadon ÿataqta iloteguet aca lhua. Nachi 'en'am aca 'alo ÿataqta iloteguet ca lhua.

⁴ Aca 'alo mayi mashi huadon, acamayi sa ishit da lalamaxat da l'oquiaxac. Nachi 'en'am ca ÿale, camayi sa ishit da lalamaxat da l'oquiaxac. Cha'ayi da huadona't, nachi aca 'alo lalamaxat ca ÿale, qaq ca ÿale lalamaqte aca 'alo.

⁵ Qaq sa ishit da nmaqtega't caamayi. Chaqdata da huo'otaq nsoxoota't caamayi da ÿauo'o ca laloqne'c da sa ishit da nauaña't da ÿauotraique da ÿataqta nañaadeguet da nqouagaxaunaxa'c. Qalaxayi da ime, nachi qaltaq ipactegue da nauaña't, cha'ayi sa iuena'a da ÿasouaxat da sa ishit da naÿateetrela't, nachi so Satanás huo'o ca lligueuo da ÿauo'o ca lasouaxashi't.

⁶ 'Enauac de'eda qami' sa'axattapeguema, damayi chochi ÿinnataxanaxac, qaq sa ishit da ÿoqta ÿamaxasoxonaxac.

⁷ Aÿim huo'o da iyaxa da 'enauac aÿim qoÿiita'am, qalaxayi ñi Dios ÿanem ñi 'oonolec na ÿotta'a't lshitaxanaxatpi. Ca 'oonolec 'eeta' da lataxac, qataq ca lÿa 'eeta'.

⁸ Qaq nam qaca aca lhua qataq ana pa'ai huo'o da i'aqtac da 'onaxaic da nachi 'eetai' da sa ishit qome da huadon, 'eeta'am aÿim.

⁹ Qalaxayi da sa ishit da nalo'oguet da 'eeta, qaq 'onaxaic da ÿataqta huadon, cha'ayi sa ÿaÿamaxañi da nachi 'eetai' da dapaqtac.

¹⁰ Qalaxayi na mashi sogote da huadon huo'o da ÿaqataxac da aca 'alo sa ishit da ÿalat ca lhua. De'eda ÿaqataxac damayi sa ishit da ÿalamaxat, damayi chigoqo'ot so qadataxala'.

¹¹ Qalaxayi sa iuena'a da aca 'alo huo'otaq ÿalat ca lhua, qaq da huo'otaq sa ishit da ÿi'iguelaxaguet, qaq no'on da nachi sa ishit da huadon. Qaq nachi 'eeta'am nataq'en ca ÿale sa ishit da nalate' aca lhua.

¹² Qaq na laÿipi 'amqajnataxanaxaicpi aÿim ñalligoxottela't da shinapega, qaq sa nachiso so qadataxala'. Da huo'o ca huo'o aca lhua mayi sa ishit da da'amqajnataxan, qaq acamayi da ÿaÿamaxadeeta da neta'aguet camayi, qaq ca ÿale no'on da sa ishit da nalate'.

¹³ Qaq da huo'o aca huo'o ca lhua mayi sa ishit da da'amqajnataxan, qaq camayi da ÿaÿamaxadeeta da neta'aguet acamayi, qaq aca 'alo no'on da sa ishit da nalate'.

¹⁴ Cha'ayi ca ÿale mayi sa da'amqajnataxan ividauga da ÿaÿamaxadeeta ñi Dios, souaxat da huadonguet aca 'amqajnataxanaxai. Qaq aca 'alo mayi sa da'amqajnataxan ividauga da ÿaÿamaxadeeta ñi Dios, souaxat da huadonguet ca 'amqajnataxanaxaic. Cha'ayi da sa ishit da nachi 'eetec de'eda, nachi da qadco'oxoqui 'eeta'am na llalaqpi na sa da'amqajnataxanpi. Qalaxayi nagui sogote da mashi ÿaÿamaxadeeta ñi Dios.

¹⁵ Qalaxayi ca ÿale, huo'otaq aca 'alo mayi sa da'amqajnataxan, da ipacapegue' da dalataxan, qaq no'on da ipacalec. Qaq da nachi 'eetec de'eda, qaq ca 'amqajnataxanaxaic, huo'otaq aca 'amqajnataxanaxai, nachi qalta ipactegue da huosochiguiñi. Cha'ayi ñi Dios qomi' iÿaxanalo da selagaqtapiguiñi.

¹⁶ Cha'ayi 'am 'alo, ¿sa 'auaÿajno' da huo'otaq ishit da 'am chigoqchigui da qanca'alaxateec ca 'adhua? Huo'otaq 'am ÿale, ¿sa 'auaÿajno' da huo'otaq ishit da 'am chigoqchigui da qanca'alaxateec aca 'adhua?

¹⁷ Nai'ctaxa ca 'eetec ca lataxac ñi 'oonolec, nachica saq ÿaxaneec. Chaqdata da ilotelec da lliquiaxac cam ÿanem so qadataxala'. Da 'eetec da lataxac co'ollaq Dios iÿaxana, nachida saq ÿaxaneec. Qaq 'eda da saqattega 'enauac ana n'onaxanaxaquipi.

¹⁸ Da huo'o ca huo'o ca n'anaxashit na l'oc co'ollaq iÿaxana ñi Dios, qaq nachida sa ishit da ÿaxaneec. Qaq da huo'o ca qaica ca n'anaxashit na l'oc co'olla qaiÿaxana, no'on da nachi 'eetai' da sa ishit da ÿauo'o ca n'anaxashit.

¹⁹ Nai'ctaxa da huo'o ca n'anaxashit na l'oc ca shiÿaxaua, huo'otaq qaica, qalaxayi nachi 'en'am. Cha'ayi chaqcata ca i'ot na lqataxacpi ñi Dios nachica ca qaÿaÿamaxadeeta.

²⁰ Ca shiÿaxaua no'on da nachi 'eetai' saq ÿaxaneec ca lataxac co'ollaq iÿaxana ñi Dios.

²¹ Da huo'otaq 'am nlatac co'ollaq 'am qaiÿaxana, qaq no'on da sa ishit da 'admelec damayi. Nai'ctaxa da huo'o ca na'a'q da huo'otaq 'auañoxot da 'am huosochiguiñi, qaq lamaaxa 'anpogoxoinapec.

²² Cha'ayi ca shiÿaxaua da nlatac co'olla qaiÿaxana da i'amaqten so qadataxala', camayi nagui ÿataqta huosochiguiñi da quetague' somayi. Qaq nachi 'eeta'am ca shiÿaxaua da huo'otaq sa ishit da nlatac co'olla qaiÿaxana, camayi nagui l-latac so Cristo.

²³ Cha'ayi ÿataqta lta'adaic da lashiichiÿaxac co'olla qami' deshijnaxanalo ñi Dios, ÿoqo'oyi sa ishit da qanashiñiita da qami' l-lataqa ca chochi shiÿaxaua.

²⁴ Qaq ÿoqo'oyi, qami' ÿaqaÿa't, nagui da quetague' ñi Dios ñi 'oonolec da qoñiita, no'on da nachi 'eetai' saq ÿaxaneec da lataxac co'olla qaiÿaxana.

²⁵ Qaq ca shiÿaxaua mayi saxanaxa da huadon, aÿim qaica ca ÿaqataxac chigoqo'ot so qadataxala' da sanem. Qalaxayi sami' da iuennataxac, cha'ayi aÿim mashi sevi' da aÿim npe'et souaxat da lchoxonnataxanaxa so qadataxala'.

²⁶ Aÿim da iuennataxac 'eeta': ca shiÿaxaua no'on da nachi 'eetai' saq ÿaxaneec cam hueta'a souaxat naua na'axa'te mayi soqolaqtaiguilo da ÿataqta huo'o da lqalai'c.

²⁷ Da huo'otaq huo'o aca 'adhua, qaq sa ishit da 'analate'. Qaq da huo'otaq saqaca aca 'adhua, qaq no'on da sa 'anmitaique.

²⁸ Qalaxayi da huo'otaq 'auadon, qaq qaica ca 'adasouaxashit. Qaq nachi 'en'am aca qa'añole da huo'otaq huadon, qaq sa ishit da huo'o ca lasouaxashit. Qalaxayi ca huadon, qaq ÿataqta huo'o da lqalaic lta'adaic da nachaalataxac. Qaq 'eda da lqala' mayi qami' sovitaqteetegalo.

²⁹ Qami' ÿaqaÿa't, da sauotaique shinapec 'eeta': Mashi sa qaÿadauec naua na'axa'te mayi soqolaqtaiguilo. Ÿoqo'oyi nagui na mashi huadon no'on da 'eeta'am da sa ishit da huo'o aca lhua,

³⁰ qataq nam huasoutacpi 'eeta'am da sa ishit da daquicotac, qataq na ntootapigui' 'eeta'am da sa ishit da ntootac, qataq na deshijnaxaatega na logoxoshitpi 'eeta'am da sa ishit da lalamaxat ca lshijnaxanaxat,

³¹ qataq nam do'onataxaatega na huetalecna 'eeta'am da sa ishit da do'onataxana. Cha'ayi na yi'oqchigui mayi huetalecna, taÿa'a da imeuo.

³² Ñishitaique da ÿataqta qami' huosochiyiñi, qaica ca qami' nqanaxa't. Ca shiÿaxaua da ñaq lamaxaic, ÿataqta nalamaqteguet da quetague' so qadataxala', cha'ayi nshitaique da qaÿaÿamaxadeeta.

³³ Qalaxayi da huo'otaq mashi huadon, nachi imelec na n'onatacpi mayi huetalecna, cha'ayi nshitaique da machiguiñi naq'en aca lhua.

³⁴ Nataq'en aca 'alo mashi huadon sa ishit da 'en'am aca lamaxai. Cha'ayi aca lamaxai ÿataqta nalamaqteguet da quetague' so qadataxala', cha'ayi nshitaique da imauec da ÿanot ñi Dios da l'oquiaxac qataq som capegue' lqui'i. Qalaxayi aca mashi huadon ÿataqta imelec na n'onatacpi mayi huetalecna, cha'ayi nshitaique da machiguiñi naq'en ca lhua.

³⁵ De'eda i'aqtac mayi qami' sanema, damayi maichi qanaÿamaxataxaqui, qaq sa ishit da qami' 'ico' secoñidai'salo. Chaqdata da ñishitaique da qaica ca qan'aqtaguiiqui sa ÿaÿamaxañi qataq yaqto' qaica ca qami' nqanaxa't da qoquiitague' so qadataxala'.

³⁶ Qalaxayi da huo'o ca shiÿaxaua da ila'a da sa ÿaÿamaxañi da sa huadon aca llale, souaxat da napacalec so laloxoquíctaxa da huadon, qaq camayi da ila'a da iuen da huadon acamayi, qaq no'on da i'ot ca 'eetapeguec. Sa ishit da huo'o ca lasouaxashit da ÿadonaxanaxan aca llale.

³⁷ Qalaxayi da huo'o ca lÿa shiÿaxaua qaica ca 'ico' ÿamaqtalec da huo'o ca i'ot, chaqdata da huosochiguiñi, qaq da huo'otaq mashi nmate' da lhuennataxac da huo'otaq sa ÿadonaxanaxan aca llale, qaq ÿaÿamaqchiguiñi da sa ÿadonaxanaxan.

³⁸ Ÿoqo'oyi ca ÿadonaxanaxan aca llale ÿaÿamaqchiguiñi da 'eetec. Qataq ca sa ÿadonaxanaxan aca llale nachi 'en'am ÿacteec da ÿaÿamaqchiguiñi.

³⁹ Aca 'alo mashi huadon, acamayi sa ishit da qansogoñi da ladonaxac qom ña nca'altauec ca lhua. Qalaxayi ca lhua da huo'otaq mashi ileu, nachi acamayi ÿataqta huosochiguiñi da huo'otaq huadonguet ca lÿa shiÿaxaua, qalaxayi 'onaxaic da l'amqajnataxanaxaua.

⁴⁰ Qalaxayi acamayi ÿataqta ÿacteec da machiguiñi da sa ishit da ÿi'iguelaxalec da ladonaxac. Qaq 'eda da iuennataxac, cha'ayi aÿim nataq'en sa'amaqten da aÿim netanguit so Espíritu mayi chigoqo'ot ñi Dios.