1 Corintios 6 - Nuevo Testamento Toba Sur

Qaiÿaxanot ca nta'a mayi saxanaxa da da'amqajnataxan da ÿaÿamaxajñi ca nasouaxashit

¹ Da huo'o ca 'oonolec da qoñiita nasouaxata'ai' ca lÿa 'amqajnataxanaxaic, qaq ¿táloxochiyo' da iÿaxanot ca nta'a mayi saxanaxa da da'amqajnataxan da ÿaÿamaxajñi ca nasouaxashit, qaq sa ishit da iÿaxanoigui nam lalamaxatpi ñi Dios?

² Qaq ¿sa qauaÿajñiÿo' da na lalamaxatpi ñi Dios ishit da nmit qome 'enauac na huetalecna shiÿaxauapi? Qaq da ishit qome da qanmichi 'enauac namayipi, qaq ¿huá'ago' da sa qanaloitau'a da qanmichi ca 'eeta'am de'edatai' saq 'amaqtaq?

³ ¿Sa qauaÿajñiÿo' da sovidaqa'a qome da ñimitaq nataq'en na chigaqshiguem Dios lamaxashicpi? Qaq ¿táloxochiyo' da sa yaloqtau'a da ñimita'q naua saq 'amaqtachi mayi huelguete da qanachaalataxac?

⁴ Cha'ayi da huo'otaq huo'o ca 'eeta'am de'eda cotaxac qami' huelguete, qaq ¿tá'ainco' yi qauÿaxañiÿa cam sa ishit da taÿapegueu'a na 'amqajnataxanaxaicpi da ÿaÿamaxajñi?

⁵ Qaq damayi shinapec, yaqto' huo'o da qad'alqoi. 'En'amo' da ÿoqta qaica ca 'oonolec da qoñiita da nalotau'a da nmit ca lasouaxashit ca l'amqajnataxanaxaua.

⁶ Da huo'o ca 'amqajnataxanaxaic huo'otaq nasouaxata'ai' ca l'amqajnataxanaxaua, qaq ¿iuen peta'a da iÿaxanot ca nta'a mayi sa da'amqajnataxan da ÿaÿamaxajñi?

⁷ Ÿoqta 'eesa da huo'otaq huo'oi naua cotaxaco qami' huanguilo, nachi yi'oq naq'en da huo'o da qadasouaxashichi. ¿Sa ÿaÿamaxaño' da qan'añaxachiiguet cam qami' qai'oteque sa ÿaÿamaxañi? ¿Sa ÿaÿamaxaño' da qauauaqaita'a da qami' qaicachiÿoto?

⁸ Qalaxayi qami' chaqdata da qauviyiÿa'a da qau'ochiic ca sa ÿaÿamaxañi ca maichi qad'amqajnataxanaxauai, qataq qaucachiitacot.

^9-10 ¿Qami' sa qauaÿajñiÿo' da ca i'otec ca sa ÿaÿamaxañi ca lÿa, qaq sa ishit da inoxoneu'a ca ñaq natauo l'onataxanaxac ñi Dios? Sa ishit qome da qaupe'enaxañi. Cha'ayi sa ishit qome da inoxoneu'a que'eca l'onataxanaxac ñi Dios nam quetaigui da lquishiguetaxac, qataq na natameetacot na nqolacpi, qataq na lauatapiguiñi' aca sa lhua, qataq na huetapeeguet ca 'eeta'am lÿa shiÿaxaua, qataq na cachaxaicpi, qataq na mataxalaicpi, qataq na taxaicpi, qataq na n'aqtaqa l'o'pi, qataq na ÿayin ca lÿa da nqat aca alom.

¹¹ Qaq huo'o co'ollaxa da qoñiita na 'eeta'am ne'enapi. Qalaxayi mashi qami' qaiqui'itaxatte', qataq mashi qanañañiÿot ñi Dios, qataq ñimayi mashi qami' ÿaÿamaxadeete'. Qaq 'enauac de'eda chigoqchigui so qadataxala' Jesús qataq so Espíritu mayi chigoqo'ot ñi qadta'a Dios.

Da qad'oquiaxac lalamaxat ñi Dios

¹² 'Eesa quenaxa da n'aqtac da 'eeta': “Sa ishit da qaillapeguem ñi 'oonolec da maichi ÿoiqueetac ca i'ot,” qalaxayi sa ishit da 'enauac na lataxaguesat da n'onaxat ca shiÿaxaua. Aja', 'eesa da sa ishit da qaillapeguem ñi 'oonolec da maichi ÿoiqueetac ca i'ot, qalaxayi ca shiÿaxaua sa ishit da ÿauaqta'a da 'ico' lcoñitaguishic ca i'ot.

¹³ 'Eesa quenaxa da n'aqtac da 'eeta': Ca nallic qai'ot da tangui ana qad'am, qaq ana qad'am qai'ot da yaqto' ÿaconguet ca nallic. Qalaxayi ñi Dios taÿa'a da nlaxajyiñi ne'enaua dos. Qaq sa ishit da qai'ot da qad'oquiaxac da taÿaigui da nquishiguetaxac. Chaqdata da qai'ot damayi da lalamaxat so qadataxala', qaq so qadataxala' anac da nca'alaxateec da qad'oquiaxac.

¹⁴ Qaq ñim Dios mayi nca'aleec naq'en so qadataxala' co'olla qaÿalauat, ñimayi nataq'en taÿa'a da qomi' nca'aldeec naq'en, do'onataxana da maichi l'añaxac.

¹⁵ ¿Sa qauaÿajñiÿo' da l'oquiaxac ñi 'oonolec da qoñiita da n'attau'a da l'oquiaxac so Cristo? Qaq ¿ishit peta'a da ñaqateu'a de'eda i'oquiaxac mayi n'attau'a da l'oquiaxac so Cristo, ime, qanachi n'adeu'a ñaq'en da l'oquiaxac aca quishiguetaxai? ¡Sa ÿauango' da nachi shiitec de'eda!

¹⁶ Qalqo' ¿sa qauaÿajñi peta'a da huo'otaq huo'o ca huadonguet aca quishiguetaxai, nachi que'ecaua dos 'eeta'am da 'oonolec da n'oquiaxac? Cha'ayi nachi 'enapec naua ñiyigui'shi l'aqtaqa ñi Dios, 'eeta': “Caua dos ivilda'a da 'ico' 'oonolec.”

¹⁷ Qaq ÿoqo'oyi ca 'oonolec shiÿaxaua da n'attau'a so qadataxala', nachi 'eeta'ama da 'oonolec, cha'ayi ncoñittragui so Espíritu Santo.

¹⁸ Ÿoqo'oyi qauataiueguesop da nquishiguetaxac. Na laÿipi sa ÿaÿamaxañi mayi ishit da i'ot ca shiÿaxaua, namayipi sa ishit da pa'aigui da l'oquiaxac. Qalaxayi cam quetaigui da lquishiguetaxac, qaq camayi maichi ÿasouaxat da lalamaxat l'oquiaxac.

¹⁹ ¿Qami' sa qauaÿajñiÿo' da qad'oquiaxaqui da 'eeta'am da lauo' so Espíritu Santo mayi qami' ÿanema ñi Dios, qaq somayi qami' netaiguilo? Qaq ÿoqo'oyi qami' sa ishit da qadalamaxachi da qad'oquiaxaqui,

²⁰ cha'ayi ñi Dios co'olla qami' deshijnaxanalo, qalaq ÿataqta sa nalañi da qadashiichiÿaxaqui. Ÿoqo'oyi ÿataqta qaumachiÿo'ot ñi Dios da lli'oxonnataxanaxac da qad'oquiaxaqui qataq ñi qoquiÿapegue' qadqui'ii, cha'ayi naamayi lalamqa'te ñi Dios.