1 Corintios 5 - Nuevo Testamento Toba Sur

Da nadonaxac mayi sa qaÿaÿamaxaden

¹ Mashi sogote da qaÿaÿajna'a't da huo'o ñi 'oonolec da qoñiita qami' netanguilo mayi huadoota'aguet añi l'aale late'e. De'eda nadonaxac, damayi ÿataqta sa qaishitapec. Ivida'a na saxanaxa da ÿauatton ñi Dios ÿataqta sa ishitapec de'eda.

² ¡Qalaq ñaq 'eetalec da qami' ÿashittaguilo da qañi'oxonnaxaqui! ¡Qamaq ishíttaxa da ÿataqta qauaquicoita! Qaq que'eca shiÿaxaua mayi i'ot de'eda lta'adaic sa ÿaÿamaxañi, ÿataqta qauamaqÿauéctaxa da sa ishit da nachi 'eetai' da qami' netanguilo.

³ Nai'ctaxa da sa ishit da yi'oqchigui da qami' ñachattaiguilo, qalaxayi da iqui'iÿaxac mashi sogote da qami' hueta'agueta. Qaq mashi sogote da ñimattague' da iuennataxac da 'en'am da mashi qaÿamaqhuec que'eca shiÿaxaua mayi i'ot de'eda lta'adaic sa ÿaÿamaxañi, 'eeta'am da mashi qami' soota'agueta.

⁴ Qalapoñiÿa't qome da qanataÿigui da l'enaxat so qadataxala' Jesucristo. Qaq aÿim 'eeta'am da qami' ñachattaiguilo, qataq da l'añaxac so qadataxala' Jesús qami' hueta'agueta.

⁵ Ime, qanachi que'eca shiÿaxaua qoÿanguet so Satanás, yaqto' qanlaxajñi da l'oquiaxac, qalaxayi qanca'alaxateec som capegue' lqui'i, qom ñi'iguelaq so qadataxala' Jesús.

⁶ Qami' sa ÿaÿamaxañi da qañi'oxonñiitapigui da qau'ochiitac. ¿Sa qauaÿajñiÿo' naxa da n'aqtac mayi 'eeta': “Aca saq 'amaqtaq lalecte ana pan ishit da quichigui da ÿashiidaxachigui 'enauac ca ndaqnguishic 'ayiiña”?

⁷ Qaq ÿoqo'oyi qanqachiiuec qome ana toguishi lalecte ana pan mayi ishit da qami' n'aqchi't, yaqto' qami' qoñiÿa'am ca dalaxaic ndaqnguishic mayi sa qaÿauo'o aca lalecte da qai'ot ana pan mayi taÿaigui da qanallic da iviteuga ca naponaxaqui mayi l'enaxat la pascua. Cha'ayi qami' mashi qoñiÿa'am ca dalaxaic ndaqnguishic. Cha'ayi so Cristo mashi sogote da qaÿalauat da qomi' ileualguete, qaq somayi nachiso so 'ico' qagueta llalec mayi qanallic da iviteuga que'eca la pascua.

⁸ Qaq ÿoqo'oyi da qolaqtague' ñi Dios, no'on da soqolaxague da huosochiguiñi ñiquiaxac qataq da 'eesa lataxac mayi 'eeta'am da qanallic ana pan mayi qaca aca lalecte. Qaq sa ishit da soqolaxague da sa ÿaÿamaxañi qataq ca qauem mayi 'eeta'am ana pan mayi huo'o aca lalecte.

⁹ Aso lÿa ÿide mayi mashi qami' samaxalo shiitega caillayi da sa ishit da qaualliquiiguet na quishiguetaxaicpi.

¹⁰ Sa ishit da shiitega da imauec da sa qaualliquiiguet 'enauac na shiÿaxauapi mayi quishiguetaxaicpi, huo'otaq mataxalaic, huo'otaq cachaxaic, huo'otaq nam natameetacot na nqolacpi. Cha'ayi da qavichiitega namayipi, qaq 'en'am da ÿataqta qoquiÿa'ai ana 'alhua.

¹¹ Da shiitega 'eeta': sa ishit da qaualliquiitapeeguet da huo'o ca 'eetega da qad'amqajnataxanaxauai, qalaq quetaigui da lquishiguetaxac, huo'otaq mataxalaic, huo'otaq natameetacot na nqolacpi, huo'otaq n'aqtaqa l'o', huo'otaq taxaic, huo'otaq cachaxaic. Qataq ivida'a da sa ishit da chochi qadqui'axauai ca nachi 'eeta'ac de'eda.

^12-13 Cha'ayi aÿim sa ishit da sa'aualec da ñimit ca saxanaxa da da'amqajnataxan. Ñim Dios mayi nmit qome namayipi. Qaq qami' mayi ishit da qanmichi na mashi da'amqajnataxan. Qaq ÿoqo'oyi qanqachiiuec ñi'iñi 'itaxaloxoic mayi qami' netanguilo.