1 Corintios 4 - Nuevo Testamento Toba Sur

L'onataxanaxa'c soua Jesús lamaxa'shi

¹ Qaq ÿoqo'oyi qami', da qomi' qautaqÿalo, qalaq qomi' qauamachiÿa'aque da qomi' lta'u so Cristo, qataq qomi' qaipataxalguete da sapaxaguenataxanaxac da lataxac saq cha'a mayi chigoqo'ot ñi Dios.

² Qaq ÿoqo'oyi cam huo'o ca qaipataxalec iuen da ÿataqta npe'et.

³ Qaq aÿim sa setena'a da huo'o ca aÿim qai'añiitapoigui, huo'otaq da aÿim qaÿataxanot ca yi'oqchigui nta'a da aÿim nmit. Nachi 'en'am aÿim sa ishit da maichi ñimitteguela't.

⁴ 'Eesa da ñitounaxac da sa ishit da yi'aloqchittac, qalaxayi sa ishit da sa'aualec da shinapec da saqca ca ÿasouaxashit. Cha'ayi so qadataxala' Jesús mayi nachiso so aÿim nmit qome.

⁵ Qaq ÿoqo'oyi qami' sa ishit da huo'o ca qau'aviÿalec da qanmichi. Qauachiÿa'aguet so qadataxala' qom ñi'iguelaq da yi'oq naq'en na huetaigui na napalaxa. Somayi mayi yi'aqlec naq'en na 'eetapeguecpi ana nquiyaqtepi. Ime, qanachi ñi Dios ÿaconguet ca 'oonolec da ÿanem ca 'itchiguiñi naÿamaxannataguec.

⁶ Qami' ÿaqaÿa't, de'eda qami' sa'axatema, damayi maichi qadaÿamqai. Saloqnaxaatapigui so Apolo qataq aÿim, yaqto' qami' ishit da qauachigoqoichigui da shinaqta da qauaÿajñi da sa ishit da qanapaquiÿapeguelguete naua ñiyigui'shi n'aqtaqa, yaqto' qaica ca n'amaqchiitacot ca lÿa, qaq ca lÿa i'otan.

⁷ Cha'ayi ¿négue't ca 'am ÿanagui da 'anataÿaña na 'adaÿipi? ¿Negue'to' ca saq chigoqo'ot ñi Dios na 'am hueto'ot? Qaq ñimayi da 'am ÿanem na 'am hueto'ot, qaq ¿tá'ainco' yi 'an'amaqchiitac, 'eeta'amo' da 'enauac na 'am hueto'ot maichi 'ad'añaqtaguishic?

⁸ Qami' 'eeta'am da mashi qami' sallaxanqa, qataq qami' hueto'oto 'enauac nam qauviñiitac. 'Eeta'am da mashi qami' nta'al, qaq qomi' nachi qomi' qauasaqaitreec. ¡'Onaxaico' da ÿataqta 'eesa da qami' nta'al, yaqto' qami' ñiuanaqhua'alo da qomi' nta'al nataq'en!

⁹ Cha'ayi yi'oqta da ñi Dios ipa'axaatreec qomi' mayi qomi' Jesús lamaxa'shi da saqca ca qad'amaqchic. Shinaqta'am ca shiÿaxaua mayi taÿa'a da qaÿalauat souaxat da lasouaxashit. Sovidaqta'aguet da qomi' i'aalaque da qomi' imete'n 'enauac na chigaqshiguem Dios lamaxashicpi qataq 'enauac na shiÿaxauapi.

¹⁰ Qaq qomi' qaÿamata'aque da qaica ca saÿajnaq, souaxat da soqolaqtague' so Cristo, qalaq qami' qanamachiitala't da qami' ÿajnaxanaxaiqa so Cristo. Qomi' qaica ca qad'añaxac, qalaq qami' qanamachiitala't da qami' 'añaxaiqa. Na shiÿaxauapi qomi' n'otanguilo, qalaq qami' ÿataqta huo'o naq 'enec qanqoÿin.

¹¹ Nagui ñaq 'eetalec da huo'o ca qanque'etaxanaxac na qadqouaxa, qataq na qadaquip, qataq qaica ca ñapoxoña. Na shiÿaxauapi qomi' iuaxaatalguete, qataq qaica ca ÿoqta qadma'.

¹² Ñasamaqtañi souaxat da yi'oqchigui qad'onataxanaxac. Na shiÿaxauapi qomi' ishiueetalguete, qalaq qomi' sedoxolguete naua qadtaxaÿaxaco ÿaÿamaqchiyiñi. Qomi' qaicaata'pe, qalaq ñi'añaxataxaguet da qancanaguec.

¹³ Qomi' qaÿasaxalguete naua ntaxaÿaxaco sa ÿaÿamaxayiñi, qalaxayi huo'o da qadhualaxavic da saqataqtega. Qaq nagui ñaq 'eetalec da qomi' qai'enaxatteguema ca lasogoñi, huo'otaq na lte nam ÿasaxauec na shiÿaxauapi.

¹⁴ De'eda shiyiñi damayi sa ishit da huo'otaq ñishitaique da qami' sa'aloqchi't. Chaqdata da ñishitaique da qami' saqatalo, se'enaxatteguema qami' da ÿauotaxanaqtaic ca ÿalec.

¹⁵ Cha'ayi nai'ctaxa da qami' ivi' ca diez mil na qami' ÿapaxaguenque so Cristo, qalaxayi sa ishit da qalota na qadta'aipi. Cha'ayi aÿim mayi aÿim lta'a da qadpi'iÿaxaqui so Cristo Jesús. Cha'ayi aÿim mayi qami' sa'axatema co'ollaxa da no'on qad'axaÿaxac mayi chigaqaigui da nca'alaxa.

¹⁶ Qaq ÿoqo'oyi qami' ñachoxodeetoiguilo da qoquiitelec da ÿataxac.

¹⁷ Qaq ÿoqo'oyi mashi qami' samaxalo so Timoteo mayi 'eeta'am da ÿalec, cha'ayi aÿim ÿachigoxotchigui da quetague' so qadataxala'. Somayi qami' iuennataxanaxanque da 'eetec da ÿataxac da shictague' so Cristo dam sapaxagueetapeguec 'enauac ana qad'onaxanaxaquipi mayi neta'alo naua 'ale'u.

¹⁸ Huo'o ca 'oonolec da qoñiita ÿashittagui da ñi'oxonnaxac, ipettega da huo'otaq aÿim sa ishit da qami' ñamaqtegalo.

¹⁹ Qalaxayi saqaÿaloq da qami' ñauaneto, qom aÿim ÿanem ca ÿiquiaxac so qadataxala'. Hua'a, qanachi ishit da saÿaten chaq 'eetec da l'añaxac que'eca ñi'oxonnaxaicpi, yaqto' sa ishit da chaqdata da l'aqtac mayi qai'axattac.

²⁰ Cha'ayi da l'onataxanaxac ñi Dios da ilo'ogue 'enauacna sa ishit da chochi ndoxoiqa naua n'aqtaqa. Cha'ayi damayi ÿataqta n'añaxac.

²¹ ¿Négue't ca ÿoqta qaupaquiitaique da qami' sedolguete qom qami' ñoqo'onalo? ¿Peta'a qadavilliÿa da qami' sedolguete ca iuaxanaxanaxat, qalqo' da isoxoyic qataq da huosotta ÿataxac?