1 Corintios 3 - Nuevo Testamento Toba Sur

Qomi' n'onataxanaxauapi da l'onataxanaxac ñi Dios

¹ Ÿoqta 'eesa, qami' ÿaqaÿa't, da aÿim sa seshit co'ollaxa da setaxaiguilo qami' da se'enaxatteguema ca shiÿaxaua mayi netanguit so Espíritu Santo. Chaqdata da shiita'am ñaq'en qami' ca shiÿaxaua mayi ñaq quetaigui da lapachiyaxac, cha'ayi qami' 'ico' da ñaq nogotolec da qadpi'iÿaxaqui so Cristo.

² Qami' sanema da napaxaguenataxanaxac huosotta, 'eeta'am ñaq'en qami' ca nogotolec mayi ñaq lliptac qoÿaata'ai' na nchi', qaq sa ishit da qoÿanem ca nallic mayi sa nsatta. Cha'ayi qami' saxanaxa da ishit da qolliqui ca nallic mayi sa nsatta. Qaq nagui ñaq 'eetalec da saxanaxa da qaushichi da qolliqui ca sa nsatta nallic,

³ cha'ayi ñaq 'eetalec da qoquiitaigui da qadapachiyaxaqui. Cha'ayi da ña qannoita'a't, qataq qancotaitega't, qataq qaucolaqaitagui, qaq yi'oqta da qami' ña qoquiitaigui da qadapachiyaxaqui, qaq qoñiita'am da n'onataxac 'enauac na shiÿaxauapi.

⁴ Cha'ayi da huo'o ca 'enapec: “Aÿim ÿataxala' so Pablo,” qaq ca lÿa 'eeta': “Aÿim ÿataxala' so Apolo,” qaq yi'oqta da qami' qoñiita'am ca shiÿaxaua mayi quetaigui da lapachiyaxac.

⁵ Cha'ayi ¿négue't aÿim Pablo? qataq ¿négue't ca Apolo? Qomi' chaqdata da qomi' lamaxa'shi ñi Dios, qomi' qauachigoqoichiguilo da huo'o mshi qami' qau'amaqchiñi so qadataxala' Jesús. Ñi 'oonolec da shinaqta i'ot ca l'onataxanaxac mayi ÿachaxaalec ñi qadataxala'.

⁶ Aÿim saañi co'ollaxa da n'onataxanaxac, qaq so Apolo anac da icodelec, qalaxayi ñi Dios mayi i'ot da lañaxataxac.

⁷ Qaq ÿoqo'oyi ca danaxaatac qataq ca decodaxaatac qaica ca 'enec. Nachiñita ñi Dios mayi huo'o naq 'enec, cha'ayi ñimayi mayi i'ot da lañaxataxac da n'onataxanaxac.

⁸ Ca danaxaatac qataq ca decodaxaatac, caamayi 'eeta'a't, nai'ctaxa da ñi 'oonolec ÿaconguet da lashiichiÿaxac da l'onataxanaxac qom ishiiten ñi Dios.

⁹ Cha'ayi qomi' n'onataxanaxauapi da l'onataxanaxac ñi Dios. Qaq qami' 'ico' da qoñiÿa'am ca lanaxanqa' ñi Dios. Qami' nataq'en qoñiÿa'am ca noÿic mayi n'oxootapiguishiguem ñi Dios.

¹⁰ Qaq aÿim shiita'am ca ilotague' na noÿic l'opi, cha'ayi ñi Dios aÿim ÿanem da llapaxañi so n'oxonaxala' ca noÿic. Qaq na laÿipi n'oxootapiguishiguem somayi. Qalaxayi ñi 'oonolec iuen da ilotelec da lataxac da do'oxonaxan.

¹¹ Qaq ÿoqo'oyi qaica ca ishit da qaltaq lapaxañi ca lÿa n'oxonaxala' que'eca noÿic, cha'ayi mashi huo'o so qalapaqtañi. Somayi nachiso so Jesucristo.

¹² Qaq ca 'oonolec ishit da i'oxoolec se'eso n'oxonaxala' ca noÿic, do'oxonaxana ca oro, qataq ca plata, qataq ca qashilgaxadaic coma', huo'otaq do'oxonaxana ca qo'ipaq, qataq na 'auaqpi, qataq ana coqta late'e.

¹³ Ca l'onatac ñi 'oonolec yi'oq qom ivita ca pa'ateec na'a'q. Cha'ayi que'eca na'a'q anac ca nodec, qaq que'eca nodec ÿavigaxat na ÿotta'a't n'onatacpi. Huaña, qanachi yi'oq ca yi'oqta no'on l'onatac ñi 'oonolec.

¹⁴ Ñi 'oonolec ca n'oxooshiguem noÿic qom nala'aguet ca nodec, qaq camayi ÿaconguet aca nshiitenaqte.

¹⁵ Qalaxayi ca l'oxonec da huo'otaq ÿavic, huaña, qanachi daqat 'enauac da l'onataxanaxac, nai'ctaxa da camayi ishit da qanca'alaxateec, qalaxayi 'eeta'am ca llitec ca nodec.

¹⁶ ¿Qami' sa qauaÿajñiÿo' da qoñiÿa'am da qami' lauo' ñi Dios, qaq so Espíritu Santo mayi chigoqo'ot ñimayi qami' netaiguilo?

¹⁷ Qaq da huo'o ca nlaxajñi na lauo' ñi Dios, qaq ñimayi nlaxajñi que'eca shiÿaxaua. Cha'ayi ne'ena lauo' ñi Dios lalamaxat ñimayi, qaq ne'ena nhuo' nachida da qoñiita.

¹⁸ Qaica qome ca natenachittapeguela't. Da huo'o ca ipettega da ÿaÿaten da lliquiaxac na naÿajnec mayi lma'na, camayi no'on da nacoola't da qaica ca ÿaÿaten, yaqto' ÿataqta 'eesa da ÿajnaxanaxaic.

¹⁹ Cha'ayi da naÿajnec mayi lma'na, damayi 'eeta'am da chochi 'oopashic naq'en ñi Dios. Cha'ayi naua ñiyigui'shi l'aqtaqa ñi Dios 'eeta': “Ñi Dios maichi lqoinguishic naq'en na ÿajnaxanaxaicpi naua maichi lqoinaxanaxaco.”

²⁰ Nataq'en 'eeta': “Ñi qadataxala' Dios ÿaÿaten da lhuennataxac na ÿajnaxanaxaicpi da qaica ca naigui.”

²¹ Qaq ÿoqo'oyi qaica ca n'amqajnapec da ÿi'oxodeetac ca chochi shiÿaxaua, cha'ayi 'enauac na huetalecna, namayi qadalamaxachi:

²² nai'ctaxa da Pablo, huo'otaq Apolo, huo'otaq Pedro, huo'otaq ana 'alhua, huo'otaq da nca'alaxa, huo'otaq da nleuaxa, huo'otaq naua ñachaataqtaiguilo na'axa'te, huo'otaq ca ñaq natauo, cha'ayi namayi 'enauac qadalamaxachi.

²³ Nataq'en qami' lalamqa'te so Cristo, qaq so Cristo lalamaxat ñi Dios.