1 Corintios 2 - Nuevo Testamento Toba Sur

N'aqtaguec so Cristo co'ollaq qaiuaxaneuo

¹ Ÿoqo'oyi qami' ÿaqaÿa't, co'ollaq qami' ñoqo'onalo da qami' sa'aqtaxanema da 'eesa lataxac mayi chigoqo'ot ñi Dios, qalaq sa ishit da saconalo naua ltaxaÿaxaco na ÿajnaxanaxaicpi, huo'otaq naua pooco n'aqtaqa.

² Cha'ayi co'ollaq qami' soota'agueta, qalaq ñacoola't da sa ishit da huo'o ca lÿa tatapigui iuel, chaqsota so Jesucristo som qaiuaxaneuo.

³ Co'ollaq qami' ñachattaiguilo, qalaq qaica ca i'añaxac qataq yiviloxolaqchit da icolanaxa.

⁴ Ÿoqo'oyi co'olla setaqtac da sa'axattac da n'aqtac, qalaq sa ishit da saconalo naua ltaxaÿaxaco ca shiÿaxaua ÿajnaxanaxaic, da yaqto' qau'amqajnataxañi. Chaqsota so Espíritu Santo qataq da l'añaxac ñi Dios dam huo'o mshi qau'amqajnataxañi co'ollaq qami' sa'aqtaxaatapeguema.

⁵ Qaq ÿoqo'oyi da qadpi'iÿaxaqui sa ishit da n'attalec da laÿajnec ca chochi shiÿaxaua, chaqdata da l'añaxac ñi Dios.

So Espíritu Santo ÿauattonaxanaxanec na shiÿaxauapi ñi Dios

⁶ 'Eesa da qomi' setaxasoxoiguilo naua ntaxaÿaxaco ÿajnaxanaxaiqa, qalaxayi chaqnata nam mashi ÿataqta ÿi da lpi'iÿaxac. Qalaxayi de'eda naÿajnec sa ishit da lma'na, qataq sa ishit da chigoqo'ot na nta'alpi mayi huetalecna, nam taÿa'a da imeuo.

⁷ De'eda naÿajnec mayi sa'axataqtac, damayi naÿajnec saq cha'a mayi chigoqo'ot ñi Dios. Damayi nachida da maichi 'eetapeguec ñimayi co'ollaq saxanaqaca ana 'alhua da ÿauotaique qadca'alaxa chochaq tateec.

⁸ Na nta'alpi mayi huetalecna, qaica ca ÿaÿaten de'eda naÿajnec. Cha'ayi da huo'otaq ÿaÿaten de'eda, qaq sa ishíttaxa da qaiuaxaneuo so qadataxala' mayi ÿi'oxodaic.

⁹ Qaq tachigui da 'enapec naua ñiyigui'shi l'aqtaqa ñi Dios, 'eeta': Ñi Dios ÿaqataxaatapigui' da ÿanem cam ÿauotec ñimayi da 'achiquiaxac mayi qaica ca ishit da ila'a, huo'otaq hua'axaÿa, huo'otaq da iuennatapega.

¹⁰ Qaq 'eda da qomi' ÿauattonaxanaxanque ñi Dios, chigoqchigui naq'en so Espíritu Santo, cha'ayi somayi nmittac 'enauac, qataq ivida'a da ÿaÿaten na saq cha'a 'eetapeguecpi ñi Dios.

¹¹ Na shiÿaxauapi ¿negue'tom ca ishit da ÿaÿaten ca lhuennataxac ca lÿa shiÿaxaua? Chaqsota so capegue' lqui'i mayi ishit da ÿaÿaten. Qaq nachi 'eeta'am nataq'en so n'Espíritu ñi Dios, chaqsota mayi ÿaÿaten ca lhuennataxac ñi Dios.

¹² Qaq qomi' sa ishit da qomi' tanguita da nauattonaxanaxac mayi lma'na, chaqsota so Espíritu mayi chigoqo'ot ñi Dios, nachiso so qomi' tanguita, yaqto' saÿatenaq da 'achiquiaxac mayi qomi' ÿanema ñimayi.

¹³ Qaq qomi' da sa'axataq de'eda, nachi setaxasoxoiguilo naua n'aqtaqa mayi qomi' ÿapaxaguenque so Espíritu mayi chigoqo'ot ñi Dios, qaq sa ishit da nachinaua naua n'aqtaqa mayi sachigoxotaqaiguilo da maichi qadaÿajnataxanaxac. Qaq 'eda da 'eetec da sa'axata'q naua napoyiñi lataxaco da sa'aqtaxanaxam cam netanguita so Espíritu Santo.

¹⁴ Qaq ca shiÿaxaua mayi sa ishit da netanguit so Espíritu, sa ishit da ÿaconguet cam i'ot so n'Espíritu ñi Dios. Cha'ayi camayi da n'axaÿaxaatega, qalaq 'eeta'am naq'en da 'ico' chochi 'oopashic. Sa ishit da ÿaÿaten damayi, cha'ayi da qanmit, qalaq qaiuen da ltaunaxanaxac so Espíritu.

¹⁵ Qalaxayi ca shiÿaxaua mayi netanguit so Espíritu, camayi ishit da nmit 'enauac na lataxaguesat. Qaq camayi qaica ca ishit da nmit.

¹⁶ Qaq ÿoqo'oyi naua ñiyigui'shi l'aqtaqa ñi Dios 'eeta': “¿Negue'tom ca ishit da ÿaÿaten ca lhuennataxac ñi qadataxala' Dios? qaltaq ¿negue'tom ca ishit da ÿapaxaguen ñimayi?” Qalaxayi qomi' mashi qomi' hueto'oto da lhuennataxac so Cristo.