1 Corintios 16 - Nuevo Testamento Toba Sur

Qai'ot aca ntaunaqte na 'amqajnataxanaxaicpi mayi netaña yi Jerusalén

¹ Qaq qom qau'ochi aca ntaunaqte na qadqaÿañicpi 'amqajnataxanaxaicpi, qalaq qau'enaxachiichigui da ÿapaxaguenataxanaxac mayi sanem na 'amqajnataxanaxaicpi mayi netaña yi 'alhua, l'enaxat Galacia.

² Da iviteuga ca na'a'q l'auaxanec naua la semana, nachi ñi 'oonolec da qoñiita huo'o aca iÿotauga, qalaxayi acatai' nalotau'a nachaca ÿaÿamaxat, yaqto' sa ishit da iuen da qai'ot aca ntaunaxanaqte qom qami' sevitalo.

³ Qaq qom mashi qami' sevitalo, nachi samaxadegue da Jerusalén caua shiÿaxa'u mayi qalca'aiua'alo, qaq sachoxonaxanaxanque aca ÿide da yaqto' ida'a yi qadqaÿañicpi aca qadtaunaxanaqchi.

⁴ Qaq da iuen da nataq'en aÿim ashic, qaq ñinaicapegueto caamayi.

So Pablo ÿaqataxanai' da 'eetec da lliquiaxac

⁵ Da ÿiquiaxac sauotaique da sa'auaxaañi da satelec yi 'alhua, l'enaxat Macedonia, qaq qom ime, nachi ñoqo'ona na Corinto.

⁶ Qaq huo'otaq cada'ac da qami' soota'agueta, huo'otaq sovidaxatteec na n'omaxa da qami' soota'agueta, nachi qom ime, qaq ishit da aÿim qautauañi da ÿiquiaxac cam sata'ague.

⁷ Cha'ayi aÿim sa saÿamaxaden da chochi qami' saÿalguete. Chaqdata da ñishitaique da loiguilo caua na'axa'te da qami' soota'agueta, qom huo'otaq aÿim ÿashiitem so qadataxala' de'eda ÿiquiaxac.

⁸ Qalaxayi sauotaique da sonaña qome yi Éfeso, sovidaxattauga ca na'a'q Pentecostés,

⁹ cha'ayi yimayi ÿataqta aÿim nauatteguet da so'onataxan, da yaqto' saqalota na i'amaqten so qadataxala'. Qaq nai'ctaxa da saqalota na depa'aguenataxaatac.

¹⁰ Qom qami' nvitalo ca Timoteo, qaq ÿataqta qanpogoxoiñiÿapegue' da machiguiñi qanqashiñi, yaqto' qaica camachaqca. Cha'ayi somayi i'ottac da l'onataxanaxac so qadataxala', 'eeta'am aÿim.

¹¹ Ÿoqo'oyi qaica ca 'oonolec da qoñiita da i'otan somayi. Chaqdata da qautauañiic da lliquiaxac, yaqto' qaica ca da. Cha'ayi seuattaique camayi nataq'iñi caua lÿa't qadqaÿa't da yaqto' ñauaneto.

¹² Qaq so qadqaÿa Apolo ÿataqta qalota da ñachoxonnaxac da ñaq ca'attoiguilo soua qadqaÿa't da qami' nauaato, qalaxayi somayi sa ishit da jec nagui. Qalaxayi jec qom ivita da huo'o ca ldaqa'.

Da pa'ateec lquinaxanaxac so Pablo

¹³ Ÿataqta qanloiteec, qataq qan'añaxachiitec da qadpi'iÿaxaqui. Qau'enaxachi ca shiÿaxaua ÿataqta qadamchigui qataq 'añaxaic.

¹⁴ 'Enauac na qauacoñiilec da qau'ochi, qaq ÿataqta qami' soxodaiqa.

¹⁵ Qaq nagui, qami' ÿaqaÿa't mayi qoñiitaña na 'alhua Acaya, mashi qauaÿajñiita da na llalaqpi na Estéfanas da nachina na l'auaxanecpi da da'amqajnataxan da qoñiita, qataq namayipi ÿataqta nañanguet da itauan na qadqaÿañicpi 'amqajnataxanaxaicpi.

¹⁶ Ÿoqo'oyi ñishitaique da qami' nataq'en ÿataqta qaualaqailec ca shiÿaxaua 'eeta'am namayipi qataq 'enauac nam detaunaxaatac qataq do'onataxaatac.

¹⁷ Ÿataqta ñitootapeguec da nvilda'a na soota'a na Estéfanas, qataq na Fortunato, qataq na Acaico, cha'ayi naamayi ishit da i'o't dam sa qauañoxochi, souaxat da qomi' qaÿoqtachi.

¹⁸ Naamayi i'o't da ÿataqta ÿashitteec naq'en da ñachaalataxac, qata nataq'en da qoñiita. Ÿataqta qauauochiic qome ca shiÿaxaua 'eeta'ama naamayi.

¹⁹ Na 'amqajnataxanaxaicpi mayi netalec ne'ena 'alhua Asia, qami' ÿamaxalo da lquinaxanaxac. Ñi Áquila qataq añi lhua Priscila qataq na 'amqajnataxanaxaicpi mayi l'onaxanqa' yi lma', naamayi ÿataqta saqalota da lquinaxanaxac qami' ÿamaxalo, cha'ayi qami' l'amqajnataxanaxa'u.

²⁰ Qami' ÿamaxalo da lquinaxanaxac 'enauac na qadqaÿañicpi. Ÿataqta napigoq qome ñi 'oonolec ca lÿa da nquine', ÿataqta qanchoxonñiÿa't.

²¹ Aÿim Pablo qami' samaxalo da iquinaxanaxac, damayi maichi semapegue' da shiyiñi.

²² Da huo'o ca sa ishit da ÿauotec so qadataxala' Jesucristo, camayi huetalec da lta'adaic nhuaxanaguec. ¡'Am qadataxala', saqaÿaloq qome da 'ayi'iguelaq!

²³ Qaq so qadataxala' Jesucristo qami' ÿanema qome ca no'on qoyiquiaxaqui.

²⁴ 'Enauac da qoñiita qami' samaxalo da isoxoyic mayi chigoqo'ot so Cristo Jesús. Aja', nachi 'eetec de'eda.