1 Corintios 15 - Nuevo Testamento Toba Sur

So Cristo mashi sogote da nca'aleec qanqoÿin

¹ Qaq nagui qami' ÿaqaÿa't, ñishitaique da qami' souennataxanaxanque de'eda n'aqtac mayi chigaqaigui da nca'alaxa, dam ñaq qoquiitalec nagui, mayi qami' sa'axatema co'olloxochiyi, nachi qau'amaqchiñi.

² Damayi chigoqchigui da huo'o mshi qami' qanca'alaxatreec, qom qoquiitelec dam qami' sa'axatema, qataq qom sa ishit da chochi n'ajnaxaic da qadpi'iÿaxaqui.

³ Da sa'auaxaachiguiñi qami' sapaxaguenque dam nataq'en aÿim qoÿanem, damayi 'eeta': So Cristo ileualec da qayi'itaxaloxo, qaq damayi ipacchigui da 'enapec naua ñiyigui'shi l'aqtaqa ñi Dios.

⁴ Nataq'en qami' sapaxaguenque da so Cristo qailayiñi, qaq co'olla inoxoodeec soua tres na'axa'te, nachi qaltaq nca'aleec qanqoÿin. Qaq damayi ipacchigui da 'enapec naua ñiyigui'shi l'aqtaqa ñi Dios.

⁵ Qaq ime, nachi somayi nachaxana so Pedro, ime qaltaq jec soua lÿa't lamaxa'shi.

⁶ Ime, qanachi qaltaq nachaxana so saqalota qadqaÿañicpi napacalec ca quinientos. Qaq saqalota nagui namayipi na ña nca'altauec, qataq huo'o na mashi qanmataxanaxaneec.

⁷ Ime, qanachi qaltaq nachaxana so Santiago, ime qaltaq jec 'enauac so laÿipi lamaxashicpi.

⁸ Ime, qaltaq jec aÿim sepa'ateec, aÿim nachaxana nataq'en somayi, nai'ctaxa da aÿim shin'am da lañoxoc ca nogotolec mayi ichiÿa'a ca laloqo' da ñiguiñi.

⁹ Cha'ayi aÿim qaica ca i'amaqchic, saq shin'am na laÿipi lamaxashicpi so Jesús, qataq sa yalou'a da aÿim qoÿanagui da aÿim lamaxashic somayi, cha'ayi secaatac na i'amaqteetacpi ñi Dios co'olloxochiyi.

¹⁰ Qalaxayi da lqouagaxanaqtaic ñi Dios nachida da huo'o mshi aÿim nagui, qaq de'eda ñoqouagaxa sa ishit da saqca ca naigui. Cha'ayi aÿim ÿacteec da i'onataxanaxac, ñapacalec 'enauac na laÿipi namaxashicpi. Qalaxayi sa ishit da nachaÿim, nachida da lqouagaxanaqtaic ñi Dios mayi aÿim ÿanem.

¹¹ Qaq nai'ctaxa da huo'otaq aÿim ÿacteec da i'onataxanaxac, huo'otaq namayipi, qalaxayi 'eda da qad'aqtaxanaxac, qaq 'eda da qau'amaqchiñiitac.

Qom nca'aleec qanqoÿin na leuaxaicpi

¹² Qalaxayi da qomi' sa'axataqtapeguec so Cristo da mashi sogote da Dios nca'aleeguesop naq'en da nleuaxa, qaq ¿tá'ainco' yi huo'o da qoñiita na 'eetega da sa ishit da nca'aleec qanqoÿin na leuaxaicpi?

¹³ Cha'ayi da ÿoqta 'eesa da sa ishit da nca'aleec qanqoÿin na leuaxaicpi, qaq sa ishíttaxa da nca'aleec qanqoÿin so Cristo.

¹⁴ Qaq da sa ishíttaxa da nca'aleec qanqoÿin so Cristo, nachi da sa'axataqtac qaica ca naigui, qata nataq'en da qadpi'iÿaxaqui.

¹⁵ Qaq da nachi 'eetec de'eda, nachi qomi' shinaqta'am da chochi qomi' tenataxanaxaiqa, cha'ayi sa'axataqtac da ñi Dios nca'aleec naq'en so Cristo. Cha'ayi da sa ishit da 'en da nca'aleec qanqoÿin na leuaxaicpi, nachi ñi Dios sa ishíttaxa da nca'aleec naq'en so Cristo.

¹⁶ Cha'ayi da sa ishit da nca'aleec qanqoÿin na leuaxaicpi, nachi so Cristo sa ishíttaxa da nca'aleec qanqoÿin.

¹⁷ Qaq so Cristo da sa ishíttaxa da nca'aleec qanqoÿin, nachi da qadpi'iÿaxaqui qaica ca naigui. Qataq ñaq 'eetalec da huo'o da qadasouaxashichi.

¹⁸ Qaq nataq'en na mashi qanmataxanaxaneecpi nam quetañi' da i'amaqten so Cristo, namayipi imauec da daqat.

¹⁹ Qaq de'eda qanachaalataxac mayi ña ñachaataqtaigui nagui, da nachaqdata da huetaigui da qanaquitaxac so Cristo, qaq ÿataqta ÿacteec da qadachoxoyic, saq shinqa'am 'enauac na laÿipi.

²⁰ Qalaxayi ÿoqta 'eesa da so Cristo sogote da Dios nca'aleeguesop naq'en da nleuaxa. Somayi nachiso so l'auaxanec na leuaxaicpi da qanca'alaxateec nam taÿa'a da nataq'en qanca'alaxateec.

²¹ Cha'ayi de'eda nleuaxa chigoqchigui co'olloxochiyi so 'oonolec shiÿaxaua, qaq nachi 'eetec nataq'en chigoqchigui so lÿa shiÿaxaua da ishit da qanca'alaxateec na leuaxaicpi.

²² Cha'ayi de'eda 'eetec da 'enauac na shiÿaxauapi ileu, souaxat da n'attau'a so Adán, qaq nachi 'eetec nataq'en ishit da qaltaq qanca'alaxateec 'enauac namayipi, souaxat da n'attau'a so Cristo.

²³ Qalaxayi ñi 'oonolec ÿataqta ca maichi lalamaxat lliquiaxac. So Cristo mashi sogote l'auaxanec da nca'aleec qanqoÿin. Ime, qaltaq jec na lalamaxatpi, qom ñi'iguelaq somayi.

²⁴ Qom ivita ca loga'tna, nachi so Cristo nlaxajñi da l'añaxac 'enauac na ÿotta'a't damaxasoxonapec nta'alpi mayi saq cha'a. Huaña, qanachi ÿanot da l'onataxanaxac da ilo'ogue 'enauacna ñi qadta'a Dios.

²⁵ Cha'ayi so Cristo ñaq 'eetalec da nta'a, chochi ivitta'a que'eca na'a'q qom ñi Dios ÿapiaxanaxanaxaalec 'enauac na ipa'agueetacpi.

²⁶ Qaq ca pa'ateec pa'aguenaxaua mayi qanlaxajñi, nachica ca nleuaxa.

²⁷ Cha'ayi ñi Dios mashi ipataxalec da ilo'ogue 'enauacna so Cristo. Qalaxayi naua ñiyigui'shi l'aqtaqa ñi Dios qom 'enapec da qaipataxalec 'enauacna somayi, qaq sa ishit da ñi Dios ÿalectoigui 'enauacna, cha'ayi ñimayi nachiñi ñi chigoqchigui da ipataxalec somayi 'enauacna.

²⁸ Qaq qom ivita da mashi ime da qaipataxalec 'enauacna so Cristo, qaq somayi som llalec ñi Dios nachi nañanot ñi lta'a Dios ñim chigoqchigui da ipataxalec somayi da ilo'ogue 'enauacna. Huaña, qanachi ñi Dios imata da ilo'ogue 'enauacna.

²⁹ Qaq ¿huá'ague ca 'eetec yi huo'o na nañan da qanachilaxan da nshitaique da 'ico' qanachilaxan ca leuaxaic? ¿Tá'ainco' yi i'ot de'eda? Da huo'otaq sa ishit da nca'aleec qanqoÿin na leuaxaicpi, ¿tá'ainco' yi nañaalec namayipi da qanachilaxan?

³⁰ Qataq qomi' ¿tá'ainco' yi ñañanaxaguet 'enauac na lchiguesat naua qan'axa'tesa'chi?

³¹ Ÿataqta 'eesa, qami' ÿaqaÿa't, da 'enauaque naua na'axa'te satata'aguet da nleuaxa, qaq de'eda ÿataqta 'en, 'eeta'am da ñitonaxac da qami' ñitootapegueque, cha'ayi mashi qau'amaqchiñi so qadataxala' Jesucristo.

³² Aÿim 'eeta'am da ÿataqta selogui' na shiguiÿacpi co'ollaq soota'a na Éfeso, qalaxayi ¿negue'tom ca sachigoxotaigui damayi? Da huo'otaq sa ishit da 'en da nca'aleec qanqoÿin na leuaxaicpi, qaq ÿoqta 'eesa quenaxa da n'aqtac mayi 'eeta': “Sequi'aq qataq ñiÿomaq, cha'ayi qome nte' seleuaq.”

³³ Sa ishit qome da qami' qaÿatenachi't. 'Eeta'am da 'enapec quenaxa da n'aqtac, 'eeta': “Ca qauemaic shiÿaxaua n'aqchit ca no'on n'onataxac ca lÿa.”

³⁴ Qami' qavi'iguelaqaÿa qome da achaalataxac qui'itta qataq sa daÿactac, qataq qai'axañiiuec da qayi'itaxalqoi, cha'ayi huo'o da qoñiita na sa ishit da ÿauatton ñi Dios. Qaq de'eda shinapec, yaqto' huo'o da qad'alqoi.

Da 'eetec da lataxac qom nca'aleec na leuaxaicpi

³⁵ Qalaxayi sa iuena'a da huo'o ca denataxan, 'eeta': “¿Huá'ago' ca 'eetec da qalta qanca'alaxateec na leuaxaicpi? ¿Chaq 'eeteco' qome ca l'oquiaxac?”

³⁶ De'eda nnataxanaxac ÿataqta 'itaxalagui. Cha'ayi da huo'otaq qoÿaañi aca nanguishi ala, qaq asa'aso nanguishi sa ishit da ñaxat qom saxanaxa da ileu.

³⁷ Aca qoÿaañi sa ishit da nachaca aca llaxataxa. Mayi nachaso aso ala mayi qoÿaañi, huo'otaq trigo ala, huo'otaq aca machaqca lÿa.

³⁸ Ime, qanachi ñi Dios ÿanem aso llaxataxa da 'eetec da lataxac; añi 'oonole nanguishi ala ipacchigui naq'en da maichi lataxac.

³⁹ Sa ishit da 'enauac da 'eeta'a't da n'oquiaxac. Cha'ayi na shiÿaxauapi huo'o da maichi lalamaxat l'oquiaxac. Nachi 'en'am na shiguiÿacpi, huo'otaq na huaÿotac, huo'otaq na 'etaxat l'ec. Namayipi sa ishit da 'en'a't da l'oquiaxac.

⁴⁰ Nachi 'eetec nataq'en huo'o da maichi lataxac na hueto'ot na piguem, qataq huo'o da maichi lataxac na huetalec ana 'alhua. Qalaxayi da lyaquiaxac nam hueto'ot na piguem sa ishit da 'en'am da lyaquiaxac na huetalecna.

⁴¹ Na l'edaxa añi nala' sa ishit da 'en'am na l'edaxa so ca'agoxoic, huo'otaq ana huaqajñipi. Cha'ayi nataq'en ana huaqajñipi sa ishit da 'en'a't na l'edaxa.

⁴² Qaq nachi 'eetec nataq'en qom qanca'alaxateec na leuaxaicpi. Cam qailayiñi, taÿa'a da nlaguiñi, qalaxayi qom qanca'alaxateec, nachi sa ishit da ileu.

⁴³ Qaq cam qailayiñi, nachi qaica ca lyac, qalaxayi qom qanca'alaxateec, nachi ÿataqta huo'o da lli'oxoyic. Qaq cam qailayiñi, nachi qaica ca l'añaxac, qalaxayi qom qanca'alaxateec, nachi ÿataqta huo'o da l'añaxac.

⁴⁴ Qaq ca qailayiñi, yi'oqchigui n'oquiaxac, qalaxayi qom qanca'alaxateec, nachi huo'o da l'oquiaxac saq cha'a. Cha'ayi da huo'o ca n'oquiaxac yi'oqchigui, qaq nataq'en huo'o ca n'oquiaxac saq cha'a.

⁴⁵ Qaq ÿoqo'oyi 'ena'pe naua ñiyigui'shi l'aqtaqa ñi Dios: “So hua'auchiguiñi shiÿaxaua, l'enaxat Adán, co'olla qai'ot, nachi ÿataqta qoÿanagui da nca'altauec qanqoÿin.” Qalaxayi so Cristo som pa'ateec Adán, nachiso som saq cha'a mayi ishit da deca'alaqtaxan.

⁴⁶ Qalaxayi de'eda saq cha'a n'oquiaxac sa ishit da nachida da l'auaxanec. Chaqdata da yi'oqchigui. Qaq ÿaqa'aguet dam saq cha'a.

⁴⁷ So hua'auchiguiñi shiÿaxaua qaÿachigoxotaigui ana 'alhua, qaq somayi 'alhua l'ec. Qalaxayi so ÿaqa'aguet shiÿaxaua som qadataxala', somayi chigoqo'ot na piguem.

⁴⁸ Da l'oquiaxac na shiÿaxauapi 'eeta'am so hua'auchiguiñi shiÿaxaua mayi 'alhua l'ec. Qaq de'eda n'oquiaxac mayi piguem l'ec, damayi 'eeta'am som chigoqo'ot na piguem.

⁴⁹ 'Eeta'am da nagui qomi' sanaqtañi da l'oquiaxac som 'alhua l'ec, qaq nachi 'eetec nataq'en ca na'a'q qom sanaxañi da l'oquiaxac som piguem l'ec.

⁵⁰ Qami' ÿaqaÿa't, da sauotaique da qami' sa'axatema 'eeta': de'eda yi'oqchigui qad'oquiaxac sa ishit da inoxoneu'a ca l'onataxanaxac ñi Dios mayi ñaq natai'. Cha'ayi ca ishit da nlaguiñi, sa ishit da taÿapegueu'a cam qaica ca loga't.

⁵¹ Qalaxayi ñishitaique da qauaÿajñi de'eda saq cha'a da sa ishit da 'enauac da seleuaq, qalaxayi 'enauac qome da qomi' qanadalaxa't.

⁵² Qalaxayi ÿataqta nque'elaxatta qome de'eda, 'eeta'am da 'oonolec nqachigoxoñi ca shiÿaxaua, qom qai'axaÿa aca pa'ateec nashiide. Qom qaÿashiidaxaalecna, nachi na leuaxaicpi nca'aleec qanqoÿin. Huaña, qanachi sa ishit da lta ileu. Qaq qomi', nachi qomi' qanadalaxa't.

⁵³ Cha'ayi de'eda qadapachiyaxac mayi ishit da nlaguiñi, damayi iuen da ÿaañi qanqoÿin cam sa ishit da nlaguiñi. De'eda yi'oqchigui qad'oquiaxac mayi ishit da ileu, damayi iuen da ÿaañi qanqoÿin cam sa ishit da ileu.

⁵⁴ Qaq de'eda qadapachiyaxac mayi ishit da nlaguiñi, qom mashi qoÿanaxanaxaangui cam sa ishit da nlaguiñi, qataq de'eda qad'oquiaxac mayi ishit da ileu, qom mashi qoÿanaxanaxaangui cam sa ishit da ileu, nachi ipacchigui da 'ena'pe naua ñiyigui'shi l'aqtaqa ñi Dios, 'eeta': “Da nleuaxa mashi noxonec da qailaxachigui.

⁵⁵ 'Am nleuaxa, ¿huá'ague ca hueta'ague ca 'ad'añaxac da qomi' 'auque'emaqchi't? 'Am nleuaxa, ¿huá'ague ca hueta'ague ca qonetega 'ad'añaxac da 'auauegaxan?”

⁵⁶ Da ÿachigoxotapoigui da l'añaxac da nleuaxa da qomi' ique'emaqchi't, nachida da ñi'itaxaloxo. Qaq na lqataxacpi ñi Dios, nachina na nquigaxateec da l'añaxac de'eda ñi'itaxaloxo.

⁵⁷ Qalaxayi saqalota da qan'achic ñi Dios da qomi' ÿanema da sauegaxanaq, chigoqchigui naq'en so qadataxala' Jesucristo.

⁵⁸ Qaq ÿoqo'oyi qami' ñauochaxa'u ÿaqaÿa't, saqco' qome ca qanamachiÿaique, qoquiito'ot da qau'ochiitac da l'onataxanaxac so qadataxala'. Cha'ayi qami' qauaÿajñiita da qad'onataxanaxaqui da qau'onataxañiitacot somayi, ÿataqta huo'o ca naigui.