1 Corintios 11 - Nuevo Testamento Toba Sur

¹ Qami' qoquiitelec qome aÿim, 'eeta'am da shiitec da shictague' so Cristo.

Da 'eetec da lataxac na 'alpi da do'onaxaatac

² Qami' ÿaqaÿa't, ÿataqta qami' ñitootegueque, cha'ayi ÿataqta aÿim qadhuennataxachi, qataq qoquiitelec da ÿapaxaguenataxanaxac mayi qami' sanema.

³ Qalaxayi ñishitaique da qauaÿajñiita da so Cristo nachiso so lqaic ca shiÿaxaua, qaq ca shiÿaxaua nachica ca lqaic aca lhua, qaq ñi Dios nachiñi ñi lqaic so Cristo.

⁴ Ca shiÿaxaua da ÿapotalec na lqaic da huo'otaq nqouagaxaueetac, huo'otaq i'axattac da l'aqtac ñi Dios, camayi huota'a naq'en da n'enaguec na lqaic, souaxat da ÿapotalec.

⁵ Nachi 'en'am aca 'alo da sa ishit da ÿapolec na lqaic da huo'otaq nqouagaxaueetac, huo'otaq da i'axattac da l'aqtac ñi Dios, acamayi huota'a naq'en da n'enaguec na lqaic, souaxat da sa ÿapolec. Qaq 'eeta'am da imauec da npetec na laue.

⁶ Cha'ayi da huo'o aca 'alo sa ishit da ÿapolec na lqaic, nachi 'onaxaic da imauec da npetec na laue. Qalaxayi da 'enauac qai'aguelec aca 'alo, souaxat da npetec na laue, huo'otaq da nquedalecta na lqaic, qaq no'on da ÿapolec na lqaic.

⁷ Ca shiÿaxaua sa ishit da ÿapotalec na lqaic, cha'ayi camayi n'enaqtac, lqui'i ñi Dios, qataq ÿaatañi da lli'oxoyic ñimayi. Qalaxayi aca 'alo ÿaatañi da lli'oxoyic ca shiÿaxaua.

⁸ Cha'ayi ñi Dios co'ollaq i'ot so ÿale, qaq sa ishit da ÿachigoxotaigui aso 'alo. Chaqdata da co'ollaq i'ot aso 'alo, nachi ÿachigoxotaigui somayi.

⁹ Qaq aso 'alo qai'ot da ltaua qanqoÿin so ÿale. Qaq sa ishit da qai'ot so ÿale souaxat aso 'alo.

¹⁰ Qaq 'eda da huo'o mshi aca 'alo iuen da ÿauo'o ca lapoxot na lqaic, n'anaxashit da acamayi hueto'ot da lamaxasoxonaxac ca lhua, qataq souaxat na chigaqshiguem Dios lamaxashicpi.

¹¹ Qalaxayi nagui da sa'amaqtenaq so Cristo, qaq qaica ca shiÿaxaua da sa iuen aca 'alo, qataq qaca aca 'alo da sa iuen ca shiÿaxaua.

¹² Qalaxayi da ÿoqta 'eesa da aso 'alo qaÿachigoxotaigui so ÿale, qaq nataq'en 'eesa da ca shiÿaxaua chigaqaigui aca 'alo, qalaxayi 'enauac chigoqo'ot ñi Dios.

¹³ Maichi qanaloqchiñi qami' da ÿaÿamaqchiguiñi da aca 'alo sa ÿapolec na lqaic da huo'otaq nqouagaxaueetacot ñi Dios.

¹⁴ Cha'ayi da n'onataxac na yi'oqchigui shiÿaxauapi 'eeta': 'Enauac qai'aguelec ca shiÿaxaua da nalogaxat na laue,

¹⁵ qalaxayi aca 'alo ÿataqta qaÿi'oxoden da nalogaxat na laue, cha'ayi na laue logodaic qoÿanem da yaqto' ÿapolec na lqaic.

¹⁶ Qalaxayi da huo'o ca nshitaique da taÿa'aguet de'eda, qaq no'on da ÿaÿateeta da qomi' qaica ca lÿa qan'onataxac, qataq 'enauac nam neteguelo naua laÿil ana 'alhua nam i'amaqteetacpi ñi Dios.

Sa qaÿaÿamaxatapec da nqui'axac mayi naigui da qaiuennate so qadataxala'

¹⁷ Qalaxayi da sauotaique shiyiñi nagui da qami' samaxalo 'eeta'am da sa ishit da qami' saÿamaxadeete', cha'ayi de'eda qalaponaxaqui nachida da qami' n'aqchi't, qaq sa ishit da qami' n'onaxa't.

¹⁸ Qaq da hua'auchiguiñi i'aqtac 'eeta': Sa'aqtapeguelec da qoÿiitega quenaxa da ivita da qalapoñiÿa't da qau'onaxañi, qalaq nda'a't da qami' qaucolaqaitagui. Qaq 'eeta'am ñaqashin da cada'acolec da 'eesa damayi.

¹⁹ Cha'ayi ¡qami' iuen da qaucolaqaigui da ÿotta'a't na qauatailec shiÿaxauapi, yaqto' yi'oq na ÿoqta 'eesa 'amqajnataxanaxaic!

²⁰ Cha'ayi souaxat da qami' qaucolaqaitagui, nachi naxa da ivita da qau'ochi da nqui'axac mayi naigui da qaiuennate so qadataxala', nachi de'eda qadqui'axaqui sa ishit da nachiso somayi da qauennachi.

²¹ Cha'ayi da ivita yi laloqo' da qauqui'ii, nachi ñi 'oonolec maichi hua'aualec da deque'e, qaq sa ishit da deuataxanapec. Qaq ÿoqo'oyi huo'o na ÿoqouat, qataq huo'o na ivida'a da taxaic.

²² ¿Saqcaua peta'a naua qadma'chilli' da qauqui'ii qataq qanÿomi? Qaq da nachi qoñiita'ac de'eda, nachi 'eeta'am da qau'otañiitac na laÿipi i'amaqteetacpi ñi Dios, qataq qauauoita'a da l'aloxo nam qaica ca yi. ¿Huá'ague ca 'eetec ca i'aqtac qami'? ¿Qami' saÿamaxadeete' peta'a? ¡'A'i, sa ishit da saÿamaxadeeta de'eda!

Da nqui'axac mayi naigui da qaiuennate so qadataxala'

²³ Cha'ayi aÿim sachigoxoto'ot so qadataxala' de'eda napaxaguenataxanaxac mayi mashi qami' sanema da se'eso pe co'ollaq yaqta'a da qoÿaneuo so qadataxala' Jesús, nachi ÿacona aso pan.

²⁴ Nachi ÿanot da n'achic ñi Dios. Ime, qanachi ncolaxajñi aso pan, nachi 'enapeco': “Qolliqui ne'ena; nachina na maichi ÿapat mayi taÿa'a da qancolaxajñi da qami' nca'alaxatreec. Qaq qau'ochi qome de'eda, yaqto' sa ishit da aÿim qaucouai'ai.”

²⁵ Qaq co'olla mashi ime da lqui'axac, nachi ÿacona aso ÿomaxaqui. Nachi 'enapeco': “Ana'ana ÿomaxaqui, nachana ana naigui da dalaxaic aÿamaxataxac mayi ÿoqta 'itchiguiñi naq'en naua itago'q. Qaq da ivita da qalta qanÿomiigui, qalta qauennachi aÿim.”

²⁶ Qaq ÿoqo'oyi da ivita da qolliqui ana'ana pan, qataq qanÿomiigui ana'ana ÿomaxaqui, nachi 'en'am da qau'axachiitac da l-leuaxa so qadataxala' Jesús, chochi ivitta'a ca na'a'q qom ñi'iguelaq.

Da lataxac da nqui'axac mayi naigui da qaiuennate so qadataxala'

²⁷ Qaq ÿoqo'oyi da huo'o ca chic ana pan, huo'otaq nÿomgui ana ÿomaxaqui mayi naigui da qaiuennate so qadataxala', qaq da huo'otaq qaica ca naigui naq'en, nachi 'eeta'am da sa iyacnapec da l'oquiaxac qataq naua ltago'q somayi.

²⁸ Ÿoqo'oyi ñi 'oonolec iuen da i'auaxaañi da ÿataqta naÿateetela't. Ime, qanachi ishit da chic ana pan qataq ishit da nÿomgui ana ÿomaxaqui.

²⁹ Cha'ayi da huo'otaq deque'e qata nÿom, qaq saq taÿapigui lauel da chictac da l'oquiaxac so qadataxala', qanachi de'eda lqui'axac qataq de'eda nÿomaxac 'eeta'am da iÿaxaatega ca nhuaxanaguec.

³⁰ Qaq nachida da huo'o mshi saqalota da qoñiita na sa no'on qataq na dalolatapigui'. Nataq'en huo'o na mashi saqca.

³¹ Cha'ayi da qomi' da maichi ñiloxola't, nachi ñi qadataxala' Dios sa ishit da nachi 'eeta'ac de'eda da qomi' iuaxa'n.

³² Qalaxayi ñimayi da huo'otaq ila'a da huo'o ca qadasouaxashit, nachi qomi' iuaxa'n, cha'ayi nshitaique da sa ishit da salegaqtoigui ca nhuaxanaguec na sa da'amqajnataxanpi.

³³ Qaq ÿoqo'oyi qami' ÿaqaÿa't, da ivita da qalapoñiÿa't da qauqui'ii, qaq ñi 'oonolec iuata'a ca lÿa da lqui'axaua.

³⁴ Qaq da huo'o ca ÿoqouat, qaq no'on da lqui'aqa' ca maichi lma', yaqto' ñi Dios sa ishit da ÿauo'o ca qanhuaxanaguiiqui, souaxat de'eda qoñiitec da qalapoñiÿa't. Qaq na laÿipi lataxacpi maichi saÿamaxajñi qom ivita da qami' ñoqo'onalo.