1 Corintios 10 - Nuevo Testamento Toba Sur

Nqataxac da sa ishit da qanatamnot ca nqolac

¹ Cha'ayi qami' ÿaqaÿa't, ñishitaique da qami' qauaÿajñi so hua'au qadta'alpi da 'enauac somayipi hueto'ot so l'oc da nachiso lauegaxala', qataq 'enauac somayipi i'axasoxoolec aso auaxai l'enaxat auaxai togaxadai.

² Qaq 'enauac de'eda lliquiaxac somayipi co'ollaq qaica'attaueegue so l'oc qataq co'ollaq qai'axasoxoolec aso auaxai, damayi 'eeta'am da nachida da nachilaxanataguec somayipi da yaqto' n'adeu'a qanqoÿin so Moisés.

³ Nataq'en 'enauac somayipi chictac so nallic saq cha'a,

⁴ qataq 'enauac qanÿomgui so 'etaxat saq cha'a. Cha'ayi qanÿomtapigui na 'etaxat mayi chigaqaigui so coma' saq cha'a mayi nnaictague' somayipi. Qaq se'eso coma' nachiso so Cristo.

⁵ Qalaxayi ñaqaiyita somayipi saqalota na sa ÿaÿamaxaden ñi Dios, qaq ÿoqo'oyi vichiguiñalo ana nhuachiqui somayipi se'eso tojlec 'alhua.

⁶ Qaq 'enauac de'eda huaigui somayipi nachida da qanapaxaguenataguec, da yaqto' sa ishit da soqopitaqa'a ca sa ÿaÿamaxañi, 'eeta'am da 'eetec somayipi.

⁷ Ÿoqo'oyi qami' sa ishit da qau'enaxachi da 'eetec somayipi da huo'o na natameetacot na nqolacpi. Cha'ayi naua ñiyigui'shi l'aqtaqa ñi Dios 'eeta': “So shiÿaxauapi nso'ooñi. Ime, qaq i'ot so lqui'axac qataq nÿomtac. Ime, qaq nachajñi da i'ot so l'ashaxac.”

⁸ Nataq'en sa ishit da saxaigui da nquishiguetaxac, 'eeta'am da 'eetec somayipi da huo'o na nquishishtac. Qaq ÿoqo'oyi ileu so veintitres mil shiÿaxauapi so 'oonolec na'a'q.

⁹ Nataq'en sa ishit da chochi sayinaqtac so qadataxala', 'eeta'am da 'eetec somayipi da huo'o na yi'iguenataxan. Qaq ÿoqo'oyi huo'o na ileu somayipi co'ollaq detoxongui na n'adaxanaqpi.

¹⁰ Nataq'en qami' sa ishit da qanachiitega ñi Dios, 'eeta'am da 'eetec somayipi co'ollaq huo'o na quetapeguelec ñimayi. Nachi qaÿalauat, ÿalauat so chigaqshiguem Dios lamaxashic mayi lalaataxanaxanec.

¹¹ Qaq 'enauac de'eda huaigui som hua'au qadta'alpi, damayi qoÿiyiñi da naloqnaxanaxat da qaÿauotaique qomi' qaÿaqatalo nagui da souaqtaiguilo naua pa'atreec na'axa'te.

¹² Qaq ÿoqo'oyi da huo'o ca ipi'itaxaatega da sa ishit da huañi, qaq no'on da ntelañi, da yaqto' sa ishit da huañi.

¹³ Da qañi'iguenataguiiqui mayi qami' nvittegalo, damayi nachida da 'eeta'am da ñi'iguenataguec na 'enauac shiÿaxauapi. Qalaxayi qami' ishit da qaupi'iÿa'ai ñi Dios, cha'ayi ñimayi sa ishit da qami' ÿashiitema ca qañi'iguenataguiiqui da huo'otaq sa qanaloÿiguet. Chaqdata da huo'otaq nvi' ca qañi'iguenataguiiqui, nachi ñimayi ÿauo'o ca lliguec, yaqto' qami' ishit da qadaloÿa'aguet.

¹⁴ Ÿoqo'oyi qami' ÿaqaÿa't, qami' ñauochaxa'u, qauataiueguesop qome da qanatamñiitacot na nqolacpi.

¹⁵ De'eda itaxaÿaxac da qami' setaxaÿoto, se'enaxatteguem da setaqtacot ca shiÿaxaua ÿajnaxanaxaic, qaq qami' maichi qanmichi de'eda shinapec.

¹⁶ Ana ÿomaxaqui mayi qaiÿotauga da yaqto' ñoqouagaxaunaxalec, anamayi da ivita da ñiÿomaxagui nachi naigui da 'eeta'am da qomi' qaÿauaxaÿaxana't souaxat naua ltago'q so Cristo. Nataq'en ana pan mayi ñicolaxataxañi, anamayi da ivita da sachiguenaq nachi naigui da 'eeta'am da qomi' qaÿauaxaÿaxana't souaxat da l'oquiaxac so Cristo.

¹⁷ Nai'ctaxa da qomi' saqalota, qalaxayi 'enauac da sachiguenaq aso 'oonole pan, qaq ÿoqo'oyi qomi' 'eeta'am da 'oonolec n'oquiaxac.

¹⁸ Ña qaumijñi na llalaqpi so Israel. Nam chictac na nachitaqtaxanaxat huaca lapat mayi qoÿaneuo, namayipi 'eeta'am da qaÿauaxaÿaxana't, souaxat ne'ena nachitaqtaxanaxat.

¹⁹ Sa ishit da shiitega da ÿataqta huo'o naq 'enec ca nqolac, huo'otaq na nachitaqtaxanaxat lapat da huo'otaq saq 'en'am ca lÿa.

²⁰ Da shiitega 'eeta': Na sa ishit da ÿauatton ñi Dios, namayipi da ivita da ÿauo'o na lachitaqtaxanaxat, qanachi ne'ena lachitaqtaxanaxat taÿot na lamaxashicpi so shiÿaxaua lma'na, qaq sa ishit da nachiñi ñi Dios. Qaq sa saÿamaxaden da qami' qan'ayiitau'a na lamaxashicpi so shiÿaxaua lma'na.

²¹ Qaq sa ishit da qanÿomiigui aca ÿomaxaqui mayi naigui da qai'amaqten so qadataxala', qata nataq'en qanÿomiigui aca ÿomaxaqui mayi naigui da qai'amaqten na lamaxashicpi so shiÿaxaua lma'na. Qataq sa ishit da qolliqui ca nallic mayi naigui da qaiuennate so qadataxala', qataq nataq'en qolliqui ca nallic mayi qoÿanot na lamaxashicpi so shiÿaxaua lma'na.

²² Loqo'o ¿qomi' sauoqtaique peta'a da deca'alaxan ñaqashinaq so qadataxala'? ¿Ñapagaqlec peta'a da l'añaxac somaxa?

Da nsoxoyic nachida da ilo'ogue da qadataxac

²³ 'Eesa quenaxa na n'aqtac da 'eeta': “Sa ishit da qaillapeguem ñi 'oonolec da maichi ÿoiqueetac ca i'ot,” qalaxayi sa ishit da 'enauac na lataxaguesat da n'onaxat ca shiÿaxaua. Aja', 'eesa da sa ishit da qaillapeguem ñi 'oonolec da maichi ÿoiqueetac ca i'ot, qalaxayi sa ishit da 'enauac da nañaxat naq'en.

²⁴ Qaica ca nmittaique ca maichi laÿamaxa. Chaqdata da nmitta'ai da ÿaÿamaxajñi ca lÿa.

²⁵ Qami' qolliqui qome 'enauac na lapat mayi chigaqaigui aca nmenaxaqui. Sa ishit da qaunataxañiitapeguelec ca chigaqa'ague, yaqto' sa ishit da sa ÿaÿamaxañi da qadhuennataqai.

²⁶ Cha'ayi ana 'alhua qataq 'enauac nam huetalec, namayi lalamaxat ñi qadataxala'.

²⁷ Qaq sa iuena'a da huo'otaq huo'o ca saxanaxa da da'amqajnataxan da qami' 'enapegalo da qadqui'axauai, qaq qolliqui 'enauac nam qami' ÿanema. Sa ishit da qaunataxañiitapeguec ca chigaqa'ague, yaqto' sa ishit da sa ÿaÿamaxañi da qadhuennataqai.

²⁸ Qalaxayi da huo'o ca qami' da'aqtaxanema, 'eeta': “Ne'ena lapat, namayi nachitaqtaxanaxat da qoÿanot ca nqolac,” nachi sa ishit da qolliqui, yaqto' sa ishit da qauque'emaqchichi ca qami' da'aqtaxanema, qataq yaqto' sa ishit da sa ÿaÿamaxañi da nhuennataxac.

²⁹ Qaq sa'axattac da lhuennataxac ca lÿa shiÿaxaua, qaq sa ishit da nachida da qadhuennataqai. Qalaxayi da huo'o ca 'enapec da l'aqtac: “¿Tá'ainco'ctaxa da 'aloqtapigui iuel naq'en da lhuennataxac ca iÿa da huo'otaq huo'o ca sachictac?

³⁰ Cha'ayi da huo'otaq ñoqouagaxaueelec ca anoq da sanot da ñi'achic ñi Dios, qaq ¿tá'ainco' da aÿim qanayictega souaxat ca sachictac?”

³¹ Qaq da huo'otaq qauqui'ii, huo'otaq qanÿomi, huo'otaq huo'o ca lÿa qau'ochi, qaq no'on da qai'añiitoigui qanqashiñi da 'enauac qaÿi'oxoden ñi Dios.

³² Sa ishit da huo'o ca huañi qanqashiñi na judío l'ecpi, huo'otaq na saq judío l'ecpi, huo'otaq na i'amaqteetacpi ñi Dios.

³³ Qaq aÿim ÿataqta ñipogoxoueetague' da 'enauac qaÿaÿamaxadeeta ca so'ot. Qaq sa ishit da maichi ñimittaique ca ÿaÿamaxa. Chaqdata da ñishitaique da saÿamaxajñi ca iÿa, yaqto' ishit da qanca'alaxateec.