1 Corintios 1 - Nuevo Testamento Toba Sur

So Pablo ÿamaxa aso lede so 'amqajnataxanaxaicpi mayi netaña yi Corinto

¹ Aÿim Pablo, maichi chigoqchigui co'ollaxa ñi Dios da ÿauo'o aÿim lamaxashic naq'en so Jesucristo. Aÿim hueta'aguet ñi qadqaÿa Sóstenes.

² Qaq nagui qami' samaxalo ana ÿide, qami' ÿaqaÿañicpi mayi qau'amaqchiñiitac ñi Dios, mayi qoñiitaña na la ciudad Corinto. Qami' lalamqa'te ñi Dios, cha'ayi qan'ayiitau'a so Cristo Jesús. Ñi Dios iÿaxana da ÿauotaique da qui'itta naq'en da qanachaalataxaqui, nataq'en 'enauac na neta'alo naua lÿa't 'ale'u mayi nqouagaxaueetacot so qadataxala' Jesucristo, som lataxala' namayipi, nataq'en qomi'.

³ Ñishitaique da qauacoñiiguet da nqouagaxanaqtaic qataq da nlagaxayic mayi chigoqo'ot ñi qadta'a Dios qataq so qadataxala' Jesucristo.

Da nqouagaxanaqtaic mayi chigoqchigui so Cristo

⁴ Nachi 'eetai' da shicto'ot da saatacot da ñi'achiquiaxac ñi Dios, souaxat da qoñiita, cha'ayi so Cristo Jesús qami' nda'alo da lqouagaxanaqtaic ñi Dios.

⁵ Cha'ayi souaxat da qan'ayiitau'a somayi, nachi ñi Dios qami' ÿanema 'enauac na ÿotta'a't nsallaxa mayi saq cha'a da qami' ÿanema da qad'aqtaxanaxaqui, nataq'en da qadauattonaxanaxaqui.

⁶ Qaq ÿoqo'oyi da n'aqtaguec so Cristo yi'oqta da mashi qami' nañaxatoiguilo.

⁷ Qaq 'eda da 'eetec da huo'o mshi qami' qaica ca qaviñiitac nam Dios qami' ÿanema, nagui da ña qauachiitaique ca na'a'q qom nachaxan so qadataxala' Jesucristo.

⁸ Qaq ñimayi ÿataqta qami' lasoqchiyiñi, qami' ividaxatta'alo ca loga'tna, yaqto' sa ishit da huo'o ca qami' ÿasaxalguete ca qadasouaxashichi qom nvi' so qadataxala' Jesucristo.

⁹ Ñi Dios ÿataqta ipactelguete naua l'aqtaqa, ñimayi nachiñi ñi qami' iÿaxanalo da qanhuañiÿau'a da nachaalataxac so llalec Jesucristo mayi qadataxala'.

Colaqtagui na 'amqajnataxanaxaicpi

¹⁰ Qami' ÿaqaÿa't, qami' sedolguete da l'enaxat so qadataxala' Jesucristo da qami' saqatalo da ÿataqta 'oonolec da qadtaxaÿaxaqui. Sa ishit da qaucolaqaitagui. Chaqdata da qaica ca ÿaqpeuga, 'oonolec da qadhuennataqai qataq ca qoñiitapeguec.

¹¹ Shinapec de'eda, qami' ÿaqaÿadolqa, cha'ayi huo'o na lauo' l'ecpi aca qadqaÿa Cloe aÿim da'aqtaxaatapeguem da huo'o na sa naÿamaxanna't da qoñiita.

¹² Qaq ÿoqo'oyi yi'oqta da qoñiita da ÿotta'a't naua qadtaxaÿaxacolli'. Cha'ayi huo'o na 'eeta': “Aÿim ÿataxala' so Pablo;” qataq huo'o na 'eeta': “Aÿim ÿataxala' so Apolo;” qataq huo'o na 'eeta': “Aÿim ÿataxala' so Pedro;” qataq huo'o na 'eeta': “Aÿim ÿataxala' so Cristo.”

¹³ Qaq ¿peta'a so Cristo ishit da 'ico' colaqtagui? ¿Aÿim peta'a qaiuaxaneuo da seleualguete qami'? ¿Peta'a qai'onataxana da i'enaxat co'ollaq huo'o ca qanachilaxan da qoñiita?

¹⁴ Aÿim saatacot da ñi'achic ñi Dios da aÿim sa ishit da huo'o ca ÿachilaxanatac da qoñiita, chaqsota so Crispo qataq so Gayo,

¹⁵ yaqto' qaica ca 'oonolec da qoñiita 'eeta' da l'aqtac: “Aÿim qanachilaxangui da l'enaxat so Pablo.”

¹⁶ 'Eesa nataq'en da ÿachilaxanatac na lauo' l'ecpi ca Estéfanas, qaq sa ishit da ñitounec da huo'otaq huo'o ca lÿa ÿachilaxanatac.

¹⁷ Cha'ayi so Cristo sa ishit da aÿim ÿamaxalec da sachilaxanataxan. Chaqdata da aÿim ÿamaxalec da sa'axattac da nca'alaxa. Qalaxayi sa ishit da so'onataxana ca laÿajnec ca chochi shiÿaxaua, yaqto' sa ishit da huo'otaq saqca ca naigui da l-leuaxa so Cristo co'ollaq qaiuaxaneuo.

So Cristo nachiso so l'añaxac qataq laÿajnec ñi Dios

¹⁸ Cha'ayi da n'aqtaguec da l-leuaxa so Cristo co'ollaq qaiuaxaneuo, 'eeta'am da chochi 'oopashic da hua'axaÿa nam taÿa'a da qanlaxajñi. Qalaxayi qomi' mayi saqa'a da qomi' qanca'alaxatreec, de'eda n'aqtaxanaxac, damayi l'añaxac ñi Dios.

¹⁹ Cha'ayi nachi 'enapec naua nanettrañi l'aqtaqa ñi Dios, 'eeta': Ñilaxajñi da laÿajnataxanaxac na ÿajnaxanaxaicpi, qataq qaica ca naigui ñaq'en da lauattonaxanaxac na huattonaxanaxaicpi.

²⁰ Qaq nagui ¿huá'ague ca hueta'ague ca ÿajnataxanaxaic, huo'otaq ca dapaxaguenataxanapec, huo'otaq ca ÿaÿaten da i'axat na huetalecna? Cha'ayi da naÿajnec mayi lma'na, damayi chochi 'ico' 'oopashic naq'en ñi Dios.

²¹ Qaq ñi Dios mayi ÿaÿateetalec cam i'ot, ñimayi sa ÿashinem nam huetalecna da huo'otaq ÿachigoxotchigui da maichi lauattonaxanaxac da ÿauatton ñimayi. Chaqdata da ÿauotaique da nca'alaxateec na i'amaqten ñimayi, chigoqchigui naq'en de'eda n'aqtaxanaxac mayi 'ico' 'oopashic naq'en na laÿipi.

²² Na judío l'ecpi nmitta'ai da ÿauaachigui na n'anecpi mayi sa qaÿauanapega. Qaq na saq judío l'ecpi nmitta'ai da saqalota na laÿajnecpi.

²³ Qalaxayi qomi' sa'axataqtac da n'aqtaguec so Cristo co'ollaq qaiuaxaneuo. Na judío l'ecpi da hua'axaÿa de'eda n'aqtaxanaxac, nachi ÿataqta da'aguelec. Qaq nam saq judío l'ecpi da hua'axaÿa, nachi 'eeta'am naq'en da chochi 'oopashic.

²⁴ Qalaxayi nam lÿaxanataguishicpi ñi Dios judío l'ecpi, huo'otaq nam saq judío l'ecpi, namayipi ÿauattoota so Cristo da nachiso so l'añaxac qataq laÿajnec ñi Dios.

²⁵ Cha'ayi na shiÿaxauapi dam ipettega da chochi 'oopashic naÿajnec mayi chigoqo'ot ñi Dios, damayi napacalec da laÿajnaxanaxa nam huetalecna. Qataq dam qaipettega da 'ico' saqca ca l'añaxac mayi chigoqo'ot ñi Dios, damayi napacalec da l'añaxac na huetalecna.

²⁶ Qami' ÿaqaÿa't, qami' tachigui qadvilli da 'eetec co'ollaq qami' iÿaxanalo ñi Dios, nai'ctaxa da saqalligueme da qoñiita na huo'o da laÿajnec nam huetalecna, qataq saq 'amaqtaq na nalau'a da nta'a, huo'otaq na chigaqaigui nam 'amaqtaqaicpi.

²⁷ Chaqdata da ñi Dios lca'aguishic nam qaÿamata'ac da qaica ca ÿaÿajnapec, cha'ayi nshitaique da i'aloqchit na ÿajnaxanaxaicpi. Qataq lca'aguishic na qaÿamata'ac da saqca ca l'añaxac, cha'ayi nshitaique da 'aloxogui lauel naq'en na 'añaxaicpi.

²⁸ Ñi Dios lca'aguishic nam saqca ca l'amaqchic qataq n'otanec, huo'otaq nam qaica ca qoÿanapoigui, cha'ayi nshitaique da imeuo naq'en na huo'o naq 'enec,

²⁹ yaqto' sa ishit da huo'o ca n'amaqteeto'ot ñimayi.

³⁰ Qaq ñimayi nalligoxottela't da qan'ayiitau'a naq'en so Cristo Jesús, qataq chigoqchigui naq'en somayi da qadaÿajnec. Qataq chigoqchigui naq'en somayi da qomi' ÿaÿamaxadeete' ñimayi, qataq da qomi' lalamqa'te, qataq da qomi' yica'alaxauec.

³¹ Qaq ÿoqo'oyi “ca nshitaique da napagaqchin, no'on da ÿapagaqchin so qadataxala'.” Qaq 'eda da 'enapec naua ñiyigui'shi l'aqtaqa ñi Dios.