Zekhariah 13 - Tedim Bible Revision 2017

¹ “Tua ni hong tun ciangin Davidʼ suanlekhakte le Jerusalem khua miteʼ mawhna le nitna teng khempeuh a silsiang dingin tuinak khat hong phul ding hi.

² Tua ni ciangin gam sung panin milim khempeuh ka phiatsiang dinga, kuamah in a milim min nangawn uh phawk kha nawn lo ding uh hi. Kamsang zuautheite zong phiatin, milim biaknopna lungsim ka beisak ding hi.

³ Mi khatpeuh kamsang a kineih lai teitei leh, a pianna a nu le a pa mahmah in kho ding uh a, ‘Topaʼ min paulamin zuau thu gen na hih manin na si ding hi,’ ci ding uh hi. Tua bangin thu a gen teitei le, a nu le a pa mahmah in tem tawh sunlum ding uh hi.

⁴ Tua ni hong tun ciangin kamsangte in a maangmuh theihna uh kisialh pih ngam nawn loin, kamsangte bangin zong puan silh ngam nawn loin, kamsang zong kineih ngam nawn lo ding uh hi.

⁵ Kamsang ka hi kei hi; lokho mi ka hi a, ka khantawnin lokho-in a om ka hi hi, ci zawsop ding uh hi.

⁶ Mi khatpeuh in, ‘Na awm a na liammate bang ahi hiam?’ ci-in a dot ciangin, ‘Ka lawmteʼ inn khat ah zukham sulin kitotna a a liam ka hi hi,’ ci-in a dawng ding hi.

Topaʼ Tuucingpa A Kisatna

⁷ “Namsau aw, ka tuucingpa a su dingin kipan inla, kei tawh nasem khawm pa langpang in. Tuucingpa sat in. Tuute kithehthang dinga, ka tuute gim ka pia ding hi.

⁸ Leitung khempeuh ah, seh thum suah sehnih si dinga, seh khat bek suakta lai ding hi.

⁹ Tua a suakta seh khatte pen meikhuk ah ngun a kisiansak bangin, meikhuk ah kham a kize-et bangin, meikhuk ah ze-etin ka siangsak ding hi. Amaute in kei tungah thu hong ngenin, kei zong amauʼ thungetna ka pia ding hi. Keima mi ahihna uh amaute tungah ka gen dinga, amaute in kei pen amauʼ Pasian ka hihna thu a kam uh tawh pulak ding uh hi,” a ci hi.