Thukhente 15 - Tedim Bible Revision 2017

¹ Tawl khat khit, mangbuh lak hunin a zi kiangah a hawh dingin keel no khat tawh Samson a pai hi. Amah in, “Inndei sung ka zi kiangah ka lum ding hi,” a ci hi. Ahih hangin a sungpa in amah lutsak lo hi.

² A sungpa in, “Amah mudah taktak hi ni teh, ci-in ngaihsun ka hih manin na lawmpaʼ zi dingin ka pia hi. A naunu amah sangin hoih zaw hi lo ahi hiam? A u tangin amah na teenpih nadingin kong thum hi,” a ci hi.

³ Samson in, “Tutungin amau tungah siatna ka bawlna ah Filistia mite tawh kisai-in ka mawh kei ding hi,” a ci hi.

⁴ Tua ciangin Samson pai-in ngia za thum manin meilah zong a la hi. Amah in a ngia meite khatlekhat kimatsakin a meite kikalah meilah khat ciat hencip hi.

⁵ A mei lahte a kuansak khit ciangin Filistia miteʼ ankung ding laite lakah ngiate paisak a, anphualte le ankung ding laite le oliv lote kaang tum hi.

⁶ Tua ciangin Filistia mite in, “Kua in hih ahi hiam?” a ci uh hi. Amaute in, “Timnah miteʼ makpa Samson in hih hi; bang hang hiam cih leh a sungpa in a zi laksakin a lawmpa tungah piaksak hi,” a ci uh hi. Tua ciangin Filistia mite hong pai to-in tua nu le a pa mei tawh a hallum uh hi.

⁷ Samson in amaute kiangah, “Hih pen, noteʼ hih ahihleh, ka kiciam hi. Note kong thuk dinga, tua khit ciangin ka khawl ding hi,” a ci hi.

⁸ Amah in amaute dawm loin tampi that a, tua ciangin pai sukin Etam suanghawm sungah a om hi.

Samson in Lehi ah Filistia mite Zo

⁹ Tua ciangin Filistia mite pai to-in Judah gamah giahphual sat uh a, Lehi sim uh hi.

¹⁰ Judah mite in, “Bang hangin kote simin hong pai to na hi uh hiam?” a ci uh hi. Amaute in, “Samson a hen ding le ko tungah amah in hong hih bangin ama tungah a hih dingin kong pai to uh hi,” a ci uh hi.

¹¹ Tua ciangin Judah mite mihing tul thum Etam suanghawm ah pai sukin Samson kiangah, “Filistia mite, eite a hong ukte ahih lam thei lo na hi hiam? Koteʼ tungah nangʼ hong bawl bang ahi hiam?” a ci uh hi. Samson in amaute kiangah, “Amaute in kei tungah hong bawl bangin amaute tungah ka bawl hi,” a ci hi.

¹² Tua ciangin amaute in Samson kiangah, “Filistia miteʼ khut sungah nang kong piak theih nadingun nangmah a hen dingin kong pai suk uh hi,” a ci uh hi. Samson in amaute kiangah, “Note mahmah in nong thah loh nading uh kei tungah hong kiciam un,” a ci hi.

¹³ Amaute in Samson kiangah, “Kong that kei ding uh hi. Nang hong henin amauteʼ khut sungah kong pia bek ding uh a, nang kong that het kei ding uh hi,” a ci uh hi. Tua ahih ciangin amaute in khauhual thak nih tawh amah hen uh a, tua suanghawm sung panin amah paikhiatpih to uh hi.

¹⁴ Lehi ah Samson a tun ciangin amah a dawn dingin Filistia mite hong pai-in awng uh hi. Tua ciangin ama tungah Topaʼ kha khauh takin hong tunga, a khut tunga om khauhualte pen mei in a kat anthul khau tawh kibang a, amah a kikhihnate a khut panin tolh khia hi.

¹⁵ Tua ciangin amah in la khaguh thak khat mu a, a khut zanin tua khaguh la-in tua tawh mihing tul khat a that hi.

¹⁶ Tua ciangin Samson in, “La khaguh khat tawh a lomlomin, la khaguh khat tawh mihing tul khat ka that hi,” a ci hi.

¹⁷ Tua a thugen a man khit ciangin a la khaguh paai khia hi; tua mun pen Ramathlehi kici hi.

¹⁸ Tua ciangin amah dangtak mahmah ahih manin Topa samin, “Na nasem paʼ tha tawh hih bang suahtakna lian nong pia zo hi. Tu-in dangtakin kei si-in dawibia miteʼ khut sungah puk ding ka hi hiam?” a ci hi.

¹⁹ Tua ciangin Pasian in Lehi a om komdep khat hong a, tua sung panin tui hong phul hi. Amah in tua tui a dawn ciangin a tha hong dimkikin thakhauhkik hi. Tua ahih ciangin tua mun min En-hakkore kici a, tu hun dongin Lehi ah tua tuikhuk om lai hi.

²⁰ Amah in Filistia miteʼ uk hunsung Israel-te kum sawm nih sung thu a khen hi.