Thuhilh-sia 7 - Tedim Bible Revision 2017

Pilna A Thupina

¹ A manpha paknamtui sangin min pha hoih zaw a, i suah ni sangin i sih ni hoih zaw hi.

² Pawi simna sangin si galna hoih zaw hi. Sih ding bek a ngak ahihna mihing khempeuh in a phawk ding uh kilawm hi.

³ Nuihna sangin dahna hoih zaw hi; na mai hong gumsak zahin na thutheihna hong khangsak hi.

⁴ Mipilte dahna lakah om tual a, mihaite nopna lakah om tual hi.

⁵ Mihaite in pahtawina la hong sak sangin mipilteʼ hong taina hoih zaw hi.

⁶ Mihaiteʼ nuihna pen meikuang sunga selkeu kikhul a puak zaizai tawh kibang a, khiatna nei lo, a mawknapi ahi hi.

⁷ Mipil khat in midangte a khem ciangin mihai bangin a gamta ahi hi. Sumgolh lakna in a lapaʼ gamtat hoihna siasak hi.

⁸ Thu khatpeuh a kipatna sangin a tawpna hoih zaw a, kiphatsakna sangin lungduaina hoih zaw hi.

⁹ Heh pahpah kei in; hehna a haihuai ahi hi.

¹⁰ “Bang hangin nidang lai-in hih sangin hoih zaw tham ahi hiam?” ci-in dong kei in. Tua bangte pil thudotna hi lo hi.

¹¹ Pilna pen hauhna zahin hoih a, mihingte adingin phattuamna ahi hi.

¹² Sum in hong lungmuansak bangin pilna in zong hong lungmuangsak hi. Pilna a manphatna, a pilte a nuntaksak theihna ahi hi.

¹³ Pasianʼ sep sate ngaihsun dih in. Pasian in a kawi-a a bawl sate kua in mamsakkik thei ahi hiam?

¹⁴ Nopna na ngah laitakin lungdam in; haksatna na tuah ciangin hih thu ngaihsun in: Lungdamna le lungkhamna hong pia pa pen Pasian hi a, mai lamah bang piang ding cih kuamah in thei lo hi.

¹⁵ Ka nuntakna a mawknapi hi a, ahi zongin ka nuntak sungin thu khempeuh ka thei hi. Mi khat hoih napi-in si a, mi khat siahuai napi-in a khansau hi.

¹⁶ Tua ahih ciangin hoih lua kei inla, lah sia lua kei in. Bang hangin nang kisiasak tawm ding na hi hiam?

¹⁷ Gilo lua, hai lua kei in. Bang hangin khansih laizang ding na hi hiam?

¹⁸ A nih tuakin lenkip in. Pasian na zahtak nakleh khat peuhpeuh na zuihna ah na maa vang ding hi.

¹⁹ Khuapi a uk mihing sawm sangin pilna in mi khat hatsak zaw hi.

²⁰ A manin a gamta, a khial ngei het lo, leitungah mi khat zong om het lo hi.

²¹ Miʼ gen khempeuh thudon kei in. Na nasem paʼ hong samsiatna na za kha ding hi.

²² Nang zong midang na samsiat zelzelna teltakin na kithei hi.

Pilna Zonna

²³ Hihte khempeuh ka pilna tawh ka ze-et a, pil ding ka hahkat hangin keiʼ bat zawh ding hi lo hi.

²⁴ Mihing nuntakna kua in thei khia zo ding ahi hiam? Eite adingin thuk lua a, telhak lua hi.

²⁵ Keimah in pilna siamna ka theih nading, pilna mu-in thupiangte a hang ka theih nadingin nakpi takin hanciamin ka lungsim ka pia a, haina a hoih lohna le a haihuaina ka thei khia hi.

²⁶ Sihna sangin numei a siahuai zawkna ka thei khia hi. Ama hong piak itna in thang bangin hong tep cip a, ama hong kawina khut in sikkhau bangin hong hencip hi. Pasianʼ deihna bangin a gamtate in tua bang numei pelh thei a, ahi zongin a mawh nuamte a thang ah a awk uh hi.

²⁷ Thugen siampa in hih bangin ci hi: Thu ka kan ciangin, a banbanin thu ka phawk khia hi.

²⁸ A thudang ka zonzon hangin bangmah ka mu zo nawn kei hi. Pasal tul khat sung pan khat bang bek a pil a om khak theihna, ahi zongin numei lakah a pil cih bang a om lohna keimah in ka phawk khia hi.

²⁹ Keima theihkhiat thu in: Pasian in eite a thuman dingin hong bawl hi napi-in, eite in paulap tuamtuam zongin, i kikai-awksak hi.