Thuhilh-sia 1 - Tedim Bible Revision 2017

Na Khempeuh A Mawknapi

¹ Jerusalem khua sungah kumpi a sem, Davidʼ tapa, Thugen Siampaʼ thugente:

² Thugen Siampa in hih bangin ci hi: A mawknapi, a mawknapi, na khempeuh a mawknapi.

³ Gimpi a nisa thuakin nasepna ah mihing in bang noptuam ngah ahi hiam?

⁴ Khang khat bei-in khang khat hong tung a, ahi zongin leitung kibangbang niloh hi.

⁵ Ni hong suakin ni tum a, a suakkik dingin tum zel hi.

⁶ Leitaw lamah huih nungin leilu lamah nung leuleu a, a zuih ngeina teng mah zui-in nungnung niloh hi.

⁷ Lui khempeuh tuipi ah luang suk a, ahi zongin tuipi dim nai lo hi. Tuipi tuite a khu-in leengin tuinak ah guahin zu a, a nak panin hong luang sukkik zel hi.

⁸ Na khempeuh lunggimhuai a, kuama gen zawh ding hi lo hi. Mit in a muh cim thei lo a, bil in a zak cim thei lo hi.

⁹ A om sa mah bangin hong piangkik dinga, a kisem sa bangin hong kisemkik ding hi. Leitungah a thak na khat beek om lo hi.

¹⁰ Hih pen a thak ahi hi, a kici thei ding khat beek om lo hi. Eiteʼ khan ma-in a om sa vive ahi hi.

¹¹ A beisa nate kiphawk kha nawn lo a, hong tung lai ding thute zong a khangkikte in phawk nawn lo ding hi.

Thugen Siampaʼ Tuah khak Thu

¹² Thugen Siampa kei pen Jerusalem khua ah Israel kumpipa ka hi ngei hi.

¹³ Hih leitungah a kisem na khempeuh en telin a thu kan ding ka ngaihsun hi. Pasian in tua bang nasep ei tungah hong guat pen a nuam het lo nasep khat ahi hi.

¹⁴ Leitungah a kisem khempeuh ka mu khin a, tuate khempeuh a mawknapi na hi a, huihpi nung tawh kibang lel hi.

¹⁵ A kawi sate kimamsak thei lo a, a om lopi a omin kiseh thei lo hi.

¹⁶ “Pilna sangpi ka nei a, keima mai ah Jerusalem a uk dangte khempeuh sangin ka pil zaw hi. Pilna le theihna a kici khempeuh ka theih loh om lo hi,” ka ci hi.

¹⁷ Pilna le haina, theihna le mawlna, a kilamdanna ka zong hi. Ahi zongin tua bang ka hahkatna zong a mawknapi ahih lam ka phawk hi.

¹⁸ Pil semsem lehang kilunghimawh semsem a, tam thei semsem lehang hong gimsak semsem zawsop hi.