Solomon la 6 - Tedim Bible Revision 2017

Nungakte

¹ Nungak lak a hoih pen nu aw, na ngaihno, koi ah pai hiam? Na ngaihno koi lam pai hiam? Amah hong zon pih nung.

Nungak

² Ka ngaihno, paknamtui kung a pona, a huan sungah pai hi. A huan sungah a tuu cing a, unok paakte a lo hi.

³ Ka ngaihno kei aʼ hi a, kei zong ama aʼ hiʼng. Amah in unok pak lakah a tuute gamtasak hi.

Dawng Ngana Tangval

⁴ Ngaihno aw, Jerusalem khuapi bangin na etlawm mahmah a, Tirzah khuapi bangin na hoih mahmah a, vantung aksi bangin na deihhuai hi.

⁵ Keima lam hong nga kei in. Na mai in hong leng lua hi. Gilead mual tunga keel hon diang leklek bangin na samphekte phe velvel hi.

⁶ Na hate zong, a kisil khin phet tuu hon bangin pak singseng hi. A tok khat zong om lo a, a vekpi-in kituak dimdiam hi.

⁷ Na lu khuhna puan sung panin na kho hong san lihleh hi.

⁸ Kumpi-zi sawm guk, kumpi zineu sawm giat, sim zawh lohin nungak tampi om kha dinga,

⁹ ahi zongin khat bek ka ngai a, amah pen vahui bangin it-huai hi. Amah pen a nuʼ tanu neihsun hi a, a nuʼ ta it pen khat ahi hi.

¹⁰ Zing khuavak tawh a kibang hih nungak kua ahi hiam? Amah melhoih mahmah a, nitaang, khataang, a bang hi.

¹¹ Kuam sunga om singkungnote a en ding, leengguite a pak nai hiam a en ding, mang kawlsing a pak nai hiam a en dingin singno huanah ka pai suk hi.

¹² Galdo dingin a kipan sakol hawl pa a liin bangin nang kong ngaihna hangin ka liingliing hi.

Nungakte

¹³ Hong ciahkik in, hong ciahkik in, Shulam numei aw. Nang kong muh theih nadingun hong ciahkik in, hong ciahkik in. Shulam nungak, khanglui lai-a a lamte bangin bang hangin hong mu nuam na hi uh hiam?