Solomon la 2 - Tedim Bible Revision 2017

¹ Kei pen Sharon gam sunga a om gamlak pak, mualkuam sunga a om unok pak bang ka hi lel hi.

Tangval

² Tua bang hi lo a, ka ngaihno pen numei khempeuh lak panin ling lak a a om unok pak tawh kibang hi.

Nungak

³ Ka ngaihno tangval dang tawh teh lehang gamlak singkung lak a a om epel kung tawh kibang hi. Ama liim ah ka tu nuam a, a gahte lim ka sa hi.

⁴ Annekna phualah hong paipih inla, itna mai tawh hong en in.

⁵ Lungzuang, duangvul ka hih manin leenggahkeu tawh hong vak inla, epel gah tawh hong thadimsak in.

⁶ A veilam baan hong khamsak a, a taklam khutin kei hong kawi hi.

⁷ Jerusalem nungakte aw, koʼ kingaihna nong suknawi loh nadingun sakhi le sanang tawh kei tungah hong kiciam un.

Dawng Nihna Nungak

⁸ Ka ngaihnoʼ awging ka za hi. Mual tung tawnin hong tai a, mualte kantanin kei hong zuan hi.

⁹ Ka ngaihno sanang tawh kibang a, sakhital no tawh zong a kibang hi. Ka inn pualam uh ah dinga, tawlet ah hong dak zialin kawmvang panin hong en giau hi.

¹⁰ Ka ngaihno in ka kiangah thu hong gen a, “Hong pai in, ngaihno aw, hong zui in, itluat aw.

Tangval

¹¹ Phalbi veng ta a, guah zu nawn lo hi.

¹² Gam sung tengah paakte palh a, la sak hun tung ta hi. Gam sung tengah vakhu hamte kiza ta hi.

¹³ Theite zong min ta a, leenggah pak gim namtui zong kiza ta hi. Hong pai in, ngaihno aw, hong zui in, itluat aw.

¹⁴ Suangheeng kawm a vasa bangin nang na bu niloh hi. A ngaihbaang na mai hong musak inla, a lungzuan huai na awging hong zasak in.

¹⁵ “I leengguite pak ta ahih manin ngia no hon in a suksiat ma-in tua ngia no honte man ni,” hong ci hi.

Nungak

¹⁶ Ka ngaihno keima aʼ hi; kei zong ama aʼ hiʼng. Amah in unok paakte lakah a tuu cing a,

¹⁷ nitak huih vot mateng nitak ni tum mateng a cing hi. Sanang bangin mual tunga sakhital no bangin itluat aw, hong paikik in.