Sawltak 13 - Tedim Bible Revision 2017

¹ Antiok khua pawlpi sungah kamsang pawl khat le sia pawl khat om uh hi. Tuate pen Barnabas, Mi Vom pa zong a kici Simon, Sairin khuami Lusias, gam ukpipa khutnuai ah gam a uk sawn Herod tawh a khangkhawm Manaen le Saul ahi uh hi.

² Amaute in an tangin Pasian bia-in a om laitakun Kha Siangtho in amaute kiangah, “Keima na a sem dingin ka sap sa ahih manin kei adingin Barnabas le Saul hong pia khia un,” a ci hi.

³ Amaute in zong an tangin, a lu tung uh ah a khut uh nga-in thu a ngetsak khit uh ciangin a kuan khiasak uh hi.

Sawltakte in Saipras ah Thu Hilh

⁴ Kha Siangthoʼ sawlna mah bangin Seleusia khua ah pai suk uh a, tua khua panin teembaw tuangin Saipras tuikulh ah a pai uh hi.

⁵ Saipras tuikulh a om Salamis khua a tun uh ciangin Jew miteʼ kikhopna innte ah Pasian thu a hilh uh hi. Tua a nasepna uh ah a huh dingin Johan Marka zong amaute tawh a om khawm hi.

⁶ Tua tuikulh tung khempeuh ah zin kawikawi-in Pafos khua a tun uh ciangin mitphial a bawl, kamsang a kineih, Barjesuh min nei Jew mi khat a tuak uh hi.

⁷ Tua mipa pen tua tuikulh a uk sawn, a pil mahmah Sergius Paulus tawh a kithei mahmah mi khat ahi hi. Tua gam ukpa in Pasianʼ thu za nuam ahih manin Barnabas le Saul a sam hi.

⁸ Ahi zongin tua mitphial siampa Elymas (a Grik min) in Barnabas le Saul na nial a, gam ukpa in Pasianʼ thu a up theih loh nadingin a na hanciam hi.

⁹ Tua ciangin Saul (Paul zong a kici pa) Kha Siangtho tawh kidimin tua mipa limtakin en a,

¹⁰ “Dawimangpa tawh a kibang mipa aw, thuhoih khempeuh nialin, gitlohna ngian tuamtuam na nei a, Topaʼ thuman pen zuau suahsak ding na hanciam tawntung hi.

¹¹ Tu-in Topa in nang hong su dinga, na mit taw-in tawl khat sung khua na mu kei ding hi,” a cih khit phetin, meii vom in Elymasʼ mit tuamcip a, a khut lenin amah a paipih ding mi a zawt kawikawi hi.

¹² Gam ukpa in hih thupiang a muh ciang le Topa thu a kigente a zak ciangin lamdang sa mahmah in Pasian a um hi.

Paul le Barnabas in Antiok khua ah Thu Hilh

¹³ Tua ciangin Pafos khua panin Paul le a lawmte teembaw tuangin Pamfilia gam Perga khua a tung uh hi. Tua khua panin Johan Marka in amaute nusia-in Jerusalem khua ah a ciahkik hi.

¹⁴ Ahi zongin Perga khua panin amaute paisuak uh a, Pisidia gam Antiok khua a tung uh hi. Sabbath ni-in kikhopna inn ah pai-in a tu uh hi.

¹⁵ Kikhopna inn ukte in Moses Thukham Laibu sung le kamsangteʼ laibute a sim khit uh ciangin amaute kiangah, “Sanggamte aw, mihonte tungah hanthotna kam na gen nop uh leh thu nong gen ding uh ka deih uh hi,” a cisak uh hi.

¹⁶ Tua ahih manin Paul hong dinga, a khut vanin thugen ding hong kipan a, “Israel mipihte le hih lai ah Pasian a bia Gentail mite aw, ka thugen na ngai un.

¹⁷ Hih Israel miteʼ biak Pasian in ko Israel miteʼ pu le pate na na teel a, Egypt gamah peemta-in a om sungun minam lian khatin a na bawl hi. Pasian in ama vangliatna tawh Egypt gam panin amaute na paikhiatpih a,

¹⁸ kum sawm li sung gam sungah amaute na ompih kenkon hi.

¹⁹ Pasian in Kanaan gam sungah minam sagih a suksiat khit ciangin kum za li le kum sawm nga sung bang ama mite a luahsak hi.

²⁰ “Tua khit ciangin kamsang Samuel hun ciang dong amauteʼ vai a hawm dingin ukpite a pia hi.

²¹ Amaute in kumpi ding a nget uh ciangin Pasian in Benjamin minam sung pan Kishʼ tapa Saul, kum sawm li sung amauteʼ kumpi dingin a pia hi.

²² Pasian in kumpi dingin Saul a zat nawn loh ciangin amauteʼ kumpi dingin David a semsak hi. Pasian in Davidʼ thu genin, ‘Ka sawl khempeuh a sem ding, ka deih bang mi khat, Jessiʼ tapa David ka mu khin hi,’ a cih sa thu ahi hi.

²³ Pasian in ama ciam sa bangin Israel mite a hon khia dingin hih Davidʼ suan sung pan Jesu a bawl hi.

²⁴ Jesu in nasep a kipat ma-in, a mawhna panun kisikin tui a kiphum nadingun Johan in Israel mi khempeuh tungah thu a hilh hi.

²⁵ Johan in ama nasep a zawh kuan ciangin mite kiangah, ‘Kei kua hi hong ci na hi uh hiam? Kei pen noteʼ ngak pa ka hi kei hi. En un, kei nungah na ngak pa uh hong pai a, ama khedap khau a sutsak ding nangawnin ka kilawm zo nai kei hi,’ ci hi.

²⁶ “Abrahamʼ suan ka behte le Pasian a bia Gentail mi khempeuh aw, hih hotkhiatna thu pen eite adingin Pasian in a hong puak ahi hi.

²⁷ Jerusalem khua-a a teeng mite le a makaite un Jesu pen Honpa ahih lamtak na thei lo uh a, Sabbath nisimin a kisim niloh kamsangteʼ thu zong na tel lo uh hi. Amaute in Jesu na mawhsak uh ahih manin kamsangteʼ thugente a manin hong tung hi.

²⁸ Amaute in Jesu in sihna a thuak nadingin thukhenna a ngah nading thu mu zo lo napi uh, Pilat in thah nading thu a piak nadingin na ngen teitei uh hi.

²⁹ Lai Siangtho in Jesuʼ thu a gen bang teekteekin a bawl khit uh ciangin singlamteh tung panin la khia sukin han sungah a koih uh hi.

³⁰ Ahi zongin Pasian in sihna panin amah hingkiksak a,

³¹ Galilee gam le Jerusalem khua kikalah amah tawh khual a zinzin khawm ngei mite tungah tam veipi a mun tuamtuam ah na kilang hi.

^32-33 Kote pen note kiangah Lungdamna Thu a puak dingin hih lai ah a hong om ka hi uh hi. Tua thu in: Pasian in i pu i pate tungah a ciam thu pen Jesu a hinkiksakna tawh, Israelʼ suan ahi eite le midang khempeuh adingin tu-in a hong tungsak ahi hi. Late a lian nihna sungah, ‘Nang pen ka Tapa na hi a, tu ni-in nangma Pa ka suak hi,’ a cihna thu hong tungsak hi.

³⁴ Muatna a thuakkik ngei nawn lo dingin sihna panin amah a hinkiksakna tawh kisai-in Pasian in a thugenna ah, ‘David tungah ka ciam sa mah bangin note tungah thupha siangtho kong pia takpi ding hi,’ ci hi.

³⁵ Tua mah bangin Late a gelh pa in zong, ‘Nang tungah a hong thuman na nasem pa muatna na thuaksak kei ding hi,’ a ci hi.

³⁶ David in ama hun lai-in Pasianʼ deihna bangin na sem a, a sih ciangin a pu a pate gei mahah kisialin muatna a thuak hi.

³⁷ Ahi zongin Pasian in sihna panin a hinkiksak Jesu in muatna thuak lo hi.

³⁸ Tua ahih ciangin sanggamte aw, hih Jesu hangin mawhmaisakna thu note tungah hong kihilh ahihna teltakin na theih ding uh ahi hi.

³⁹ Tua tham loin Jesu a um mite khempeuh pen Moses Thukham in a suahtaksak zawh loh mawhna khempeuh panin a suakta ahihna thu na theih ding uh ahi hi.

^40-41 Tua ahih manin kamsangte in, ‘Pasian a thusim lo mite aw, lamdang sa lua-in na si ding uh hi. Na nuntak sungun note lakah ka sepkhiat ding uh thu pen mi khatpeuh in hong gen hileh na up het loh ding uh thu ahi hi,’ ci-in a gen uh thute, note tungah hong pian khak loh nadingin kidawm un,” a ci hi.

⁴² Kikhopna inn panin Paul le Barnabas a ciah ding uh ciangin, Sabbath ni kik ciangin hih thute mah hong gen lai un, ci-in mite in a vaikhak uh hi.

⁴³ Kikhopna inn panin a ciahkhiat uh ciangin Jew mi tampite le Jew biakna a zui Gentail mi tampite in Paul le Barnabas zui uh a, amau tegel in zong tua mite hanthawnin, Pasianʼ hehpihna suangin kip takin a om nadingun a gen uh hi.

⁴⁴ A Sabbath ni kik ciangin Pasianʼ thu a ngai dingin a khuazang phialun hong kikhawm uh hi.

⁴⁵ Jew mite in mi tampi tak a hong kikhawm a muh uh ciangin Paul le Barnabas haza uh ahih manin Paulʼ thugente a man lopi hi, ci-in Paul a gen sia uh hi.

⁴⁶ Tua ciangin Paul le Barnabas in hang takin thu gen uh a, “No Jew mite tungah Pasianʼ thu kong gen masak ding mah uh ahi hi. Ahi zongin note in Pasianʼ thu nialin, nuntak tawntungna a ngah dingin kilawm zo kisa lo na hih manun, note kiang panin pai khia-in Gentail mite kiangah ka pai ding uh hi.

⁴⁷ Bang hang hiam cih leh Topa in kote kiangah thu hong pia khinzo a, ‘Leitung mi khempeuh in hotkhiatna a ngah theih nadingin Gentail miteʼ khuavak ahi dingin ka hong koih hi,’ hong ci hi,” a ci uh hi.

⁴⁸ Gentail mite in hih thu a zak uh ciangin lungdam mahmah uh a, Pasianʼ thu hoih mahmah hi, ci-in a phat uh hi. Nuntak tawntungna a ngah dingin Pasian in a teel sa mite in Pasianʼ thu hong um uh hi.

⁴⁹ Tua gam kiim khempeuh ah Topaʼ thu kizel hi.

⁵⁰ Ahi zongin Jew mite in tua khua sung uliante le Gentail mi numei citheite holhthawh uh a, Paul le Barnabas bawlsiat ding kipanin, tua gam panin a tai khiasak uh hi.

⁵¹ Sawltakte in zong a khe uh a leivui baangte sinkhiat sanin Ikonium khua ah a pai uh hi.

⁵² Antiok khua-a om thu um mite ahihleh Kha Siangtho tawh kidimin lungdam mahmah in a om uh hi.