ROM (Romans) 8 - Tedim Bible Revision 2017

Pasianʼ Kha Siangthoʼ Deihna tawh Nuntakna

¹ Ahi zongin tu-in ahihleh Khris Jesu tawh kipawlin a nungta mite pen mawhna thukhenna tawh kipelh hi.

² Bang hang hiam cih leh Khris Jesu tawh a hong kipawlsak Kha Siangtho in mawhna le sihna a piangsak thukham panin kei hong suaktasak khinta hi.

³ Mihingte thahat lo ihih manin Thukham in ahih zawh loh thute Pasian in a hih zo hi. Mawhna a beisak theih nadingin mihingte sunga om mawhna tungah thu a khenna-in ama Tapa hong sawl a, amah pen mihingteʼ mawhna lungsim mah a nei-in a hong pai hi.

⁴ Eiteʼ deihna bangin nungta loin Pasianʼ Kha Siangthoʼ deihna bangin a nungta eite sungah Thukhamʼ deihna teng a kicin theih nadingin Pasian in a Tapa a hong sawl ahi hi.

⁵ Amau pumpi deihna bangin a nungtate, amau pumpi deihna in a lungsim uh a uk hi; Kha Siangtho deihna bangin a nungtate, Kha Siangtho in amau lungsim a uk hi.

⁶ I ngaihsutna, i pumpi deihna uksak lehang sihna tawh kizom hi; i ngaihsutna, Kha Siangtho uksak lehang nuntakna le nopsakna tawh a kizom hi.

⁷ Mi khatpeuh in ama pumpi deihna a ki-uksak ciangin Pasianʼ thukhamte zui lo ahih manin Pasianʼ gal suak a, a zuih nop hangin zong zui thei lo hi.

⁸ Amau pumpi deihna bangin a gamtate in Pasian lungdamsak thei lo uh hi.

⁹ Note sungah Pasianʼ Kha Siangtho hong om nakleh nomau pumpi deihna bangin gamta loin Kha Siangtho deihna bangin na gamta ding uh hi. Khris lungsim a nei lote Khris tawh kipawl lo hi.

¹⁰ Ahi zongin note sungah Khris hong om leh mawhna hangin na pumpi uh a si veve ding ahi zongin, note pen Pasian tawh kipawl khin na hih manun note adingin Kha Siangtho pen nuntakna ahi hi.

¹¹ Sihna panin Jesu a thokiksak Pasianʼ Kha Siangtho note sungah hong om leh sihna panin Khris a hingkiksak pa mah in note sungah a om ama Kha Siangtho mah tawh a si thei pumpi a hong nungtasak ding hi.

¹² Tua ahih ciangin lawmte aw, i pumpi deihna bang zui-in gamtat ding a kiphamawh hi lo hi.

¹³ Na pumpi uh deihna zui-in na gamtat uh leh na si ding uh a, ahi zongin Kha Siangtho huhna tawh na mawh gamtatnate uh na sihsak uh leh na nungta ding uh hi.

¹⁴ Pasianʼ Kha Siangtho in a makaih mite, Pasianʼ tate ahi uh hi.

¹⁵ Note tungah Pasian in a hong piak a Kha Siangtho in note na lau nadingun sila-in a hong bawl hi lo a, Kha Siangtho in Pasianʼ tate a hong suaksak ahi zaw hi. Tua Kha Siangtho mah in Pasian pen, “Pa aw, Pa aw,” hong ci theisak hi.

¹⁶ Eite, Pasianʼ tate ihihna thu eima lungsim bek in a gen hi loin Pasianʼ Kha Siangtho in zong hong genpih hi.

¹⁷ Eite pen ama ta ihih manin mite adingin a koih thuphate i ngah banah Khris adingin a koihte zong i ngahkhawm lai ding hi. Bang hang hiam cih leh Khris in a thuak mah bangin i thuak nakleh amah a minthan mah bangin ei zong i minthang ding hi.

¹⁸ Tu hun a i thuaknate pen Pasian in a hong piak ding minthanna tawh ka ngaihsut khawm ciangin gentham ka sa het kei hi.

¹⁹ Pasianʼ bawl sa khempeuh in Pasianʼ tate a hong kilahkhiat hun ding lawp mahmah in a ngak uh hi.

²⁰ Pasianʼ bawl sate, amau utthu tawh hi loin siatna a thuak dingin Pasian mahmah in a ngaihsut sa ahi hi. Ahi zongin lametna om lai hi.

²¹ Pasianʼ bawl sate, ni khat ni ciangin muat theih nading thu panin suakta-in Pasianʼ tate tawh a nuam suahtakna a ngahkhawm ding uh hi.

²² Tu hun ciang dong Pasianʼ bawl sa khempeuh nupi nausuak ding bangin na sa-in a tauna uh i thei hi.

²³ Pasianʼ bawl sa nate bek hi lo a, Pasianʼ hong piakkhong Kha Siangtho maleep a ngah eite mahmah nangawn in zong, Pasian in ama tate-in hong bawlin i buppi-in a hong suahtaksak ding i ngak kawmin thumin tau-in i om hi.

²⁴ Hih bangin lamenin i upna in eite hong hon khia khin hi. Ahi zongin i lamet pen i muh ciangin tua pen lamet hi nawn lo hi. Kua in a muh sa nate lamen nawn ahi hiam?

²⁵ I muh lohte i lamet ciangin lungduai takin i ngak thei hi.

²⁶ Tua ahih manin eite bangzahin gina lo hitale hang eite a hong huh dingin Kha Siangtho a hong pai hi. Eite in a kilawm bangin thunget ding nangawn i thei kei a, ahi zongin Kha Siangtho mah in tauna tawh eite adingin a hong thumsak hi.

²⁷ Kha Siangtho in Pasianʼ deihna tawh kizui-in Pasianʼ mite adingin hong thumsak ahih manin mihingteʼ lungsim tawng thu a thei Pasian in Kha Siangthoʼ ngaihsutna a thei hi.

A Gualzo Pente

²⁸ Ama deihna bang a sem dingin Pasian in a hong sap, amah a it eite adingin piangsak hi, ci-in i thei hi.

²⁹ Pasianʼ Tapa mi khempeuh lakah a upa pen a suah theih nadingin Pasian in a teel kholh sa mite, a Tapa tawh a kibang dingin a seh sa ahi hi.

³⁰ Tua ahih manin ama sap mite a seh sa hi a, a sap mite amah tawh a kipawlin bawl a, amah tawh a kipawlin a bawl mite ama minthanna zong a hawm hi.

³¹ Hih teng bang ahih khit ciangin bang gen ding om nawn ahi hiam? Pasian in eite hong kop pih peuh leh kua in eite hong zo zo ding ahi hiam?

³² Ama Tapa nangawn siit loin eite khempeuh adingin hong pia khia ahih manin, na dang khempeuh zong hong pia zaw kan ding hi lo ahi hiam?

³³ Pasian in mawh lo hi, ci-in a gen khit sa ahih manin, Pasianʼ teel sa mite tungah kua in mawhna guan thei nawn ding ahi hiam?

³⁴ Tua ahih manin kua in amaute tungah thu khen thei nawn ding ahi hiam? Eite adingin a hong thumsak pa pen Pasianʼ tak lamah a tu, a sih khit ciangin sihna panin a kihingkiksak Khris Jesu hi lo ahi hiam?

³⁵ Tua ahih manin bangin Khrisʼ itna tawh hong kikhensak zo ding ahi hiam? Haksatna, lungkhamna, bawlsiatna, gilkialna, zawnna, lauhuaina, sihnate khat peuhpeuh in hong khen zo ding ahi hiam?

³⁶ Lai Siangtho sungah zong, “Note hangin sun thapai-in siat nading lauhuaina ka thuak uh a, gawh ding tuu bangin a hong kibawl hi,” ci-in a kigelh hi.

³⁷ Eite a hong it paʼ hangin hih thu khempeuh ah a gualzo pente ihi hi.

³⁸ Bangmah in ama hong itna tawh hong kikhensak zo het lo ding hi, ci-in ka thei hi. Sihna, nuntakna, vantung mite, vantung vangliatnate, tu hun nate le a hong tung ding nate,

³⁹ leitung a om nate, leinuai-a om nate, Pasianʼ bawl sa nate khat peuhpeuh in i Topa Khris Jesu hangin Pasian in eite hong itna tawh hong khen zo het lo ding hi.