ROM (Romans) 5 - Tedim Bible Revision 2017

Pasian tawh Kipawl Khin ta

¹ Tu-in upna hangin Pasian tawh kipawl khinta ihih manin i Topa Jesu Khris hangin Pasian tawh a kilemkik ta ihi hi.

² Ama hangin upna tawh tu-a i omna Pasian hehpihna sungah a tung ihi a, Pasian tawh minthanna ngahkhawm ding, ci-in lamen ihih manin i lung a dam hi.

³ Haksatna i thuak laitak nangawnin i lungdam veve hi. Bang hang hiam cih leh haksatna in thuak zawh hatna piangsak a,

⁴ thuak zawh hatna in Pasianʼ pahtakna hong ngahsak a, ama hong pahtakna in lametna lianpi hong neisak ahihna thu i thei hi.

⁵ Pasian in eite tungah a hong piak a Kha Siangtho tawh eite sungah ama itna hong guang ahih manin hih lametna in eite hong lungkiasak ngei lo hi.

⁶ Eite cimawhin i om laitakin Pasianʼ hoihsak hunin ei migilote adingin Khris hong si hi.

⁷ Mihoih khat adingin a si ngam a om kha ahi zongin thukham zui zo mipa adingin sih ngam nading a thuhaksa mahmah khat ahi hi.

⁸ Ahi zongin eite mawhna nei ihih laitakin eite adingin Khris hong si ahih manin Pasian in eite hong it mahmahna thu hong lak khin hi.

⁹ Ama sihna hangin tu-in Pasian tawh kipawl thei ihih manin Pasianʼ hehna hangin gimna panin zong hong suaktasak zaw kan lai ding hi.

¹⁰ Pasian tawh eite i kilangneih laitakin ama Tapaʼ sihna hangin amah tawh hong kilemsak ahihleh tu-in Pasian tawh kipawl khinta ihih manin Khris nuntakna in eite hong hon khia zo zaw kan ding hi lo ahi hiam?

¹¹ Tua teng bek hi lo lai a, Pasian tawh hong kilemsak i Topa Jesu Khris hangin Pasian tungah i nuam mahmah hi.

Adam le Khris A Kilamdanna

¹² Mi khat hangin leitungah mawhna hong om a, tua mawhna hangin sihna hong piang hi. Mi khempeuh mawh uh ahih manin tu-a bangzia-in mi khempeuh tungah sihna hong tung hi.

¹³ Thukham a om ma pekin leitungah mawhna na om khin a, thukham a om lohna munah Pasian in mawhna a ciaptehna laibu nei lo hi.

¹⁴ Ahi zongin Adam hun a kipan Moses hun dongin sihna in mite uk a, Adam in Pasianʼ thupiak a man loh manin a khialh bangin a khial nai lo mite nangawn sihna khutnuai mah hi veve uh hi. Adam pen a hong pai lai ding mipaʼ lim ahi hi.

¹⁵ Ahi zongin Pasianʼ hong piak letsong pen Adamʼ mawhna tawh kibang lo ahih manin tua tegel tehkak theih ding hi lo hi. Tua mi khat a khialhna hangin mi tampi a sihna pen a man mah ahi hi. Ahi zongin Pasianʼ hong itna le hong hehpihna nakpi takin lian zaw lai a, mi khat ahi tua Jesu Khrisʼ hehpihna hangin mi tampi tak tungah hong kipia letsong lian mahmah hi.

¹⁶ Pasianʼ letsong le mi khatʼ mawhna a hatna zia kilamdang hi. Khialhna khat a om khit ciangin, “Mawh hi,” ci-in thukhenna kipia a, ahi zongin khialhna tampi tak a om khit ciangin a kilawm lopi mahin, “Dik hi,” cihna piakkhong thupha a om hi.

¹⁷ Mi khat bekʼ mawhna hangin sihna in hong uk ahihleh mi khat mah ahi Jesu Khris hangin nakpi takin a lian Pasianʼ hehpihna le mi hoih a sanna a ngah mite nungta-in thahat zaw kan ding uh hi.

¹⁸ Tua hi a, khialhna khat in mi khempeuh tungah thukhenna tungsak ahih mah bangin gamtatna hoih khat mah in mi khempeuh khahin nungtasak hi.

¹⁹ Mi khat in thu a man loh manin mi tampi mimawh a suahsak mah bangin mi khat in thu a manna hangin mi tampi in Pasian tawh kipawl theihna a ngah ding uh ahi hi.

²⁰ Khialhna a tam semsem nadingin thukham hong kipia hi. Ahi zongin khialhna a tamna munah Pasianʼ hehpihna hong lian zaw zel hi.

²¹ Tua ahih manin mawhna thahatin hong sihsak mah bangin, i Topa Jesu Khris hangin Pasianʼ hehpihna thahat zaw lai a, mihoihin hong sangin nuntak tawntungna sung a hong tunpih hi.