Piancilna 5 - Tedim Bible Revision 2017

Adamʼ Suanlekhakte

¹ Hih pen Adamʼ suanlekhakteʼ laibu ahi hi. Pasian in mi a piansakin, amah in Pasian tawh a kisunin a bawl hi.

² Amah in numei le pasal a piangsak hi. Amaute a kipiansakin amah in amaute, “Mi,” ci a, amaute thupha a pia hi.

³ Adam kum za le kum sawm thum a phak khit ciangin, amah a sun tapa khat nei a, Seth ci-in a min a phuak hi.

⁴ Seth a suah khit ciangin Adam kum za giat sung nungta lai hi. Amah in tanu le tapa dang zong a nei hi.

⁵ Tua ahih ciangin Adamʼ nuntak hun sungteng pen kum za kua le kum sawm thum hi a, tua ciangin amah si hi.

⁶ Seth kum za le kum nga a phak ciangin Enosh kici tapa khat a nei hi.

⁷ Enosh a suah khit ciangin Seth kum za giat le kum sawm thum nungta a, tanu le tapa dang nei lai hi.

⁸ Tua ahih ciangin Sethʼ khan sungteng pen kum za kua le kum sawm le kum nih hi a, tua ciangin amah si hi.

⁹ Enosh kum sawm kua a phak ciangin, amah in Kenan kici tapa khat nei hi.

¹⁰ Kenan a suah khit ciangin Enosh kum za giat le kum sawm le kum nga nungta a, tanu le tapa dang nei lai hi.

¹¹ Tua ahih ciangin Enoshʼ khan sungteng pen kum za kua le kum nga hi a, tua ciangin amah si hi.

¹² Kenan kum sawm sagih a phak ciangin, Mahalalel kici tapa khat nei hi.

¹³ Mahalalelʼ suah khit ciangin Kenan kum za giat le kum sawm li nungta a, tanu le tapa dang nei lai hi.

¹⁴ Tua ahih ciangin Kenanʼ khan sungteng pen kum za kua le kum sawm hi a, tua ciangin amah si hi.

¹⁵ Mahalalel kum sawm guk le nga a phak ciangin Jared kici tapa khat nei hi.

¹⁶ Jaredʼ suah khit ciangin Mahalalel kum za giat le kum sawm thum nungta a, tanu le tapa dang nei lai hi.

¹⁷ Tua ahih ciangin Mahalalelʼ khan sungteng pen kum za giat le kum sawm kua le kum nga hi a, tua ciangin amah si hi.

¹⁸ Jared kum za le kum sawm guk le kum nih a phak ciangin Enok kici tapa khat nei hi.

¹⁹ Enokʼ suah khit ciangin Jared kum za giat nungta a, tanu le tapa dang nei lai hi.

²⁰ Tua ahih ciangin Jaredʼ khan sungteng pen kum za kua le kum sawm guk le kum nih hi a, tua ciangin amah si hi.

²¹ Enok kum sawm guk le nga a phak ciangin, Methuselah kici tapa khat nei hi.

²² Methuselahʼ suah khit ciangin kum za thum sung Enok le Pasian kikhawl a, tanu le tapa dang nei lai hi.

²³ Tua ahih ciangin Enokʼ khan sungteng pen kum za thum le kum sawm guk le kum nga ahi hi.

²⁴ Enok pen Pasian tawh kikhawl hi. Enok kimu nawn lo hi; bang hang hiam cih leh Pasian in amah la hi.

²⁵ Methuselah kum za le kum sawm giat le kum sagih a phak ciangin Lamek kici tapa khat nei hi.

²⁶ Lamekʼ suah khit ciangin Methuselah kum za sagih le kum sawm giat le kum nih nungta a, tanu le tapa dang nei lai hi.

²⁷ Tua ahih ciangin Methuselahʼ khan sungteng pen kum za kua le kum sawm guk le kum kua hi a, tua ciangin amah si hi.

²⁸ Lamek kum za le kum sawm giat le kum nih a phak ciangin tapa khat nei a,

²⁹ ama min Noah phuakin, “Topa in a samsiat sa leitang panin hih pa in i nasepna le i gimnate ah eite hong khah khia ding hi,” a ci hi.

³⁰ Noahʼ suah khit ciangin Lamek kum za nga le kum sawm kua le kum nga nungta a, tanu le tapa dang nei lai hi.

³¹ Tua ahih ciangin Lamekʼ khan sungteng pen kum za sagih le kum sawm sagih le kum sagih hi a, tua ciangin amah si hi.

³² Noah kum za nga a phak khit ciangin Shem, Ham le Jafeth, tapa thum a nei hi.