Piancilna 1 - Tedim Bible Revision 2017

Leitung le Mihing Piansakna

¹ A kipat cil-in Pasian in vantung le leitung a piangsak hi.

² Leitung in limlemel nei loin a awngthawlpi ahi hi. Tuipi tung tengah khua mial bikbek a, tua tui tungah Pasianʼ Kha in na a sem hi.

³ Pasian in, “Khuavak om hen,” ci hi; tua ciangin khuavak om pah hi.

⁴ Pasian in tua khuavak hoih hi, ci-in a mu hi. Pasian in khuamial panin khuavak khen khia hi.

⁵ Pasian in khuavak pen “Sun” ci a, khuamial pen “Zan” ci hi. Nitak hong bei-in, zingsang hong tunga, ni khat ni ahi hi.

⁶ Pasian in, “Tuiteʼ laizang ah van kuumpi om henla, tua van kuumpi in tui le tui kikhensak hen,” ci hi.

⁷ Pasian in van kuumpi bawl a, van kuumpi tunga om tuite le van kuumpi nuai-a om tuite a khen hi. Tua mah bangin a piang pah hi.

⁸ Pasian in van kuumpi pen “Vantung” ci hi. Nitak hong bei-in zingsang hong tunga, ni nih ni ahi hi.

⁹ Pasian in, “Vantungte nuai-a om tuite mun khat ah kikhawm henla, lei keu kidawk hen,” ci hi. Tua mah bangin a piang pah hi.

¹⁰ Pasian in lei keu pen “Leitung” ci a, a kikaikhawm tuite pen “Tuipi” ci hi. Pasian in tua pen hoih hi, ci-in a mu hi.

¹¹ Pasian in, “Leitung in kung tuamtuamte piangsak henla, tang a nei kungnote, a gah sungah tang a om singgah kungte, amauʼ nam ciatin leitungah piangsak hen,” ci hi. Tua mah bangin a piang pah hi.

¹² Leitung in kung tuamtuamte piang khiasak a, kungnote in amauʼ nam ciatin tang piangsakin, singkung in a sungah tang a om gahte piangsakin, amauʼ nam ciatciatin piangsak hi. Pasian in tua pen hoih hi, ci-in a mu hi.

¹³ Nitak hong bei-in zingsang hong tunga, ni thum ni ahi hi.

¹⁴ Pasian in, “Sun le zan a khen dingin vantungah khuavakte om hen; tuate pen pawi hun le khuahun, ni le kumte khen nading hi henla,

¹⁵ leitung khua a vaksak dingin vantungah khuavak hi uh hen,” ci hi. Tua mah bangin a piang pah hi.

¹⁶ Pasian in khuavak lian nih bawl a, khuavak lian zaw pen sun a uk ding, khuavak neu zaw pen zan a uk dingin bawl a, amah in aksite zong a bawl hi.

^17-18 Leitungah khua a vaksak ding, sun le zan a uk ding, khuamial panin khuavak a khen khia dingin Pasian in vantungah tuate a koih hi. Pasian in tua pen hoih hi, ci-in a mu hi.

¹⁹ Nitak hong bei-in zingsang hong tunga, ni li ni ahi hi.

²⁰ Pasian in, “Tuite in a nungta ganhing honpite piangsak henla, vantung kantanin leitungah vasate leeng tahen,” ci hi.

²¹ Tua ahih ciangin Pasian in tuipi ganhing golpite le amau nam ciatin tuipi sungah tampi a pha, nuntakna a nei a gamtang thei ganhing namkim le kha a nei vasa khempeuh amau nam ciatin a piangsak hi. Pasian in tua pen hoih hi, ci-in a mu hi.

²² Pasian in amaute thupha pia a, “Ci pha-in tampi pha-in, tuipi sung dim unla, leitungah vasate tampi pha un,” ci hi.

²³ Nitak hong bei-in zingsang hong tunga, a ni nga ni ahi hi.

²⁴ Pasian in, “Nuntakna a nei ganhingte amau nam ciatin leitung in piangsak hen: Innsa, gamsa le a bokvak ganhingte amau nam ciatin piang tahen,” a ci hi. Tua mah bangin a piang pah hi.

²⁵ Innsa, gamsa le a bokvak ganhing khempeuh amau nam ciatin Pasian in a piangsak hi. Pasian in tua pen hoih hi, ci-in a mu hi.

²⁶ Tua ciangin Pasian in, “Eima lim, eimah hong sunin mihing bawl ni. Tuipi ngasate tung, huihlak vasate tung, ganhingte tung le leitung a, a bok vakte tungah ukna neisak ni,” a ci hi.

²⁷ Tua ahih ciangin Pasian in ama lim bangin mihing piangsakin, Pasianʼ lim bangin amah a piangsak hi. Amah in numei le pasal a piangsak hi.

²⁸ Pasian in amaute thupha pia a, Pasian in amaute tungah, “Ci pha-in tampi pha unla, leitung dimin zo un. Tuipi ngasate tung, leitungah a gamtang, a nungtate tungah ukna nei ta un,” a ci hi.

²⁹ Pasian in, “En un, leitung maitang khempeuh ah a om, tang a piangsak kungno khempeuh le a gah sungah tang a om singkung khempeuh note tungah kong pia khinta hi. Tuate an-in na nei ding uh hi.

³⁰ Leitung ganhing khempeuhte tung, huihlak vasate tung, leitungah a bok vakte tung, nuntakna hu a neite tungah an dingin kung hing khempeuh kong pia khinta hi,” a ci hi. Tua mah bangin a piang pah hi.

³¹ Pasian in a bawl sa khempeuh en a, hoih sa mahmah hi. Nitak hong bei-in zingsang hong tunga, a ni guk ni ahi hi.