Paunak 7 - Tedim Bible Revision 2017

Numei Paktatteʼ Hoih lohna

¹ Ka ta aw, ka thugente ciamteh inla, kong sawl thute khempeuh mangngilh ngei kei in.

² Kong gen bangin gamta lecin na nungta ding hi. Kong thuhilhte, na mitnauta bangin hoihtakin kem in.

³ Kong hilhnate kem tawntung inla, na lungtang tungah gelh in.

⁴ Pilna na sanggamnu dingin nei inla, thumuhna na lawm it pen dingin nei in.

⁵ Tua hileh midangteʼ zi tungah na khialh khak loh nading, kam khum tawh a hong zol numei gina lote tawh na khialh khak loh nadingin hong hu ding hi.

⁶ Khat vei, ka omna inn ah, ka tawlet panin ka khuadak a,

⁷ bangmah a phawk nai lo tangval hon khat lakah, tangval thu thei lo khat, ka lim muh kha hi.

⁸ Lam dungah amah a vak laitakin, tua bang numei paktat a omna inn gei khat ah va pai kha a,

⁹ tua hun pen nitak ni tum khit zawh, khuamui hun laitak ahi hi.

¹⁰ Tua numei in numei paktatteʼ puansilh ngeite a silh kawmin ngimna khat tawh tua tangval na dawntuah hi.

¹¹ Tua numei pen maizumna mel thei loin a hang mahmah hi a, lamdung tengah vak tawntung hi.

¹² Mihon omna van zuakna phual, lamdung citeng, kong kiu khatpeuh ah mi ngakin om niloh hi.

¹³ Tua numei in tangvalpa thakhatin kawi-in tawp a, na maitai bawl mahmah in ama kiangah,

¹⁴ “Tu ni-in biakpiakna ka bawl a, nek ding sa tampi ka nei hi.

¹⁵ Ka nek pih dingin nang ka hong zong a, tu-in kong mu petmah hi.

¹⁶ Ka lupna tungah a nop mahmah dingin, Egypt gam puan hoih pente ka phah zo hi.

¹⁷ Myrrh paknamtui, aloes paknamtui, le sinnamon paknamtui tawh, ka lupna tung a namtui dingin ka bawl khinta hi.

¹⁸ Hong pai in; zan thapai-in ki-itna bawlin, ang kikawmin lungnuam ni.

¹⁹ Bang hang hiam cih leh ka pasal khual gamlapi ah zin a, tu laitakin inn ah om lo hi.

²⁰ Amah in sum tampi keng a, nipikal nih bang mateng hong tung lo ding hi,” a ci hi.

²¹ Tua ahih manin kam khum kam neel tawh amah zol a, tangvalpa in tua zolna a mang kha hi.

²² Tua ahih manin a kigo ding bawngtal in a sih nading mun a zuat bangin, sakhi in a awk nading thang zuanin a dian laklak bangin,

²³ thaltang in ama lungtang a khak nading munah amah va pai hi. Vasa in a sih nading thang antah a bawh bangin va bawh a, a lauhuai sung a tun lamtak thei lo hi.

²⁴ Ka tate aw, keiʼ lam hong nga unla, ka thugente hong ngai un.

²⁵ Tua bang numeiteʼ zolna mang kei unla, tua bangte tawh khial kha kei un.

²⁶ Tua bang numei in mi tampi tak siasakin, sim zawh loh ding mi tampiʼ sihna a piangsak hi.

²⁷ Tua bang numei zuihna pen sihna gam zuatna hi a, sih baih nading lampi zuatna ahi hi.