Paunak 6 - Tedim Bible Revision 2017

Thadahna le Zuauna tawh kisai Hilhkholhna

¹ Ka ta aw, na lawmte khatpeuh in sum leitawi a lak ciangin a loh zawh kei leh ama tangin a lohsak dingin kam na ciam kha hiam?

² Na kampauna hangin nang hong kimanin, na thuciamna hangin na awk kha hiam?

³ Ka ta aw, tua bang na hih khak leh, tua mipaʼ khut sungah a om na hi hi. Na suahtak theih nadingin manlangin a kiangah pai inla, hong khah nadingin ama kiangah thum in.

⁴ Ih mumu kei inla, om mawkmawk kei in.

⁵ Sabeng paʼ kiang panin a suahtak nadingin sakhi a tai bangin, thang ah a awk vasa a kitom bangin na suahtak nadingin hanciam in.

⁶ Thadahpa aw, miksite kiangah pai inla, amauʼ nuntak zia va en in.

⁷ Amaute in a uk ding le a makai ding kuamah nei lo napi-in,

⁸ khuakhal sungin a nek ding uh, tuk hun sungin kaikhawm khol uh hi.

⁹ Thadahpa aw, bang tanvei lumlum dinga, cik ciangin tho khia ding na hi hiam?

¹⁰ Tawm khat sung mengme lai ning, na cih kikalin

¹¹ zawnna le cihmawhna in migilo gutate bangin nang hong su gawp pak ding hi.

¹² Miginalo pa, a gilopa, thuzuau genin vak kawikawi a,

¹³ nang hong khemnop manin a mitheek hong pia-in, a khe tawh hong su-in a khut tawh hong khoih hi.

¹⁴ A lungsimah thusia bekbek ngaihsun niloh a, a omna peuh ah buaina a piangsak hi.

¹⁵ Tua ahih manin theih kholh lohin ama tungah lungkhamna tung dinga, bawlkik zawh nawn loh dongin siatna ngah ding hi.

¹⁶ Topa in a muhdah, a khah khong ngei loh ding, thu guk, tua zah bek hi lo, thu sagih tak om a, tuate pen

¹⁷ kihihsakna, zuau thu genna, mawhnei lo mi thahna,

¹⁸ thusia bawl ding ngaihsutna, gamtat siat ding a manlangte,

¹⁹ zuau thu gen teci man lote, le kitotna a piangsakte ahi hi.

Nulepa Mawhna Bawl loh Ding Hilhkholhna

²⁰ Ka ta aw, na paʼ hong gen bangin gamta inla, na nuʼ hong thuhilhnate mangngilh kei in.

²¹ Amauʼ hong thugente phawk tawntung inla, na lungsimah ciamteh niloh in.

²² Tua thute in na paina peuh ah lam hong lak dinga, zanin na ihmut kalin nang hong cing dinga, sunin na hah sungin na gamtat nading hong hilh ding hi.

²³ Bang hang hiam cih leh thukham le a hilhnate pen a taang mahmah khuavak bang hi a, khalna le hilhnate pen nuntak nading lampi hi a,

²⁴ miʼ zi tawh na mawh loh nadingin nang hong kemin, kam khum zangin a hong zol numei gina lote kiang panin nang hong hu ding hi.

²⁵ Amauʼ melhoihna iplah kha kei inla, amauʼ hong zawlmitna khenglah kha kei in.

²⁶ Bang hang hiam cih leh anlum khat tawh numei paktat khat kingah zo a, ahi zongin numei tawh mawhna in nuntakna bup siasak hi.

²⁷ Na ang sungah meikuang pom lecin na puan kaang loin om ding ahi hiam?

²⁸ Mei-am tungtawnin pai lecin na khe kaang loin om ding ahi hiam?

²⁹ Tua mah bangin miʼ zi tawh a mawhte in gimna thuak ding uh a, tua bang a gamta peuhmah in gimna thuak ding uh hi.

³⁰ A gilkial a cimawh mi khat in na a guk ciangin, midangte in mawhsak lua lo napi,

³¹ amah kiman leh a zah sagihin kilohsak a, a neih khempeuh a piak kul hi.

³² Ahi zongin numei tawh a mawhte pen thu ngaihsun thei lo mi hi a, amau le amau a kisusia tawm ahi uh hi.

³³ Mawhna a bawl mi in sat gawpna thuak dinga, a min sia-in mindai paisuak ding hi.

³⁴ A numeiʼ pasal a heh zawk theih nading thudang om nawn lo a, a heh thukna ah khawl hun cih nei thei lo hi.

³⁵ Amah in sumlepai sang nuam vet lo a, letsong tampi piakna in a hehna damsak zo lo hi.