Paunak 3 - Tedim Bible Revision 2017

Thumang Hih nading Hanthotna

¹ Ka ta aw, kong thuhilhte mangngilh kei inla, kong thugente phawk tawntung in.

² Kong thuhilhte in na khan hong sausak dinga, hong daupaisak ding hi.

³ Thumanna le cihtakna khahsuah ngei kei inla, na ngawng ah tuate okin, na lungtang tungah gelh in.

⁴ Tua hileh, Pasianʼ mai le miteʼ mai ah maipha ngahin na maa vang ding hi.

⁵ Na lungsim khempeuh tawh Topa muang inla, nangʼ theihna suang kei in.

⁶ Na hihna khempeuh ah amah phawk in. Tua hileh lampi man amah in hong lak ding hi.

⁷ Nangmah a pilin kingaihsun tawm kei inla, Topa zahtakin a sia peel in.

⁸ Tua hileh nang adingin damna zatui tawh kibang dinga, na meimate hong damsakin na natnate hong daisak ding hi.

⁹ Na neihsa le na anpalte tawh Topa zahtak in.

¹⁰ Tua hileh na ansalte an tawh kidim dinga, beel dimletin leenggahzu na nei ding hi.

¹¹ Ka ta aw, Topaʼ thuhilhna limtakin ngai-in, hong tainate thudon in.

¹² Bang hang hiam cih leh pa in a pahtak a tapa a thuhilh bangin Topa in a it mite a thuhilh hi.

¹³ Pilna nei-in thu a thei mipa, a lungdam mi ahi hi.

¹⁴ Pilna nei leeng ngun sangin hoih zaw a, kham sangin zong manpha zaw hi.

¹⁵ A manpha pen suangmanpha nangawn sangin pilna manpha zaw lai a, mihingteʼ deih theih na lakah tehpih theih ding om lo hi.

¹⁶ Pilna in khan hong sausak a, hauhna le pahtawina zong hong pia thuah lai hi.

¹⁷ Pilna in nuntakna hong nuamsak a, lungmuang takin hong omsak den hi.

¹⁸ Pilna a nei mite a lungdam mi hi a, pilna a nei mite nuntakna singkung tawh kibang uh hi.

¹⁹ Topa in pilna tawh leitung bawl a, a theihtelna tawh vantung a bawl hi.

²⁰ Ama pilna in gun tuite luangsak a, meiite in leitungah guah zusak hi.

²¹ Ka ta aw, pilna le thu ngaihsut theihna len tawntung inla, cikmah ciangin khahsuah ngei kei in.

²² Tuate pen nang adingin nuntakna hi dinga, na hoih nadingin kizepna hi ding hi.

²³ Tua hileh lungmuang takin na nungta dinga, puk nading thu bangmah om lo ding hi.

²⁴ Launa om loin nuam takin na lum dinga, zan tawntung lungmuang takin na ihmu thei ding hi.

²⁵ Migilote tungah huihpi bangin siatna a tun ciangin, nang na lunghihmawhna ding bangmah om lo ding hi.

²⁶ Bang hang hiam cih leh Topa in a muanhuai-in nang hong kem dinga, siatna hong tuaksak lo ding hi.

²⁷ Na hih zawh ding ahih nakleh midangteʼ kitangsapna huh tawntung in.

²⁸ Na vaihawmsak theih pah ding thute ahih nakleh, zing ciangin hong paikik in, ci-in a hun sot to kei in.

²⁹ Nangmah hong muangin nangma nai ah a hong teeng na veengpa, gim a ngah nading bangmah vaihawm kei in.

³⁰ Nangma tungah siatna bangmah a hong bawl lo, mi khatpeuh tawh thu om lopi-in kimawk tot kei in.

³¹ A ngongtat thei mite eng kha kei inla, amauʼ gamtat bangin gamta kha kei in.

³² Bang hang hiam cih leh Topa in a sia-in a gamtate mudah a, thuman mite bek a pawlpih dingin a la hi.

³³ Topa in migiloteʼ inn sung samsia a, thuman miteʼ inn sung thupha a pia hi.

³⁴ Amah in mi kihisakte bangmahin sim lo a, a kiniamkhiatte tungah maipha a pia hi.

³⁵ Mipilte in minphatna le pahtawina ngah ding uh a, mihaite in maizumna le mindaina ngah ding uh hi.