Paunak 24 - Tedim Bible Revision 2017

-19-

¹ Migilote eng kei inla, amaute tawh kikhawl kei in.

² Amaute in tatsiat ding bek ngaihsun uh a, thusia bekbek genin nei uh hi.

-20-

³ Pilna tawh inn kilam a, ngaihsut siamna tawh inn kip hi.

⁴ Thungaihsut theihna inn sungah a hoih a manpha nate a dimtakin om hi.

-21-

⁵ Thahatna sangin pilna hoih zaw a, thakhauhna sangin thutheihna hoih zaw hi.

⁶ Geel siamna tawh galte kizo a, ngaihsut siamna tawh gualzawhna kingah hi.

-22-

⁷ Pil kampauna pen mihaiteʼ theih zawh dingin thuk lua mahmah a, mihaite in mihon lakah thu gen ngam lo uh hi.

-23-

⁸ Thusia lamsang a deih mite thusia bawl mi kici hi.

⁹ Mihaiteʼ vaihawmna in khialhna bek piangsak lel a, mi a simmawh theite midangte in mudah uh hi.

-24-

¹⁰ Haksatna na tuah ciangin na lung a kiat leh a gina lo mi na hi hi.

-25-

¹¹ Thah dinga a kikai khia mipa hon khia inla, sih nading mun a zuan mipa lehkaihkik in.

¹² Keʼn thei kha kei ing, na cih nop hangin lungsim a thei Pasian in thei tel veve hi; nang hong encik Pasian in hong tel theihna phawk in. Mi khempeuh a gamtatna bangin a thukkik ding hi.

-26-

¹³ Ka ta aw, khuaizu khum ahih manin ne in. I kam ah khuailuzu khum mahmah hi.

¹⁴ Pilna pen i nuntakna ah khuaizu tawh kibang a, pilna nei lecin mai lamah lametna om a, na khan hong sausak ding hi.

-27-

¹⁵ Migiloteʼ gamtat bangin thuman miteʼ omna su gawp kei inla, amauʼ teenna inn luh gawp kei in.

¹⁶ Mihoihte sagih vei dong a puk hangin tho kikkik thei a, migilote ahihleh tuahsiatna thuakin kithallot hi.

-28-

¹⁷ Na galte in gimna a ngah ciangin lungdam kei inla, a puk ciangin kipak kei in.

¹⁸ Bang hang hiam cih leh Topa in hong thei-in nang tungah lungkim lo dinga, na galte tungah heh nawn loin gim pia lo kha ding hi.

-29-

¹⁹ Migiloteʼ hangin lung nuammawh kei inla, amaute eng kei in.

²⁰ Amaute in mai lamah lamet ding bangmah nei lo a, amauteʼ meivak kisukmitsak ding hi.

-30-

²¹ Ka ta aw, Topa le kumpipa zahtak khawm inla, amau a langpangte tawh kipawl kha kei in.

²² Tua bang mite thakhat thu-in kisu gawp thei ding hi. Pasian le kumpipaʼ piansak theih ding gimna kuamah in gen khol thei lo hi.

Mipilteʼ Thugen Dangte

²³ Mipil dangte in zong hih bangin thu gen uh hi: Mi lang muhin thukhenna hoih lo hi.

²⁴ Mimawh kimlai a diksak thukhen pa leitung a mi khempeuh in mudahin phuisam ding hi.

²⁵ A mawh mi gim a pia thukhen pa ahihleh thupha kipia-in daupai ding hi.

²⁶ A mantakin dawnkikna pen lawm taktak hihna lim ahi hi.

²⁷ Na nuntak nading zong masa inla, na annek ding a kicin ciang bekin na inn ding lamin zi le ta nei pan in.

²⁸ Thu kician om lopi-in na veengpaʼ lang khat ah teci pang kei inla, amauʼ siat nadingin zuau thu gen kei in.

²⁹ Kei tungah hong bawl bangin kei zong ka bawl dinga, ama hong hihna bangin ka thuk ding hi, ci kha kei in.

³⁰ Mi thadahpaʼ lo gei ah ka va pai a, mihai paʼ leenggui lo ka va nawk kha hi.

³¹ Limtakin ka et ciangin a lo ciing bupah kiak dim a, a leitang khempeuh lopa in khuhcip a, a umna a phungcian suangte kicim khin hi.

³² Tua bang ka muh ciangin thu ka lung ngaingai a, thu manpha khat ka mu khia hi.

³³ Tawmvei ihmutna, tawmvei lusukna, tawmvei sung na sep lohna, khut zepin om mawkna hangin

³⁴ i tungah zawnna hong tung a, cihmawhna in hong khuhcip hi.