Paunak 23 - Tedim Bible Revision 2017

-6-

¹ Mi liante tawh an nekhawm dingin na tut uh ciangin na tut pih pa limtakin en un.

² An a ngaklah thei mi na hih khak uh leh zong limtakin kidawm un.

³ Hong thangsiahna hi kha thei ding ahih manin tua anlimte lunggulh pah lua kei un.

-7-

⁴ Hauh nop man bekin sumʼ sila suak kei unla, a man loin gamta kha kei un.

⁵ Na ngah sa uh sumte mitphiat kalin bei mang thei a, muvanlai bangin thakhatin leeng mang thei hi.

-8-

⁶ A cil tentan miteʼ an neksak kei unla, a anlimte uh duhgawh kha kei un.

⁷ “Nene un,” hong cih hangin a cih takpi hi lo hi. Bang hang hiam cih leh na dangtawng a hong sun samzang nekkhak tawh kibang ding hi.

⁸ Na nek sa teng uh na lua khiakik ding uh a, na kamsiam ngah teeng uh maimang ta ding hi.

-9-

⁹ Mihaite pil hopih kei un; amaute in a manphatna phawk thei lo uh hi.

-10-

¹⁰ Tanglai gisuang khiin kei unla, tagahteʼ leitang va keek kei un.

¹¹ Amaute a pawlpih pa pen Topa hi a, noteʼ lang khat ah amaute panpih ding hi.

-11-

¹² Hong kihilhnate zui unla, pilna thu hong kigente ngai un.

-12-

¹³ Naupangte sat ding lunghiang kei un; satna hangin si lo ding hi.

¹⁴ Ciangduai tawh sat le-uhcin nuntak lawh zaw ding uh hi.

-13-

¹⁵ Ka ta aw, mipil suak lecin ka lungdam mahmah ding hi.

¹⁶ Thuman na gen ciangin ka nuam mahmah ding hi.

-14-

¹⁷ Mawhnei mite eng kha kei inla, Topa zahtakna zom paisuak in.

¹⁸ Tua bang hi lecin lametna om a, cithei-in na khansau ding hi.

-15-

¹⁹ Ka ta aw, ka thu ngai inla, mipil suak in; lampi man zuih ding ngaihsutpi-in nei in.

²⁰ Zu nenete tawh kikhawl kei inla, a uisante tawh kithuah kha kei in.

²¹ Zu nenete le a uisante zawng ding uh a, a ne bek a nitumte in puan sia bek silh zo ding hi.

-16-

²² Nangma pianna na paʼ thu ngai inla, na nu a teek ciangin simmawh bawl kei in.

²³ Thuman, pilna, siamna, thungaihsut theihna lei in; zuak khiat dingin tuate pammaih lua hi.

²⁴ Ta hoih a nei pa a lung dam dinga, ta pil a nei pa a taʼ tungah lungkim ding hi.

²⁵ Na nu le na pa a kipak nadingin gamta inla, na pianna nu lungdamsak in.

-17-

²⁶ Ka ta aw, ka thugente ciamteh inla, keima gamtat bangin nang zong gamta in.

²⁷ Numei paktatte pen kiat theih nading gum tawh kibang a, numei gina lote pen tangciak theihna hawkguam tawh kibang hi.

²⁸ Gutate bangin nang hong buk sim a, mi tampi tak siasak uh hi.

-18-

²⁹ Kuate in gal nei a, kuate in dahna thuak hiam? Thu om lopi-in kuate liam a, thu om lopi-in kuate a mit san gega hiam?

³⁰ Zu ne-a a tut khote zu a nenete ahi hi.

³¹ Hai sungah a phuan seuhseuh gawl sungah a tum suk hithit thei leenggahzu san et-in nei kei in.

³² A tawpna ah gulpi bangin nang hong tu dinga, gul gu nei in a tuk na bang ding hi.

³³ Na mitah na lam dangdang hong suak dinga, hoihtakin na pau thei nawn kei ding hi.

³⁴ Tuipi tungah a lum tawh na kibang dinga, a suk awn a to awn teembaw dawna tuang tawh na kibang ding hi.

³⁵ “Hong vuak hangun ka liam kei a, hong sat hangun ka phawk kei hi. Ka pilvang ciangin zu ka nekik ding hi,” na ci ding hi.