Paunak 22 - Tedim Bible Revision 2017

¹ Hauhna sangin min hoihna deihhuai zaw a, kham le ngun sangin miʼ hong thusimna deihhuai zaw hi.

² A hau a zawng a kilamdanna om lo a, a nih tuakun Topaʼ bawl sa ahi uh hi.

³ Mipilte in a lauhuai thu mu thei-in pelh uh a, mi mawkmawkte in phusuakin thuak uh hi.

⁴ Kiniamkhiat-a Topa zahtakna thaman in hauhna, minthanna, le khansauna ahi hi.

⁵ Migiloteʼ lampi ah thang kisiahin so kidawh a, mipilte in tua lampi pelh uh hi.

⁶ Naupang khat a neu lai-in lampi man tawnsak lecin a teek dongin lampial nawn lo ding hi.

⁷ Mihaute in mizawngte uk a, leitawi a late pen a piateʼ sila a suak hi.

⁸ Thuman lo khaici a vawhte in lungkhamna tuak uh a, amauʼ hehna ciangduai amauʼ tung mah tukik ding hi.

⁹ A cingh mi in mizawngte an pia a, amah in thupha ngahkik hi.

¹⁰ Mi kiphasakte hawl khia lecin kitotna le kisimmawhna bei pah ding hi.

¹¹ Kam siamna in kumpipaʼ lawm hong suaksak a, ahi zongin Topa in lungsim takpi a deih hi.

¹² Topa in thuman mite kem a, ahi zongin thuzuau gente a lawnthal hi.

¹³ Mi thadahte a inn ah lumlum a, “Pua pial lehang humpiʼn hong hih khaʼn teh,” ci uh hi.

¹⁴ Numei tungah mawhna pen thangzak bang hi a, tua thang ah a awkte tungah Topa a heh hi.

¹⁵ Naupangte a hai gamtat a ngeina hi a, deih takin pangbetna in mihoih suaksak thei hi.

¹⁶ Hauh nop manin mihaute letsong pia leeng kizawn lawh a, hauh nop manin mizawngteʼ neihsa laksak lehang zong kihauh lawh tuan lo hi.

Thupiakte le Hilhkholhna Sawm Thumte

¹⁷ Na bil uh hong ngatin mipilteʼ thugen ngai unla, kong hilh pilna thute na lungsim uh ah lutsak un.

¹⁸ Na lungsim uh ah ciingin zang thei le-uhcin, na lung uh dam tawntung ding hi.

¹⁹ Tua hileh Topa muanin na nei ding uh a, tu ni-in noteʼ phattuam nading kam a pau ka suak ding hi.

²⁰ Thuhilhna le pilna thu nam sawm thum hih lai ah note adingin ka gelh a,

²¹ thuman a kan dingin note hong sawlteʼ tungah thuman bang hiam cih na genkik theih nadingun thuman na theih nading uh ka deihna ahi hi.

-1-

²² Bangmah hong cih zo lo ding cihna hangin nuamtak sa-in mizawngteʼ neihsa mawk suh kei unla, zumah khia-in mawk bawlsiat kei un.

²³ Bang hang hiam cih leh Topa in amaute panpih dinga, amau a bawlsiate tungah phu a laksak ding hi.

-2-

²⁴ A heh baih mite tawh kipawl kei unla, a lung tom mite tawh kikhawl kei un.

²⁵ Amauʼ hoih lohnate na zuih khak loh nadingun na kidop kei uh leh note in zong na awk lawh kha ding uh hi.

-3-

²⁶ Midangteʼ leiba lohsak dingin kamciamin leiba tavuan la kha kei un.

²⁷ A leiba lohsak zo kei le-uhcin na lupna nangawn uh hong kidawh khiatsak ding hi.

-4-

²⁸ Na pu na pateʼ phuh sa gisuang cikmah hunin khiin kei un.

-5-

²⁹ A nasepna ah a siam mahmah mi na thei kha uh hiam? Amah in mi mawkmawkteʼ na sem lo dinga, kumpiteʼ na sem ding hi.