Paunak 21 - Tedim Bible Revision 2017

¹ Topaʼ khut sungah kumpipa om a, lo sunga tui lak bangin a deihna peuh ah hei kawikawi thei hi.

² Na gamtatna khempeuh nangmah in man na sak hangin Topa in na lungsim tawng a et telna phawk in.

³ Topa in biakpiakna sangin thuman thutang deih zaw hi.

⁴ Kihisakin gamtatna le kiphatsakna lungsimte pen mawhna hi a, migilo hihna lim ahi hi.

⁵ Limtakin ngaihsunin geelgeelna pen hauhna lampi hi a, nawhsa-in lopthop hihna pen zawnna lampi ahi hi.

⁶ Zuaugenna tawh hauhnate bei mang pak a, sihna khuk sung hong tunpih hi.

⁷ Migilote a manin gamta nuam lo uh ahih manin amauʼ gamtat siatna mah a awk pih uh hi.

⁸ Mimawhte thukawi-in gamta uh a, midikte a manin gamta uh hi.

⁹ Phun bek a thei zi tawh inn sungah ten khop sangin inn khumzang kiu khat ah tangten hoih zaw tham hi.

¹⁰ Migilote in thusia bekbek deih uh a, a lawmte nangawn zah tuan lo uh hi.

¹¹ Mi kiphasakte gim a kipiak ciangin mi mawkmawkte in pil lawh uh a, mipilte a kihilh ciangin thu theihna-in nei uh hi.

¹² Pasian in migilo paʼ inn sungah a kisem khempeuh mu tel a, migilote lawnthalin a siasak hi.

¹³ Mizawngteʼ huh ngetna a pia nuam lote pen amau zong cimawhin huhna a nget uh ciangin kipia lo ding hi.

¹⁴ A simthamin letsong piakna in hehna damsak a, puannuai tawi in sinsona daisak hi.

¹⁵ Thutangin na a kisep ciangin midik khempeuh lungdam a, ahi zongin migilote lungkham hi.

¹⁶ A kilawm gamtatna pan a pial khia mite misi honte lakah a tung hi.

¹⁷ A nop tat nuamte zawng uh a, zu ne-in sathau namtui a nilhte hau lo uh hi.

¹⁸ Midikteʼ thuak dingin a bawlsak uh gimnate pen migilote mah in leh thuak zawsop uh hi.

¹⁹ A phun hat zi gilo tawh ten khop sangin gam simtham ah khat guak tangten hoih zaw hi.

²⁰ Mipil paʼ inn sungah neihlelam a dimin om a, ahi zongin mihai pa in a ngah zahzah zang khia pah hi.

²¹ Thuman thutakin gamta tawntung lecin na khan sau-in pahtawina na ngah ding hi.

²² Mipil khat in mi thahatte in a hut khuapi la zo a, amauʼ muanmuan kulhpi nangawn susia zo hi.

²³ Kampau a ki-ip zote lungkhamna tawh kipelh hi.

²⁴ Mi kihisak i cihte pen kiliansakin a kiphasak mite ahi hi.

²⁵ Mi thadahpa in na sem nuam lo ahih manin a mahmah a kithattawm ahi hi.

²⁶ Mihoih lote in lungkim hun nei loin deih thuah tawntung uh a, mihoihte cingh-in pia khia tawntung uh hi.

²⁷ Topa in migiloteʼ biakpiaknate deih lo a, ngimna hoih lo tawh a piakte uh deih lo zaw kan lai hi.

²⁸ A man lo tecite mangthang ding uh a, thuman teciteʼ kam kizaza ding hi.

²⁹ Migilote pen muan theih dingin khauh pau uh a, midikte ahihleh lungmuang takin kampau hiathiat uh hi.

³⁰ Mihingteʼ pilna, a thutheihna le a thugente khempeuh, Topaʼ deihna tawh a kituah kei leh a kimanna om lo hi.

³¹ Galdo nadingin sakolte a baih sa-in kikoih a, ahi zongin gal zawhna pen Topaʼ hang hizaw hi.